សួនទឹកធំលំដាប់ទី២ ប្រចាំតំបន់អាស៊ានបើកដំណើរការសាកល្បងនៅកម្ពុជា ក្នុងខែកក្កដាខាងមុខនេះ
(ភ្នំពេញ)៖ សួនទឹកកំសាន្តដ៏ធំជាងគេបង្អស់ក្នុងប្រទេសកម្ពុជា Garden City Waterpark នឹងបើកដំណើរការសាកល្បង ឲ្យចូលលេងកំសាន្តនៅខែកក្កដាខាងមុខនេះ ហើយនឹងបើកដំណើរការជាផ្លូវការនៅដើមខែធ្នូ ឆ្នាំ ២០១៩ នេះផងដែរ។
សួនទឹកកំសាន្ត Garden City Waterpark ត្រូវបានវិនិយោគដោយក្រុមហ៊ុន LYP Group នៅលើផ្ទៃដីជាង ៦ ហិកតា ដែលស្ថិតនៅក្នុងតំបន់អភិវឌ្ឍន៍ទីក្រុងរណបថ្មី របស់ឯកឧត្តម អ្នកឧកញ៉ា លី យ៉ុងផាត់ ក្នុងសង្កាត់ព្រែកតាសេក ខណ្ឌជ្រោយចង្វារ ដែលនៅក្បែរនឹង សួនសត្វ Phnom Penh Safari ប្រមាណ ១៨គីឡូម៉ែត្រពីរាជធានីភ្នំពេញ។ បន្ថែមពីនេះទៅទៀតគំរោងនេះត្រូវបានសាងសង់ដោយក្រុមហ៊ុនលំដាប់អន្តរជាតិ White Water របស់ប្រទេសអង់គ្លេស ដែលចំណាយដើមទុនជាង ៥០ លានដុល្លារអាមេរិក។
អ្វីដែលកាន់តែពិសេសសួនទឹកលំដាប់អន្តរជាតិមួយនេះ នឹងក្លាយជាសួនទឹកធំលំដាប់ទី២ ប្រចាំតំបន់អាស៊ានបន្ទាប់ពីសួនទឹក Sunway lagoon ដែលមានទំហំ ៣២ហិកតា របស់ម៉ាឡេស៊ី។ ហើយនឹងត្រៀមទម្លាក់តំណែងសួនទឹក Cartoon Network Pattaya របស់ថៃ ដែលមានទំហំ ៥.៧ ហិកតាផងដែរ ដោយមានឧបករណ៍កំសាន្ត ទំនើបៗច្រើនជាង សួនទឹកប្រទេសថៃរហូតដល់ ៥០% ដូចជារលកសប្បនិម្មិតដែលមានកំពស់ជាង ៣ ម៉ែត្រជាដើម៕
កែសម្រួល៖ ស៊ាងម៉ី
