ក្រសួងយុត្តិធម៌ កំពុងស៊ើបអង្កេតលើករណីស្រី្តជាប់ពន្ធនាគារ ១៦៥ឆ្នាំ
ភ្នំពេញ៖ បន្ទាប់ពីទទួលដំណឹងថា ស្រ្តីខ្មែរម្នាក់ ជាប់ពន្ធនាគារ រហូតដល់ទៅ១៦៥ឆ្នាំ ដោយសារតែមានទោសបូកផ្សំ តែអ្វីដែលជាក្តីសោកសង្រេងនោះ គឺស្រី្តរូបនោះ មានកូនតូច នៅជាប់នឹងខ្លួនថែមទៀត។
លោក អង្គវង្ស វឌ្ឍានា រដ្ឋមន្ត្រីក្រសួងយុត្តិធម៌ និង លោក ជីវ កេង អនុប្រធានតុលាការកំពូល កំពុងស៊ើបអង្កេតលើករណីស្ត្រីម្នាក់ ដែលជាប់ពន្ធនាគារ ១៦៥ឆ្នាំ។
លោក វឌ្ឍនា ដែលទើបទទួលបានព័ត៌មាននេះ បានបញ្ជាឲ្យមន្ត្រីជំនាញយុត្តិធម៌ ស៊ើបអង្កេតលើករណីនេះ ដើម្បីរកមូលហេតុឲ្យច្បាស់។ បើតាមរបាយការណ៍នៃសាលក្រម ដែលតុលាការបានបញ្ជូនទៅលោក អង្គ វង្ស វឌ្ឍនា នោះ គឺការផ្ដន្ទាទោសស្ត្រីខាងលើនោះ ដោយយោងតាមបទល្មើសព្រហ្មទណ្ឌ ដែលស្ត្រីរូបនោះ បានជាប់ពាក់ព័ន្ធនឹងករណីប្លន់ជាមួយស្វាមីកន្លងមក។ ត្រង់ចំណុចនេះលោក វឌ្ឍនា បានបញ្ជាក់ថា សាលក្រមនីមួយៗបានកាត់ទោសឲ្យស្ត្រីរូបនោះ ជាប់ទោសពី៨ឆ្នាំឡើងទៅ។ បើតាមលោក វឌ្ឍនា ស្វាមីរបស់ស្ត្រីរូបនេះ ជាក្រុមចោរប្លន់យ៉ាងសាហាវ ដោយក្នុងមួយឆ្នាំចេញប្លន់យ៉ាងតិច៩ករណី។
យោងតាមគេហទំព័រហ្វេសប៊ុករបស់ លោក កែវ រ៉េមី នៅរសៀលថ្ងៃទី៣ ខែកក្កដា ឆ្នាំ២០១៩ បានសរសេរថា”សូមអរគុណជាអនេក ជូនដល់ ឯកឧត្តម អង្គវង្ស័ វឌ្ឍានា រដ្ឋមន្ត្រីក្រសួងយុត្តិធម៌ និង ឯកឧត្តម ជីវ កេង អនុប្រធានតុលាការកំពូលដែលបានយកចិត្តទុកដាក់លើករណី ពេជ្រ សូណែត ដើម្បីបង្កើនល្បឿនទាក់ទងបណ្តឹងឧទ្ធរណ៍”។
យោងតាមក្រមព្រហ្មទណ្ឌកម្ពុជា និងនីតិវិធីច្បាប់កម្ពុជា គឺតម្រូវឲ្យជនល្មើសជាប់ទោសណាមួយ ដែលតុលាការកាត់ឲ្យជាប់ពន្ធនាគារច្រើនជាងគេ ក្នុងចំណោមទោសដែលបានប្រព្រឹត្តិប៉ុណ្ណោះ ។ ក្នុងន័យនេះលោក វឌ្ឍនា ក៏យល់ថា ស្ត្រីជាប់ពន្ធនាគារខាងលើ មិនត្រូវអនុវត្តទោសរហូតដល់១៦៥ឆ្នាំនោះទេ។ «ខ្ញុំកំពុងតាមដានរឿងនេះ»។ នេះជាការបញ្ជាក់របស់រដ្ឋមន្ត្រីក្រសួងយុត្តិធម៌៕
អត្ថបទ៖ សុខ លាភ
