លោក ម៉ម ប៊ុនហេង ៖ ការស្លាប់ដោយជំងឺគ្រុនឈាមនៅមន្ទីរពេទ្យ ភាគច្រើន គឺទទួលបានការព្យាបាលរួចហើយតាមពេទ្យឯកជន
ភ្នំពេញ ៖ ក្នុងឱកាសអញ្ជើញបើកសិក្ខាសាលាបណ្ដុះបណ្ដាល ស្ដីពី «ការគ្រប់គ្រង ថែទាំ និងព្យាបាលជំងឺគ្រុនឈាម» នៅថ្ងៃទី០២ ខែកក្កដា ឆ្នាំ២០១៩នេះ រដ្ឋមន្ដ្រីក្រសួងសុខាភិបាល លោក ម៉ម ប៊ុនហេង បានថ្លែងថា ករណីដែលស្លាប់ដោយជំងឺគ្រុនឈាមនៅតាមមន្ទីរពេទ្យ ភាគច្រើន គឺទទួលបានការព្យាបាលរួចហើយដោយខ្លួនឯង ឬជាមួយពេទ្យឯកជនមួយចំនួន ឬតាមឱសថស្ថានដែលផ្សំថ្នាំ ដោយគ្មានពិនិត្យរោគវិនិច្ឆ័យ។
លោក ម៉ម ប៊ុនហេង ថ្លែងបន្ដថា «បញ្ហាពីរយ៉ាងនោះ គឺពេលខ្លួន ឬកូនរបស់ខ្លួនក្ដៅខ្លួន ផ្ដល់ឱសថដោយខ្លួនឯង និងទៅពេទ្យដែលមិនមានជំនាញ ឬមួយទៅកន្លែងលក់ឱសថ ឱ្យគេផ្សំឱ្យលេប ដែលធ្វើឱ្យកើតមានបញ្ហាពីរ គឺទី១៖ ការប្រើប្រាស់សេរ៉ូមទឹកខ្ពស់ ធ្វើឱ្យទឹកលេចសួត និងទី២៖ ប្រើប្រាស់ថ្នាំបញ្ចុះកំដៅ ប៉ារ៉ាសេតាម៉ុល (Paracetamol) ច្រើនលើសចំណុះ ធ្វើឱ្យយើងខូចថ្លើម ឬរលាកថ្លើម ដែលជំរុញឱ្យមានការហូរឈាមចេញមក ដែលបណ្ដាលឱ្យគ្រោះថ្នាក់ដល់ជីវិតបាន» ។
លោករដ្ឋមន្ដ្រីបន្ដថា ករណីដែលស្លាប់ដោយជំងឺគ្រុនឈាមនៅតាមមន្ទីរ ដែលគេបញ្ជូនមកមន្ទីរពេទ្យយើងនេះ ភាគច្រើន គឺទទួលបានការព្យាបាលរួចហើយដោយខ្លួនឯង ឬជាមួយពេទ្យឯកជនមួយចំនួន ឬតាមឱសថស្ថានដែលផ្សំថ្នាំ តែបានធ្វើឱ្យជំងឺនោះ កាន់តែធ្ងន់ធ្ងរ ដូច្នេះហើយបានជាយើងនៅតែបន្ដពង្រឹងចំណេះដឹងលើផ្នែកនេះ ទៅដល់គ្រូពេទ្យរដ្ឋ និងឯកជនទូទាំងប្រទេស។
ជាមួយគ្នានេះដែរលោកអំពាវនាវដល់ គ្រូពេទ្យេឯកជន និងអ្នកលក់ថ្នាំនៅតាមឱថសការីទាំងអស់ សូមកុំចេះតែលក់ថ្នាំ ដោយគ្មានវេជ្ជបណ្ឌិតត្រឹមត្រូវ និងផ្សំថ្នាំផ្ដេសផ្ដាស ព្រោះជំងឺគ្រុនឈាមនេះ វាខុសប្លែកពីជំងឺដទៃទៀត ដែលត្រូវមានការពិនិត្យតាមដាន វិនិច្ឆ័យឱ្យបានច្បាស់លាស់។
សូមជម្រាបថា គិតត្រឹមសប្ដាហ៍ទៅ២១ ជំងឺគ្រុនឈាមក្នុងរយៈពេល៦ខែដើមឆ្នាំ២០១៩នេះ មានចំនួនសរុប ១៣.៨៤៣ករណី ស្លាប់ ២៤នាក់ (អត្រាស្លាប់០,២) មានន័យថា ប្រហែល៥ដងកើនឡើងច្រើនជាងឆ្នាំ២០១៨ ៕
អត្ថបទ៖ សុខ លាភ
