សម្តេចតេជោ ហ៊ុន សែន ព្រមានចាប់ខ្លួនទណ្ឌិត សម រង្ស៉ី បញ្ចុលគុក
(ភ្នំពេញ)៖ ថ្លែងក្នុងជំនូប ជាមួយប្រជាពលរដ្ឋខ្មែរ មកពីសហគមន៍ស្វីស ជាង១២០០នាក់ នាយប់ថ្ងៃទី៤ ខែកក្កដា ឆ្នាំ២០១៩នេះ សម្តេចតេជោ ហ៊ុន សែន មិនជឿថា ទណ្ឌិត សម រង្ស៉ី នឹងហ៊ានចូលប្រទេសកម្ពុជា ដូចអ្វីដែលោកបានប្រកាសនោះទេ។ ប៉ុន្តែសម្រាប់អ្នកដែលមានដីកាចាប់ខ្លួន គឺត្រូវតែចាប់បញ្ចូលក្នុងពន្ធនាគារ ចំណែកជនបរទេសដែលចង់អមដំណើរដោយមិនមានទិដ្ឋាការ នឹងមិនអនុញ្ញាតឱ្យចូលមកកម្ពុជាទេ។
ការលើកឡើងរបស់សម្តេចតេជោ ហ៊ុន សែន នេះ បានធ្វើឡើងបន្ទាប់ពីទណ្ឌិត សម រង្ស៉ី បានភូតម្តងហើយម្តងទៀតថា លោកនឹងចូលមកប្រទេសកម្ពុជា នៅក្នុងឆ្នាំ២០១៩នេះ ហើយការចូលមកនេះគឺដើម្បីចាប់សម្តេចតេជោ ហ៊ុន សែន។
សម្តេចតេជោ ហ៊ុន សែន ថា សម្រាប់ពលរដ្ឋកម្ពុជាដែលចង់ចូលមកប្រទេសកម្ពុជា ជាសិទ្ធិរបស់បងប្អូន គ្មាននរណាហាមឃាត់ទេ ទៅពេលណាក៏បានដែរ។ សម្តេចបានបញ្ជាក់បន្តថា មិនមែនសម្តេចជាអ្នកកំណត់ឱ្យចូល ឬមិនចូលនោះទេ ប៉ុន្តែអ្នកមានដីការជាប់ខ្លួនត្រូវតែទៅចូលគុក។ ដោយឡែកជនបរទេសចូលកម្ពុជាត្រូវសុំទិដ្ឋាការ បើមិនដូច្នេះមិនអនុញ្ញាតឱ្យចូលនោះទេ៕
អត្ថបទ៖ សុខ លាភ
