អជ្ញាធរខេត្តសៀមរាប ចុះបិទការដ្ឋានរណ្តៅដីមួយកន្លែង ដែលគ្មានច្បាប់អនុញ្ញាត
សៀមរាប៖ កម្លាំងនគរបាលខេត្ត និងស្រុកប្រាសាទបាគង រួមជាមួយមន្ទីររ៉ែ និងថាមពលខេត្តសៀមរាប បានចុះបិទការដ្ឋានរណ្តៅដីមួយកន្លែង ដែលគ្មានច្បាប់អនុញ្ញាត ស្ថិតនៅភូមិអន្លង់ពីរ ឃុំត្រពាំងធំ ស្រុកប្រាសាទបាគង នៅថ្ងៃម្សិលមិញនេះ ។
លោក សូរ ប្លាតុង អភិបាលស្រុកប្រាសាទបាគង ក៏បានឱ្យដឹងផងដែរថា ការដ្ឋានមួយនេះ គឺមិនបានសុំច្បាប់អនុញ្ញាតពីអាជ្ញាធរ ឬមន្ទីរជំនាញណាមួយឡើយ ។ លោកថា ការដ្ឋានជីកដីនេះ បានចាប់ធ្វើអាជីវកម្មជីកដី អស់រយៈពេលជាង ៤ខែហើយ ។
លោកអភិបាលស្រុក បានបន្តទៀតថា កន្លងមក លោកបានឱ្យមន្ត្រីជំនាញ ចុះមកធ្វើការផ្អាកមិនឱ្យធ្វើអាជីវកម្មជីកដីដោយខុសច្បាប់ ចំនួន ២ដងរួចមកហើយ ដើមី្បឱ្យម្ចាស់ការដ្ឋានទៅសុំច្បាប់ឱ្យបានត្រឹមត្រូវផងដែរ ។ ប៉ុន្តែម្ចាស់ការដ្ឋាននេះ មិនគោរពការហាមឃាត់របស់មន្ត្រីជំនាញ ថែមទាំងបន្តធ្វើការជីកយកដីដដែល ។
លោក មាស ជូរ៉ានី ប្រធានមន្ទីររ៉ែ និងថាមពល បានអោយដឹងថា រាល់ការធ្វើអាជីវកម្មធនធានរ៉ែទាំងអស់ ត្រូវមានច្បាប់ត្រឹមត្រូវ និងត្រូវអនុវត្តតាមលក្ខខណ្ឌអាជ្ញាបណ្ណ ឱ្យខានតែបាន និងត្រូវបញ្ឈប់រាល់ការអនុវត្តខុសច្បាប់។ លោកថា បើនៅតែអនុវត្តខុស គឺត្រូវទទួលកំហុសចំពោះមុខច្បាប់ជាធរមាន ។ «ការដ្ឋានរណ្តៅដី ស្ថិតនៅក្នុងស្រុងប្រាសាទបាគង មានចំនួន ៤កន្លែង តែមានច្បាប់អនុញ្ញាតតែ ៣រណ្តៅទេ ហើយក៏បានកំពុងធ្វើអាជីវកម្មតែ ១រណ្តៅប៉ុណ្ណោះ ។ ចំពោះការដ្ឋានរណ្តៅដីទីតាំងនេះ ពុំបានសុំច្បាប់ឡើយ» ។
ក្នុងការចុះបិទនោះដែរ ក្រុមការងារ ក៏បានធ្វើការបិទក្លុំ (អេស្កាវ៉ាទ័រ) ចំនួន ៤គ្រឿង និងរថយន្តទាំង៩គ្រឿង មិនឱ្យធ្វើសកម្មភាពមួយរយៈ រហូតដល់មានច្បាប់អនុញ្ញាតពីខេត្ត ឬក្រសួងជាមុនសិន ទើបអាចយកគ្រឿងចក្រទាំងនេះ ទៅធ្វើអាជីវកម្មវិញបាន ៕
អត្ថបទ៖ សុខ លាភ
