លោក ព្រាប កុល ៖ ១៥ឆ្នាំទៀតកម្ពុជានឹងស្ថិតនៅ ជាកូនឆ្មាអាស៊ី បើបាត់បង់ EBA
ភ្នំពេញ ៖ ក្នុងករណីកម្ពុជាបាត់បង់ ការលើកលែងពន្ធគ្រប់ប្រភេទ (EBA) ពីសំណាក់សហភាពអឺរ៉ុប (EU)នោះ គឺកម្ពុជានឹង ស្ថិតនៅជាកូនឆ្មា អាស៊ីយ៉ាងតិច ១៥ឆ្នាំទៀត ។ នេះជាការលើកឡើងរបស់លោក ព្រាប កុល នាយកប្រតិបត្តិការ អង្គការតម្លាភាពកម្ពុជា តាមរយៈបណ្តាញ ទំនាក់ទំនងសង្គមហ្វេសប៊ុក នៅរសៀលថ្ងៃទី១ ខែកក្កដា ឆ្នាំ២០១៩ នេះ។
ការថ្លែងបែបនេះ បន្ទាប់ពីវៀតណាម បានចុះកិច្ចព្រមព្រៀងពាណិជ្ជកម្ម ជាមួយសហភាពអឺរ៉ុប។ កិច្ចព្រមព្រៀងនេះ នឹងបើកទ្វារឲ្យវៀតណាមនាំទំនិញ និងផលិតផលរបស់ខ្លួនជាច្រើនប្រភេទ ទៅកាន់ទីផ្សារអឺរ៉ុប ដោយមិនចាំបាច់បង់ពន្ធ ឬបង់ពន្ធតិច។ ជាមួយគ្នានេះដែរ លោកអបអរសាទរវៀតណាម ដែលបានចុះកិច្ចព្រមព្រៀង ពាណិជ្ជកម្ម ជាមួយសហភាពអឺរ៉ុប។
“វៀតណាមនឹងក្លាយជាខ្លាអាស៊ីថ្មី នៃអាស៊ីថ្មីក្នុងរយៈពេល ពី៥ទៅ១០ឆ្នាំខាងមុខនេះ។ រីឯកម្ពុជាយើងនឹង ហិតផ្សែងវៀតណាម។ ក្នុងករណីដែលកម្ពុជា បាត់បង់គោល នយោបាយអនុគ្រោះពន្ធ (EBA)កម្ពុជានឹងស្ថិតនៅ ជាកូនឆ្មាអាស៊ី យ៉ាងតិច១៥ឆ្នាំទៀត” ។
លោកអំពាវនាវអោយ អ្នកនយោបាយពាក់ពន្ធ័ទាំងអស់ កុំវាយបំបែកឆ្នាំងបាយពលរដ្ឋ ដោយសារតែចង់ចាញ់ ចង់ឈ្នះគ្នា តាមវប្បធម៌នយោបាយ បច្ចុប្បន្ននេះអី ដូច្នេះងាកមករកតុចរចារ ដើម្បីដោះស្រាយ បញ្ហានយោបាយខ្មែរ ៕
អត្ថបទ៖ សុខ លាភ
