Barcelona បញ្ចេញតម្លៃលក់ Philippe Coutinho ហើយ!
តាមប្រភពពីសារព័ត៌មាន ESPN បានឲ្យដឹងថា ក្លឹបបាល់ទាត់អ្នកមានបុណ្យ Barcelona បានសម្រេចដាក់លក់ខ្សែបម្រើប្រយុទ្ធប្រេស៊ីល Philippe Coutinho ក្នុងតម្លៃចាប់ពី ៩០លានផោនឡើងទៅ។ ការដាក់លក់នេះ គឺជាការសម្រេចចិត្តរបស់គណៈកម្មការក្លឹបតែមួយប៉ុណ្ណោះ ព្រោះថា Coutinho នៅតែចង់បន្តរួមរស់ជាមួយក្លឹប Barcelona។
ប្រភពជិតស្និទ្ធិនឹងសារព័ត៌មាន ESPN បានឲ្យដឹងថា មកដល់ពេលនេះ មិនទាន់មានក្លឹបណាមួយ ទាក់ទងចង់បាន Coutinho ជាផ្លូវការនៅឡើយទេ ប៉ុន្តែក្លឹបរីករាយប្រសិនបើមានអ្នកណាម្នាក់ចាប់អារម្មណ៍ចង់បានកីឡាករវ័យ ២៦ឆ្នាំនេះ។ យ៉ាងណាក៏ដោយ កន្លងមកមានពាក្យចចាមអារ៉ាមថា ក្លឹប Manchester United ចង់បាន Coutinho ទៅលេងជាមួយខ្លួន ប៉ុន្តែក៏មិនហ៊ានដោយសារតែតម្លៃខ្លួនថ្លៃពេក
ជាការកត់សម្គាល់ តាំងពីផ្ទេរពីក្លឹប Liverpool ក្នុងតម្លៃ ១០៥លានផោន កាលពីខែមករា ឆ្នាំ ២០១៨ ទៅកាន់ក្លឹប Barcelona កីឡាករប្រេស៊ីលរូបនេះ មិនបានចូលលេងជាប់លាប់នោះទេ ក្នុងរដូវកាលថ្មី ២០១៨/២០១៩នេះ។ នៅពេលថ្មីនេះ ពេលដែល Coutinho ត្រូវបានប្តូរចូលលេង ស្រាប់តែអ្នកគាំទ្រក្លឹបអ្នកមានបុណ្យ បានស្រែកចំអកឲ្យ Coutinho ដោយមិនពេញចិត្ត ព្រមទាំងមានអ្នកខ្លះឌឺដង ឲ្យក្លឹបលក់ Coutinho ទៀតផង។
Barcelona ធ្លាប់ទទួលស្គាល់ថា Philippe Coutinho គឺជាកីឡាករដ៏មានប្រជាប្រិយភាពម្នាក់ សម្រាប់ក្លឹប ដូច្នេះហើយនៅពេលដែលគេលេងមិនបានល្អ គេក៏ក្លាយជាផ្ទាំងស៊ីបនៃការវាយប្រហាររបស់អ្នកគាំទ្រផងដែរ៕
ប្រភព ៖ FOX SPORTS
បកប្រែនិងកែសម្រួលដោយ ៖ ‘ពេជ្រ គឹមស្រ៊ិន’
