ឆ្នាំ២០១៩ ជំងឺគ្រុនឈាមបានកើតឡើងច្រើនជាងឆ្នាំមុន៥ ដង
ភ្នំពេញ៖ ករណីជំងឺគ្រុនឈាម បានហក់ឡើងជាថ្មីក្នុងឆ្នាំ២០១៨៩នេះ ខណៈ មានមនុស្សចំនួន២៤នាក់ ក្នុងចំណោម១ម៉ឹន៣ពាន់នាក់ដែលកើតជំងឺគ្រុនឈាម បានបាត់បង់ជីវិត គិតត្រឹមថ្ងៃទី២៧ ខែមិនថុនា ឆ្នាំ២០១៩។ ជាការឆ្លើយតប ក្រសួងសុខាភិបាល អះអាងថា បើទោះបីជា មានការកើនឡើងនៃករណីជំងឺគ្រុនឈាម តែអាជ្ញាធរអាចគ្រប់គ្រងសភាពការណ៍បាន តាមរយៈការដាក់ចេញវិធានការជាបន្តបន្ទាប់។
ថ្លែងក្នុងសន្និសីទសារព័ត៌មាន ដែលរៀបចំដោយអង្គភាពអ្នកនាំពាក្យរាជរដ្ឋាភិបាលកម្ពុជាស្តីពី «ស្ថានភាពជំងឺគ្រុនឈាមនាពេលបច្ចុប្បន្ន» នៅថ្ងៃទី២៧ ខែមិថុនា ឆ្នាំ២០១៩នេះ លោកវេជ្ជបណ្ឌិត ហ៊ុយ រ៉េកុល ប្រធានកម្មវិធីជាតិប្រយុទ្ធនឹងជំងឺគ្រុនឈាម បានអោយដឹងថា គិតត្រឹមថ្ងៃទី២៧ ខែមិនថុនា ឆ្នាំ២០១៩ មានជំងឺគ្រុនឈាម កើតឡើងចំនួន១ម៉ឺន៣ពាន់ករណី ពោលគឺកើនឡើងចំនួន៥ដង បើធៀបនឹងឆ្នាំមុន។ ក្នុងចំណោមមនុស្ស១ម៉ឺន៣ពាន់នាក់ដែលកើតជំងឺគ្រុនឈាម មានមនុស្សចំនួន២៤ បានស្លាប់។
លោកវេជ្ជបណ្ឌិត បញ្ជាក់ថា ករណីស្លាប់ភាគច្រើន កើតឡើងដោយសារអាណាព្យាបាលយឺតយ៉ាវបញ្ជូនកូនមកមន្ទីរពេទ្យដើម្បីទទួលការព្យាបាល។ យ៉ាងណាក៏ដោយ ប្រធានមជ្ឈមណ្ឌលជាតិ ប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ដ្រ នៃក្រសួងសុខាភិបាល អះអាងថា បើទោះបីជាមានការកើនឡើងនៃករណីជំងឺគ្រុនឈាមក៏ដោយ តែអាជ្ញាធរនៅអាចគ្រប់គ្រងសភាពការណ៍បាន។
ជំងឺគ្រុនឈាមធ្លាប់រាតត្បាតខ្លាំងចុងក្រោយនៅឆ្នាំ២០១២ ហើយជាទូទៅ នៅអំឡុងពេលរាតត្បាតខ្លាំង គឺនៅរៀងរាល់ ៥ ទៅ ៦ឆ្នាំម្ដង។ ដូច្នេះ មានន័យថា ឆ្នាំ២០១៩នេះ គឺជាឆ្នាំដែលត្រូវដល់វដ្ដនៃការរាតត្បាតធំម្ដងទៀត។
ដោយឡែកប្រធានមន្ទីរពេទ្យកុមារជាតិ លោកវេជ្ជៈបណ្ឌិត ញឹប អង្គាបុស្ស បានអោយដឹងថា មន្ទីរពេទ្យកុមារជាតិ ទទួលអ្នកជំងឺគ្រុនឈាមជាមធ្យមជាង ៣០០នាក់ក្នុងមួយថ្ងៃ។ បើគិតពីដើមឆ្នាំ២០១៩ មកដល់ថ្ងៃទី២០ ខែមិថុនា មន្ទីរពេទ្យកុមារជាតិ ទទួលបានការចូលមកព្យាបាលពីអ្នកជំងឺគ្រុនឈាម ៣ពាន់នាក់ ក្នុងនោះមាន ៤នាក់បានស្លាប់។
ជាមួយគ្នានោះក្រសួងសុខាភិបាល ក៏បានជំរុញលើកទឹកចិត្ដដល់ក្រុមគ្រូពេទ្យពេទ្យ ត្រូវខិតខំប្រឹងប្រែងបន្ថែមទៀត ជាមួយនឹងការយកចិត្ដទុក្ខដាក់ខ្ពស់ ដើម្បីសង្គ្រោះអ្នកជំងឺ ប្រកបដោយប្រសិទ្ធភាព និងឆាប់រហ័ស៕
អត្ថបទ៖ សុខ លាភ
