បន្ទាប់ពីចូលរួមកិច្ចប្រជុំកំពូលអាស៊ានលើកទី៣៤ នៅបាងកក សម្តេច ហ៊ុន សែន ធ្វើដំណើរទៅមើលស្ថានភាពនៅខេត្តព្រះសីហនុដោយផ្ទាល់
សម្តេចនាយករដ្ឋមន្ត្រី ហ៊ុន សែន នាយប់ថ្ងៃទី២៣ ខែមិថុនា នេះ បានធ្វើដំណើរទៅកាន់ខេត្តព្រះសីហនុ ដើម្បីមើលស្ថានភាពដោយផ្ទាល់នៅទីតាំងអគារដែលដួលរលំ កាលពីថ្ងៃទី២២ ខែមិថុនា ដែលបណ្តាលឲ្យមនុស្ស១៨នាក់ស្លាប់ និង២៤នាក់រងរបួស [គិតត្រឹមល្ងាចនេះ]។
សម្តេចតេជោ ហ៊ុន សែន បានបញ្ជាក់នៅលើ Facebook នៅយប់ថ្ងៃទី២៣ ខែមិថុនា ឆ្នាំ២០១៩នេះថា «ពេលនេះខ្ញុំកំពុងធ្វើរដំណើរទៅកាន់ខេត្តព្រះសីហនុ ដើម្បីចូលរួមក្នុងកិច្ចខិតខំប្រឹងប្រែងរុករក និងសង្គ្រោះជាបន្តជាមួយបងប្អូនដែលកំពុងធ្វើការនៅទីនោះស្រាប់»។
សម្តេចតេជោ ក៏បានអំពាវនាវដល់សប្បុរសជនមេត្តាជួយជាថវិកាដល់គ្រួសារនៃអ្នកបាត់បង់ជិវិត និងអ្នករបួសក្នុងហេតុការណ៍នេះ។
សូមបញ្ជាក់ថា រហូតមកដល់យប់ថ្ងៃទី២៣ ខែមិថុនា ឆ្នាំ២០១៩នេះ កម្លាំងជួយសង្គ្រោះមកពីគ្រប់ផ្នែកសរុបជាង ១ពាន់នាក់ នៅតែបន្តរុករកជនរងគ្រោះនៅក្រោមគំនរអគារដែលដួលរលំនៅក្នុងខេត្តព្រះសីហនុ។ តាមការបញ្ជាក់ពីរដ្ឋបាលខេត្តព្រះសីហនុ គំនរអគារនោះ ទើបនឹងរើចេញបានជាង ៥០ភាគរយប៉ុណ្ណោះ៕
អត្ថបទ៖ សុខ លាប
