ក្រោយលាលែងលោក យន្ត មីន ៖ សុំការយោគយល់ពីបងប្អូន បើការដឹកនាំកន្លងមក មានការខុសឆ្គង
ភ្នំពេញ៖ ក្រោយកើតមានករណីបាក់រលំអគារកម្ពស់ ៧ជាន់ កណ្ដាលក្រុងព្រះសីហនុ បណ្ដាលឲ្យមានមនុស្សស្លាប់ និងរបួសជាច្រើននាក់នោះ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី២៤ មិថុនានេះ បានសម្រេចដកតំណែង អភិបាលខេត្តព្រះសីហនុ លោក យន្ត មីន តាមការស្នើសុំពីរបស់លោក។
បន្ទាប់ពីការប្រកាស់របស់លោកនាយករដ្ឋមន្ត្រី ប៉ុន្មាននាទីមុននេះ គណនីហ្វេសបុកផ្ទាល់របស់អភិបាលខេត្តព្រះសីហនុ លោក យន្ដ មីន បានបង្ហោះសារខ្លីមួយ សុំទោសចំពោះមហាជន ក៏ដូចគ្រួសារនៃសព និងជនរងគ្រោះ ដោយលោកបានសរសេរថា៖ “ខ្ញុំបាទសូមគោរពបងប្អូនអ្នកខេត្តព្រះសីហនុ ជាពិសេសបងប្អូនរងគ្រោះ ក្នុងហេតុការណ៍អគារ៧ជាន់រលំនាថ្ងៃទី២២ កន្លងមក ខ្ញុំពិតជាមានការសោកស្តាយ និងសុំចូលរួមរំលែកទុក្ខយ៉ាងក្រៀមក្រំ ជាមួយគ្រួសារនៃសព។
លោកថា ខ្ញុំបានជួបសម្តេចតេជោនាយករដ្ឋមន្ត្រី ដើម្បីសុំការអភ័យទោសពីលោក និងសុំលាលែងចេញពីតំណែងអភិបាលខេត្តព្រះសីហនុ។ ខ្ញុំបាទសុំការយោគយល់ពីបងប្អូនទាំងអស់ បើការដឹកនាំកន្លងមក មានការខុសឆ្គង ដោយប្រការណា១នោះ” ៕
អត្ថបទ៖ សុខ លាភ
