Man Utd និង PSG ត្រៀមកញ្ចប់ប្រាក់ប្រជែងគ្នាដណ្តើមកីឡាករវ័យក្មេងពី Bundesliga
តាមសេចក្តីរាយការណ៍របស់សារព័ត៌មាន the Sun បានឲ្យដឹងថា ក្លឹបយក្សនៅអង់គ្លេស Manchester United និងក្លឹបយក្សនៅបារាំង Paris Saint-Germain កំពុងដេញថ្លៃគ្នា ដាក់ទឹកប្រាក់ ៧០លានផោន ដើម្បីនាំកីឡាករវ័យក្មេងជម្រើសជាតិអង់គ្លេស Jadon Sancho ពីក្របខណ្ឌ Bundesliga។
៩ចំនុចពិសេស ដែលអ្នកប្រហែលមិនដឹងពី Jadon Sancho
គេហ៊ាននិយាយថា ក្លឹបទាំង ២កំពុងប្រជែងគ្នា ព្រោះគេឃើញលោក Ole Gunnar Solskjaer អនាគតគ្រូបង្វឹករបស់ Man Utd និងតំណាងក្លឹប PSG បានជួបសន្ទនាជាមួយ Sancho នៅកន្លែងហ្វឹកហាត់របស់កីឡាករវ័យក្មេងរូបនេះ។ ការពិតទៅ Sancho ក៏មានមិត្តភក្តិជិតស្និទ្ធិជាច្រើន នៅអង់គ្លេស និងលេងក្នុងក្របខណ្ឌ Premier League ដូច្នេះហើយកីឡាករដែលទើបឈានចូលវ័យ ១៩ឆ្នាំរូបនេះ ទំនងជាមានភាគរយច្រើន ធ្វើដំណើរត្រលប់មកអង់គ្លេសវិញ។
មិនត្រឹមតែប៉ុណ្ណោះទេ គេក៏សង្កេតឃើញថា រៀមច្បងក្លឹប Man Utd មួយចំនួន ក៏បានទៅនិយាយបញ្ចុះបញ្ចូល Sancho ក្នុងពេលពួកគេ ត្រូវមានកាតព្វកិច្ចចូលរួមក្នុងក្រុមជម្រើសជាតិអង់គ្លេស។ ប៉ុន្តែ ប្រសិនបើក្លឹប PSG ហ៊ានឲ្យតម្លៃលើសពី ៧០លានផោន នោះក៏ប្រហែលក្លឹប Dortmund នឹងពិចារណាចំពោះសំណើរនេះផងដែរ។
គួរជម្រាបជូនថា Jadon Sancho ទើបតែចាកចេញពីក្លឹប Manchester City ទៅកាន់ក្លឹប Dortmund កាលពីខែសីហា ឆ្នាំ ២០១៧ ហើយគេបានក្លាយជាកីឡាករខ្សែបម្រើសំណព្វចិត្តសម្រាប់ក្រុមលឿងខ្មៅ តាមរយៈសមត្ថភាពនៃការរកគ្រាប់បាល់ និងការជួយ assists ដល់មិត្តរួមក្រុម។ សូមបញ្ជាក់ដែរថា ប្រសិនបើ Sancho ត្រូវផ្ទេរពីក្លឹប Dortmund ទៅកាន់ក្លឹបណាមួយ នៅចុងរដូវកាលនេះ នោះក្លឹប Manchester City ក៏នឹងទទួលបានកម្រៃ ១៥ភាគរយនៃតម្លៃផ្ទេររបស់ Sancho ផងដែរ។ទោះជាយ៉ាងណា Man City ប្រហែលជានឹងសោកស្តាយខ្លាំងបំផុត ប្រសិនបើ Sancho ជ្រើសរើស Manchester United ដែលជាក្លឹបប្រជែងរបស់ខ្លួន ព្រោះក្លឹបមេឃា បានដឹងច្បាស់ពីសមត្ថភាពរបស់កីឡាករវ័យក្មេងរូបនេះ៕
ប្រភព ៖ FOX SPORTS
