លោក សម រង្ស៊ី ថាលោក ហោ ណាំហុង យករបាយការណ៍មេធាវីរបស់ខ្លួន ក្រឡៃធ្វើជាសាលក្រមតុលាការប្រទេសបារាំង
បន្ទាប់ពីលោក ហោ ណាំហុង បង្ហាញសាលក្រម និងសាលដីកាទាំងអស់របស់តុលាការបារាំងដែលបានកាត់សេចក្តីថា «លោក ហោ ណាំហុង ឈ្នះក្តីលោក សម រង្ស៊ី នោះលោក សម រង្ស៊ី ច្រានចោលការលើកឡើងរបស់លោក ហោ ណាំហុង។
លោក សម រង្ស៊ី សរសេរនៅក្នុងបណ្តាញទំនាក់ទំនងសង្គមរបស់លោកថា ថ្មីៗនេះ ទំព័រហ្វេសប៊ុករបស់លោក ហោ ណាំហុង ព្រមទាំងអង្គភាពសារព័ត៌មានជាច្រើន ដែលគាំទ្ររដ្ឋាភិបាលក្រុងភ្នំពេញ បាននាំគ្នាចុះផ្សាយព្រោងព្រាតនូវលិខិតរបស់លោក ដាវីដ មាស មេធាវីលោក ហោ ណាំហុង ទាក់ទងនឹងសេចក្ដីសម្រេចរបស់តុលាការប្រទេសបារាំងអំពីការចោទប្រកាន់របស់លោក សម រង្ស៊ី មកលើលោក ហោ ណាំហុង។
លោកសម រង្ស៊ី បន្តថា បើយើងពិនិត្យមើលឲ្យល្អិតល្អន់ទៅ លោក ហោ ណាំហុង បានយករបាយការណ៍មេធាវីរបស់ខ្លួន ក្រឡៃធ្វើជាសាលក្រមតុលាការប្រទេសបារាំង បង្ហាញឲ្យសាធារណជនមើល។ លោក ហោ ណាំហុង ប្រហែលជាយល់ថាប្រជាពលរដ្ឋខ្មែរងាយឲ្យគាត់បោកប្រាស់ហើយមើលទៅ។ តាមពិតលិខិតនោះ មិនមែនជាសាលក្រមរបស់តុលាការប្រទេសបារាំងអ្វីនោះទេ គឺគ្រាន់តែជារបាយការណ៍របស់លោក ដាវីដ មាស ធ្វើជូនលោក ហោ ណាំហុង តែប៉ុណ្ណោះ។
សូមរំលឹកថា លោក ហោ ណាំហុង ចុងក្រោយនេះ បានចាញ់ក្តី ២ ដង ផ្ទួនៗគ្នា ម្តងនៅឆ្នាំ២០១១ ហើយម្តងទៀតនៅឆ្នាំ ២០១៦ ក្នុងការតទល់ជាមួយលោក សម រង្ស៊ី នៅប្រទេសបារាំង៕
អត្ថបទ៖ សុខ លាភ
