អតីតគ្រូបង្វឹកហូឡង់ Bert van Marwijk ក្លាយជាគ្រូបង្វឹកក្រុមជម្រើសជាតិអារ៉ាប់រួមផ្លូវការ
នៅថ្ងៃទី ២២ ខែមីនា ឆ្នាំ២០១៩ ម៉ោង ៩ ៖ ១២នាទី
បាល់ទាត់៖ លោក Bert van Marwijk ត្រូវបានបង្ហាញខ្លួនជាផ្លូវការនៅទីក្រុង Abu Dhabi ក្លាយជាគ្រូបង្វឹកក្រុមជម្រើសជាតិអារ៉ាប់រួម ជាមួយនឹងកិច្ចសន្យាដែលនឹងឃើញអតីតគ្រូបង្វឹកហូឡង់រូបនេះ ដឹកនាំអារ៉ាប់រួមដល់Asian Cup 2023។
អតីតគ្រូបង្វឹកក្រុមជម្រើសជាតិហូឡង់ និងអូស្ត្រាលីក៏បានអង្គុយទស្សនាការប្រកួតយប់ម៉ិញផងដែរ ដែលអារ៉ាប់រួមយកឈ្នះអតីតក្រុមដែលលោកធ្លាប់ដឹកនាំអារ៉ាប៊ីសាអ៊ូឌីត 2-1 ក្នុងជំនួបមិត្តភាពអន្តរជាតិ។ លោក Bert van Marwijk បានមកកាន់តំណែងជំនួសគ្រូបង្វឹកសញ្ជាតិអ៊ីតាលី Alberto Zaccheroni ដែលបានចាកចេញពីតំណែង ក្រោយដឹកនាំក្រុមអារ៉ាប់រួមក្នុងនាមជាម្ចាស់ផ្ទះ ធ្លាក់នៅវគ្គពាក់កណ្ដាលផ្ដាច់ព្រ័ត្រ Asian Cup កាលពីខែមករាកន្លងទៅ។ កាលពីលោក Bert van Marwijk នៅដឹកនាំអារ៉ាប៊ីសាអ៊ូឌីត លោកបាននាំក្រុមឡើងលេង World Cup 2018 នៅរុស្ស៊ីជាលើកដំបូងរាប់ពីឆ្នាំ 2006។
លោកក៏ធ្លាប់ដឹកនាំក្រុមជម្រើសជាតិហូឡង់ពីឆ្នាំ2008 ដល់ឆ្នាំ2012 ដោយនាំក្រុមហូឡង់ឡើងវគ្គផ្ដាច់ព្រ័ត្រ World Cup 2010 អាហ្វ្រិកខាងត្បូង តែចាញ់ក្រុមជម្រើសជាតិអេស្ប៉ាញនៅម៉ោងបន្ថែម 15នាទីពីរដង៕
ប្រភព ៖ BTV
