ក្រុមអ្នកសារព័ត៌មានកម្ពុជា ចេញលិខិតចំហរួមគ្នាមួយ ទាមទារឲ្យតុលាការទម្លាក់ចោលបទចោទពីអតីតអ្នករាយការណ៍ព័ត៌មានអាស៊ីសេរីពីររូប
ក្រុមអ្នកសារព័ត៌មានកម្ពុជា នៅថ្ងៃទី២០ ខែមិថុនា បានចេញលិខិតចំហរួមគ្នាមួយទាមទារឲ្យសាលាឧទ្ធណ៍ទម្លាក់ចោលបទចោទពីអតីតអ្នករាយការណ៍ព័ត៌មានអាស៊ីសេរីពីររូប។ លិខិតចំហនេះធ្វើឡើងមួយថ្ងៃមុនសាលាឧទ្ធណ៍គ្រោងបើកសវនាការសំណុំរឿងអតីតអ្នកសារព័ត៌មានវិទ្យុអាស៊ីសេរី (RFA) លោក អ៊ួន ឈិន និងលោក យាង សុធារិន្ទ ហៅ សុជាមេត្តា នៅថ្ងៃទី ២១ មិថុនាស្អែកនេះ។
ក្រុមអ្នកសារព័ត៌មានមកពីស្ថាប័នផ្សេងៗ គ្នានៅក្នុងប្រទេសកម្ពុជា បានផ្ដិតមេដៃ និងចេញលិខិតរួម គ្នាមួយអំពាវនាវជាថ្មីដល់សាលាឧទ្ធណ៍ បញ្ចប់ការដាក់ឲ្យស្ថិតនៅក្រោមការតាមដានរបស់តុលាការលើអតីតអ្នកយកព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន ព្រមទាំងទម្លាក់ចោលទាំងស្រុងនូវការចោទប្រកាន់លើពួកគេ។
លិខិតចំហចុះកាលបរិច្ឆេទថ្ងៃទី២០ ខែមិថុនា ដែលអង្គភាព Fast News ទទួលបាននៅព្រឹកថ្ងៃនេះ បានអោយដឹងថា យើងខ្ញុំជាអ្នកសារព័ត៌មានដែលកំពុងបំពេញការងារនៅកម្ពុជា សូមអំពាវនាវជាថ្មីដល់សាលាឧទ្ធណ៍ដែលបើកសវនាការនៅថ្ងៃស្អែក បញ្ចប់ការដាក់ឲ្យស្ថិតនៅក្រោមការតាមដានរបស់តុលាការលើអតីតអ្នកយកព័ត៌មានវិទ្យុអាស៊ីសេរី(RFA) លោក អ៊ួន ឈិន និងលោក យាង សុធារិន ហៅ យាង សុជាមេត្តា ព្រមទាំងទម្លាក់ចោលទាំងស្រុងនូវការចោទប្រកាន់លើពួកគេ។
លិខិតចំហដដែលបន្តថា យើងខ្ញុំដែលបានភ្ជាប់ឈ្មោះនៅក្នុងលិខិតចំហមួយនេះ មានការព្រួយបារម្ភយ៉ាងខ្លាំងចំពោះការចោទប្រកាន់ដ៏ធ្ងន់ធ្ងរលើអ្នកទាំងពីរ។ លើសពីនេះទៅទៀត ការដាក់ឲ្យស្ថិតនៅក្រោមការតាមដានរបស់តុលាការ ធ្វើឲ្យពួកគេទាំងពីរពិបាកក្នុងការរស់នៅ និងមិនអាចបំពេញការងារជាអ្នកកាសែតបន្តទៀតនោះទេ។ ពួកគេមិនអាចផ្លាស់ប្តូរទីលំនៅដោយគ្មានការអនុញ្ញាតពីចៅក្រមស៊ើបសួរ មិនអាចធ្វើដំណើរទៅក្រៅប្រទេស និងត្រូវបង្ហាញខ្លួនជារៀងរាល់ខែនៅប៉ុស្តិ៍នគរបាលផងដែរ។
នៅក្នុងសង្គមប្រជាធិបតេយ្យ សារព័ត៌មានបានដើរតួនាទីយ៉ាងសំខាន់ក្នុងការផ្តល់ព័ត៌មានពិតប្រាកដជូនដល់ប្រជាពលរដ្ឋ។ អ្នកសារព័ត៌មានមានតួនាទីក្នុងការរាយការណ៍អ្វីដែលជាការពិតជូនដល់សាធារណជន។
សូមរំលឹកផងដែរថា លោក អ៊ួន ឈិន និងលោក យាង សុធារិន ហៅ យាង សុជាមេត្តា ត្រូវបានឃាត់ខ្លួនកាលពីថ្ងៃទី១៤ ខែវិច្ឆិកា ឆ្នាំ២០១៧ ដោយតុលាការចោទប្រកាន់ពី«បទប្រគល់អោយរដ្ឋបរទេសនូវព័ត៌មានជាអាទិ៍ដែលបង្កអោយមានការអន្តរាយដល់ការការពារជាតិ តាមបញ្ញត្តិមាត្រា៤៤៥នៃក្រមព្រហ្មទណ្ឌ»។ កាលពីខែសីហា ឆ្នាំ២០១៨ អតីតអ្នកយកព័ត៌មានអាស៊ីសេរីទាំងពីររូបនេះ ត្រូវបានដោះលែងឲ្យនៅក្រៅឃុំបណ្តោះអាសន្ន ក្រោយជាប់ពន្ធនាគារជាង៩ខែ តែត្រូវដាក់ឲ្យស្ថិតនៅក្រោមការតាមដានរបស់តុលាការ៕
អត្ថបទ៖ សុខ លាភ
