គ្រឿងញៀនជាង ២ តោន នឹងត្រូវដុតបំផ្លាញនៅព្រឹកនេះ
ភ្នំពេញៈ ក្រសួងមហាផ្ទៃនឹងដុតបំផ្លាញគ្រឿងញៀនជាច្រើនប្រភេទជាង ២ តោន ក្នុងថ្ងៃទិវាប្រឆាំងគ្រឿងញៀនអន្តរជាតិនៅថ្ងៃពុធទី ២៦ ខែ មិថុនា នៅមជ្ឈមណ្ឌលកោះពេជ្រ រាជធានីភ្នំពេញ។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វិរិទ្ធ បានអោយដឹងថា ជារៀងរាល់ឆ្នាំ អង្គការសហប្រជាជាតិ (អសប) បានកំណត់យកថ្ងៃទី ២៦ ខែ មិថុនា ជាថ្ងៃទិវាអន្តរជាតិប្រយុទ្ធប្រឆាំងគ្រឿងញៀនដោយតម្រូវឱ្យប្រទេសជាសមាជិករៀបចំទិវានេះទៅតាមប្រធានបទរៀងៗខ្លួន ស្របតាមបរិបទនៃការគំរាមកំហែងដោយបញ្ហាគ្រឿងញៀន ។
លោក ថា៖ «ទិវានេះ ធ្វើយ៉ាងណាឱ្យប្រជាពលរដ្ឋបានជ្រួតជ្រាបពីគ្រឿងញៀនដែលបង្កគ្រោះថ្នាក់ និងហានិភ័យដល់សុខភាពសន្តិសុខសណ្តាប់ធ្នាប់នៃការអភិវឌ្ឍជាតិរបស់ខ្លួន»។គ្រឿងញៀន និងសារជាតិញៀន សរុបជាង ២ តោន នឹងត្រូវដុតបំផ្លាញចោលនៅថ្ងៃទី ២៦ ខែ មិថុនា ខាងមុខនេះ។
បើតាមលោក មាស វិរិទ្ធ សម្រាប់កម្ពុជាការរៀបចំទិវាអន្តរជាតិនេះ ជាគោលការណ៍រាជរដ្ឋាភិបាលគាំទ្រ ដោយតែងអនុញ្ញាតឱ្យមានការរៀបចំទិវាមានលក្ខណៈទ្រង់ទ្រាយធំ នៅមជ្ឈមណ្ឌលកោះពេជ្រ រាជធានីភ្នំពេញ។ ទន្ទឹមនឹងនេះក៏មានរៀបចំនៅតាមបណ្តាខេត្តគោលដៅផ្សេងៗផងដែរ៕
អត្ថបទ៖ សុខលាភ
