Ronnie O’Sullivan ឈ្នះ Judd Trump នៅមួយគ្រាប់ខ្មៅចុងក្រោយ
នៅថ្ងៃទី ២២ ខែមីនា ឆ្នាំ២០១៩ ម៉ោង ៩ ៖ ១៥នាទី
ស្នូកឃ័រ៖ ជើងឯកស្នូកឃ័រពិភពលោក 5សម័យ Ronnie O’Sullivan បានឡើងវគ្គផ្ដាច់ព្រ័ត្រនៃពានរង្វាន់ Tour Championship បន្ទាប់ពីយកឈ្នះ Judd Trump 9-8 ហ្វ្រេមប្រផិតប្រផើយសំរេចដោយគ្រាប់ខ្មៅចុងក្រោយ។
កីឡាករវ័យ 29ឆ្នាំ Judd Trump បាននាំមុខ 6-2 លើ O’Sullivan ហើយក៏បន្តនាំមុខទៀត 8-5។ តែ O’Sullivan ដែលកំពុងស្វែងរកជើងឯក Tour Championship នេះដើម្បីឡើងកាន់កាប់តំណែងលេខ1 ពិភពលោកនោះ ក៏វាយបកតាមពីក្រោយជាបន្តបន្ទាប់រហូតស្មើគ្នា 8-8 ហ្វ្រេមអូសបន្លាយដល់សិតកាត់សេចក្ដី។ នៅតែជាការប្រកួតតានតឹង ខណៈ Judd Trump ស្ទើរតែឈ្នះការប្រកួតនេះទៅហើយ ដោយធ្វើការនាំមុខរហូតដល់ពេលវាយបញ្ចូលគ្រាប់ពណ៌លឿងមិនចូល ហុចឱកាសឲ្យ O’Sullivan តាមពីក្រោយយកឈ្នះសិតកាត់សេចក្ដីនេះពិន្ទុ 62-60 ពោលគឺសំរេចដោយមួយគ្រាប់ខ្មៅចុងក្រោយ។ វគ្គផ្ដាច់ព្រ័ត្រ Ronnie O’Sullivan នឹងត្រូវជួបជាមួយ Mark Allen រឺ Neil Robertson ដែលប្រកួតគ្នាថ្ងៃនេះ៕
