មន្ត្រីCPP អតីតមន្ត្រីCNRP អ្នកវិភាគបញ្ហាសង្គម លើកឡើងផ្សេងៗគ្នា ពីការលាលែង នឹងការតែងតាំងលោក យន្ត មីន
ព្រះសីហនុ៖ បន្ទាប់ពីការលាលែងពីតំណែងជាអភិបាលខេត្តព្រះសីហនុ ត្រូវតែតាំងថ្មីជារដ្ឋលេខាធិការក្រសួងការពារជាតិ មន្ត្រីបក្សកាន់អំណាច អតីតមន្ត្រីបក្សប្រឆាំង អ្នកវិភាគបញ្ហាសង្គម បានលើកឡើងពីការលាលែងពីតំណែង នឹងការតែងតាំងនេះផ្សេងៗគ្នា ។
លោកអ៊ុំ សំអាន អតីតមន្ត្រីជាន់ខ្ពស់គណបក្សប្រឆាំង បានអោយដឹងថា ការតែងតាំងលោក យន្ត មីន ជារដ្ឋលេខាធិការក្រសួងការពារជាតិ ហើយតំឡើងពីផ្កាយបីទៅផ្កាយបួន គឺជាការប្រមាថដល់វិញ្ញាណក្ខន្ធ ជនរងគ្រោះដែលបានស្លាប់ដោយសារបាកអគារនៅខេត្តព្រះសីហនុ។ លោកថា លោក យន្ត មីន ជាអ្នកទទួលខុសត្រូវនៅខេត្តព្រះសីហនុ ។ គាត់បានទទួលកំហុសរបស់គាត់ដែរមិនត្រឹមដកតំណែង តាមការស្នើសុំរបស់គាត់ទេ គួរតែសើបអង្កេរឿងនេះ មិនគួរតំឡើងតំណែងគាត់អោយខ្ពស់ជាងមុនទេ ។
លោកបន្ថែមថា គួរតែបើកការសើបអង្កេតអោយបានច្បាស់លាស់ ថាអ្នកណាជាអ្នកទទួលខុសត្រូវចំពោះករណីនេះ ព្រោះស្លាប់អស់២៨នាក់ច្រើនណាស់ គួរតែបើកការសើបអង្កេតថាអ្នកណាខ្លះដែលពាក់ពន្ធករណីនេះ ឬអាចមកពីអំពើរពុករលួយ។
ចំណែកលោកបណ្ឌិត ឡៅ ម៉ុងហៃ អ្នកឃ្លាំមើលបញ្ហាសង្គមបានស្តីបន្ទោសថា ការសម្រេចតែងតាំងលោក យន្ត មីន ឱ្យឡើងកាន់តួនាទីថ្មីគឺរឿងមិនត្រឹមត្រូវទាល់តែសោះ ដោយសារតែអ្នកដែលជាប់ពាក់ព័ន្ធនឹងការធ្វើឱ្យអគារបាក់ដួលរលំនោះ ត្រូវតែមានការស៊ើបជាមុនសិនដើម្បីនាំខ្លួនយកមកកាត់ទោសតាមច្បាប់ មុននឹងសម្រេចតែងតាំងដំណែងអ្វីមួយ៖ «អាហ្នឹងអសីលធម៌សម្បើមណាស់ សពរបស់អ្នករងគ្រោះមិនទាន់បានធ្វើបុណ្យ ៧ថ្ងៃផង ហើយយើងដំឡើងបុណ្យស័ក្ដិមន្ត្រីដែលមានការចោទប្រកាន់ថា មានការទទួលខុសត្រូវចំពោះការបាក់រលំផ្ទះសង្កត់អ្នកទាំងនោះឱ្យស្លាប់ វាអត់ត្រូវទេ»។
ដោយឡែកលោក មាស បូពៅ ប្រធានគណបក្សកសិករ បានអោយដឹងថា ស្នើដាក់លោក យន្ត មីន ឲ្យស្ថិតក្រោមការត្រួតពិនិត្យរបស់អង្គភាពប្រឆាំងអំពើពុករលួយ ACU ជាមុនសិន (មុនតម្លើងតំណែង) ពាក់ព័ន្ធករណីការដ្ឋានសំណង់ចិនគ្មានច្បាប់អនុញ្ញាតិក្រោមការគ្រប់គ្រងរបស់សាលាខេត្តព្រះសីហនុ សំណង់អាគារគ្មានគុណភាព ធ្វើឲ្យបាក់រលំមានមនុស្សស្លាប់ និងរបួសជាច្រើននាក់កាលពីថ្ងៃទី ២២ ខែមិថុនា ឆ្នាំ២០១៩ ។
រដ្ឋមន្ត្រីក្រសួងការពារជាតិលោក ទៀ បាញ់ បានអោយដឹងថា លោក យន្ត មីនពិតជាមានសមត្ថភាពកាន់តួនាទីនេះ យន្ត មីន មិនបានទៅធាក់ឱ្យបាក់អគារហ្នឹងកិនមនុស្សស្លាប់ឯណា គេបានប្រឹងប្រែងធ្វើកិច្ចការហ្នឹង ហើយយន្ត មីន ក៏មានការសោកស្ដាយហើយ ក៏មានការក្ដុកក្ដួលជាខ្លាំងដែរ ក្នុងខ្លួនដែលជាអ្នកទទួលខុសត្រូវខ្ពស់បំផុតក្នុងខេត្តព្រះសីហនុហ្នឹងបាទ»។
ជាមួយគ្នុានេះដែរ សម្ដេចក្រឡាហោម ស ខេង ឧបនាយករដ្ឋមន្រ្តីនិងជារដ្ឋមន្រ្តីក្រសួងមហាផ្ទៃ បានលើកឡើងក្នុងពិធីប្រកាសចូលកាន់មុខតំណែងអភិបាល នៃគណៈអភិបាលខេត្តព្រះសីហនុថា ការលាលែងពីតំណែងរបស់ ឯកឧត្តម យន្ត មីន អតីតអភិបាលខេត្តព្រះសីហនុ គឺជាស្មារតីទទួលខុសត្រូវគួរឲ្យគោរព៕
អត្ថបទ៖ សុខ លាភ
