ការធ្វើចរាចរណ៍នៅលើស្ពានដែកបាឡេ នឹងត្រូវបិទចាប់ពីម៉ោង ៩ព្រឹកនេះ
(ភ្នំពេញ)៖ មន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា ការធ្វើចរាចរណ៍នៅលើស្ពានដែកបាឡេឫស្សីកែវ នឹងត្រូវបិទ នៅវេលាម៉ោង ៩ព្រឹកថ្ងៃទី២៩ ខែមិថុនា ឆ្នាំ២០១៩នេះ។ ការផ្អាកនេះ មានរយៈពេល ១៥ថ្ងៃ ដើម្បីបើកការដ្ឋានថែទាំ និងត្រួតពិនិត្យលក្ខណៈបច្ចេកទេស។ ផុតរយៈពេលកំណត់ ស្ពានដែកនេះនឹងដាក់ឱ្យដំណើរការជាធម្មតាឡើងវិញ។
យោងតាមសេចក្តីជូនដំណឹងរបស់រដ្ឋបាលរាជធានីភ្នំពេញកាលពីថ្ងៃទី២៨ ខែមិថុនា ឆ្នាំ២០១៩ បានបញ្ជាក់ថា ស្ពានដែកបាឡេ ដែលតភ្ជាប់ពីផ្លូវជាតិលេខ៥ ក្នុងខណ្ឌឫស្សីកែវ ទៅតំបន់អភិវឌ្ឍន៍ជ្រោយចង្វារ ត្រូវបានដាក់ឱ្យដំណើរការ ១ឆ្នាំមកហើយ។ ដើម្បីធានាបាននូវគុណភាព និងសុវត្ថិភាពជូនប្រជាពលរដ្ឋដែលជាអ្នកដំណើរឆ្លងកាត់ស្ពានដែកនេះ រដ្ឋបាលរាជធានីភ្នំពេញ នឹងធ្វើការថែទាំ និងត្រួតពិនិត្យលក្ខណៈបច្ចេកទេសរបស់ស្ពាន រួមមាន៖ គ្រឿងបង្គំស្ពានផ្នែកខាងលើ និងផ្នែកសសរទម្រស្ពាន។
ក្នុងអំឡុងពេលផ្អាកចរាចរណ៍នេះ រដ្ឋបាលរាជធានីភ្នំពេញ ក៏ស្នើឱ្យប្រជាពលរដ្ឋពង្វាងចរាចរណ៍ដោយធ្វើដំណើរតាមស្ពានមិត្តភាពកម្ពុជា-ជប៉ុន (ស្ពានជ្រោយចង្វារទី១), ស្ពានមិត្តភាពកម្ពុជា-ចិន (ស្ពានជ្រោយចង្វារទី២) និងស្ពានព្រែកព្នៅ៕
កែសម្រួល៖ ស៊ាងម៉ី
