អតីតមន្ត្រីបក្សប្រឆាំង អ្នកវិភាគ រិះគន់ការតែងតាំងលោក យន្ត មីន ជារដ្ឋលេខាធិការក្រសួងការពារជាតិ
បន្ទាប់ពីលោក យន្ត មីន ត្រូវបានព្រះមហាក្សត្រចេញព្រះរាជក្រឹត្យ តែងតាំងជារដ្ឋលេខាធិការក្រសួងការពារជាតិ តាមការស្នើសុំរបស់លោកនាយករដ្ឋមន្រ្តីហ៊ុន សែន អតីតមន្ត្រីបក្សប្រឆាំង សង្គមស៊ីវិល អ្នកវិភាគសង្គមរិះគន់ ចំពោះការតំឡើងតំណែងលោក យន្ត មីន ឡើងទៅជាផ្កាយ៤ ។
លោកអ៊ុំ សំអាន អតីតមន្ត្រីជាន់ខ្ពស់គណបក្សប្រឆាំង បានអោយដឹងថា ការតែងតាំងលោក យន្ត មីន ជារដ្ឋលេខាធិការក្រសួងការពារជាតិ ហើយតំឡើងពីផ្កាយបីទៅផ្កាយបួន គឺជាការប្រមាថដល់វិញ្ញាណក្ខន្ធ ជនរងគ្រោះដែលបានស្លាប់ដោយសារបាកអគារនៅខេត្តព្រះសីហនុ។ លោកថា លោក យន្ត មីន ជាអ្នកទទួលខុសត្រូវនៅខេត្តព្រះសីហនុ ។ គាត់បានទទួលកំហុសរបស់គាត់ដែរមិនត្រឹមដកតំណែង តាមការស្នើសុំរបស់គាត់ទេ គួរតែសើបអង្កេរឿងនេះ មិនគួរតំឡើងតំណែងគាត់អោយខ្ពស់ជាងមុនទេ ។
លោកបន្ថែមថា គួរតែបើកការសើបអង្កេតអោយបានច្បាស់លាស់ ថាអ្នកណាជាអ្នកទទួលខុសត្រូវចំពោះករណីនេះ ព្រោះស្លាប់អស់២៨នាក់ច្រើនណាស់ គួរតែបើកការសើបអង្កេតថាអ្នកណាខ្លះដែលពាក់ពន្ធករណីនេះ ឬអាចមកពីអំពើរពុករលួយ។
ចំណែកអ្នកវិភាគនយោបាយ លោក បណ្ឌិត ឡៅ ម៉ុងហៃ បានសរសេរសារនៅលើហ្វេសប៊ុក ដោយចោទជាសំណួរថា តើត្រូវទេ ចំពោះការតែងតាំងទេសរដ្ឋមន្ត្រីមួយរូបដែលនាយករដ្ឋមន្ត្រី ដកហូតពីមុខតំណែងនិងប្រកាសលាំងៗថា “ខ្វះការទទួលខុសត្រូវ និងភូតភរ”ឱ្យធ្វើជាទីប្រឹក្សារាជ រដ្ឋាភិបាល មានឋាន:ស្មើទេសរដ្ឋមន្ត្រីនោះ? លោក បណ្ឌិត ឡៅ ម៉ុងហៃ បានឆ្លើយសំណួរខ្លួនឯង ថា បើធ្វើតែយ៉ាងនេះ គឺខូចឈ្មោះរាជរដ្ឋាភិបាល ខូចឈ្មោះនាយករដ្ឋមន្ត្រីដែលជាប្រមុខរាជរដ្ឋាភិបាលអស់ហើយ។ លោកបន្តថា ខូចឈ្មោះ គេលែងគោរព គេលែងទុកចិត្ត ហើយគេលែងស្ដាប់។
ដោយឡែក លោក មាស នី អ្នកវិភាគនយោបាយ បានលើកឡើងតាមទំព័រហ្វេសបុកលោកថា ភាពវិបល្លាសផ្នែកនយោបាយងាយនឹងកេីតឡេីង នៅពេលដែលរដ្ឋមួយបន្តព្យាយាមរក្សា និងប្រមូលមនុស្សអសមត្ថភាពឫមន្រ្តីប្រព្រឹត្តខុសទុកដោយសារតែបុព្វហេតុនយោបាយនោះ។
លោកចោទជាសំនួរថា បេីមានតែប៉ុនហ្នឹងរហូត តេីនិតិរដ្ឋមានន័យថាម៉េចសំរាបប្រទេសយេីងទៅថ្ងៃមុខ? កោះពេជ្រស្លាប់រាប់រយនាក់ ចែកលុយហេីយស្ងាត់ឈឹង។ អគារបាក់នៅកំពុងសោមស្លាប់មនុស្សជាច្រេីននាក់ចែកលុយហេីយក៏ស្ងាត់ទៅទៀត? ស្លាប់ ចែកលុយ ឡេីងបុណ្យ នេះឬជាច្បាប់ធម្មជាតិ សំរាប់កម្ពុជាឫ?៕
កាលពីថ្ងៃទី២៤ ខែមិថុនា លោក ហ៊ុន សែន បានសម្រេចឱ្យលោក យន្ត មីន លាឈប់ពីអភិបាល ខេត្តព្រះសីហនុ តាមការស្នើសុំ បន្ទាប់ពីលោក យន្ត មីន ទទួលស្គាល់កំហុសក្នុងដែនសមត្ថកិច្ចរបស់ខ្លួន ដែលបណ្ដាលឱ្យមានកម្មករ សំណង់២៨នាក់ស្លាប់ និង២៦នាក់ របួសនៅក្នុងហេតុការណ៍បាក់រលំសំណង់អគារចិនមួយកន្លែង គ្មានច្បាប់អនុញ្ញាតត្រឹមត្រូវកាលពីម៉ោង ៤ទៀបភ្លឺថ្ងៃទី២២ ខែមិថុនា៕
អត្ថបទ៖ សុខ លាភ
