ព្រឹកនេះ លោក ពេជ្រ ស្រស់ ចុះសិក្សាបញ្ហាដីធ្លីរបស់ពលរដ្ឋ៨គ្រួសារស្ថិតនៅ ស្រុកខ្សាច់កណ្តាល
នាព្រឹកថ្ងៃទី២៥ ខែមិថុនា ឆ្នាំ២០១៩ នេះ លោក ពេជ្រ ស្រស់ ប្រធានប្រតិភូគណបក្សយុវជនកម្ពុជា ដែលជាសមាជិកទីប្រឹក្សារាជរដ្ឋាភិបាលនៃស្ថាប័នឧត្ដមក្រុមប្រឹក្សាពិគ្រោះ និងផ្ដល់យោបល់ លោកបានអញ្ជើញចុះសិក្សាបញ្ហាដីធ្លីរបស់ប្រជាពលរដ្ឋ៨គ្រួសារស្ថិតនៅភូមិពុកឬស្សីកណ្តាល ឃុំពុកឬស្សីកណ្តាល ស្រុកខ្សាច់កណ្តាល ខេត្តកណ្តាល។
សរសេរនៅក្នុងបណ្តាញទំនាក់ទំនងសង្គមនៅថ្ងៃទី២៥ ខែមិថុនា នេះ លោក ពេជ្រ ស្រស់ បានអោយដឹងថា ពេញមួយព្រឹកនេះ ខ្ញុំបានមកចូលរួមស្តាប់អំពីការកើតទុក្ខមិនសុខចិត្តរបស់ប្រជាពលរដ្ឋ៨គ្រួសារស្ថិតនៅភូមិពុកឬស្សីកណ្តាល ឃុំពុកឬស្សីកណ្តាល ស្រុកខ្សាច់កណ្តាល ខេត្តកណ្តាល ដែលឈ្មួញបានធ្វើការអុកឡុកពួកគាត់មិនឲ្យលក់ដីរបស់ខ្លួនដោយឈ្មួយនោះបានផុតរលត់នៃកិច្ចសន្យាលក់ទៅហើយគឺឈ្មួញនោះបានបង្កើតការចោទលើពលរដ្ឋមិនឲ្យប្លង់ដីឲ្យ ។
លោកបន្ថែមថា ប៉ុន្តែប្រជាពលរដ្ឋបានឆ្លើយតបទៅឈ្មួញភ្លាមៗថាការរត់ឯកសារ គឺខាងឈ្មួញជាអ្នករត់ការហើយមិនរត់ការបែរជាកប់ឯកសារទុកទៅវិញ។ ករណីនេះក៏មានពាក់ព័ន្ធនឹងអាជ្ញាធរស្រុកខ្សាច់កណ្តាលផងដែរ ខ្ញុំនឹងស្រាវជ្រាវបន្តទៀត ដើម្បីជុំរុញឲ្យមានការដោះស្រាយតម្លាភាពជូនប្រជាពលរដ្ឋដែលជាម្ចាស់កម្មសិទ្ធិដី៕
អត្ថបទ៖ សុខ លាភ
