លោក ហួត ជា អាថ៌កំបាំង ៣ នៅពីក្រោយភាពជោគជ័យរបស់ក្រុមហ៊ុន
លោក ហួត ជា ប្រធានក្រុមហ៊ុន ហួតជាផ្គត់ផ្គង់សម្ភារសំណង់ ដ៏ធំមួយនៅកម្ពុជា មានប្រសាសន៍ថា ការចាប់ផ្តើមធ្វើជំនួញប្រៀបដូចជាការដាំដើមឈើពីតូច ហើយប្រឹងថែទាំយូរទៅវានឹងលូតលាស់ធំឡើងៗ តែបើយើងដាំដើមឈើធំស្រាប់ ជួនកាលដើមឈើនោះអាចងាប់ទៅវិញក៏មានដែរ។
ក្រុមហ៊ុន ហួតជា បង្កើតឡើងកាលពីថ្ងៃទី១ ខែមករា ឆ្នាំ២០១០ដែលបោះទុនវិនិយោគត្រឹមតែ៥ពាន់ដុល្លារប៉ុណ្ណោះដោយសារខិតខំអស់ពីកម្លាំងកាយ-ចិត្តក្នុងការស្វែងរកទីផ្សារលក់ចេញផលិតផលរបស់ក្រុមហ៊ុន និងខិតខំរៀនបន្ថែមដើម្បីយកចំណេះ ទៅរៀបចំដំណើរការក្រុមហ៊ុនឱ្យកាន់តែរីកចម្រើន។ ផ្ទុយពីក្រុមហ៊ុនមួយចំនួនទៀត ដែលបោះទុនរកស៊ីក្នុងទឹកប្រាក់រាប់លានដុល្លារ ប្រធានក្រុមហ៊ុនរូបនេះបញ្ជាក់ថា ការវិនិយោគប្រៀបដូចជាការដាំដើមឈើពីតូច ហើយខំប្រឹងថែទាំស្រោចទឹកដាក់ជី ដើមឈើនោះនឹងរីកលូតលាស់ឡើងធំមិនខាន ហើយការរកស៊ីដាក់ទុនធំតែម្តង ប្រៀបដូចជាការគាស់ដើមឈើធំមួយដើមទៅដាំដូច្នោះដែរ វានឹងមានលទ្ធផល២ ចេញមកវិញ គឺអាចងាប់ និងអាចរស់”។
លោក ហួត ជា បន្តថា ដោយសម្លឹងឃើញថាកម្ពុជាជាប្រទេសកំពុងអភិវឌ្ឍន៍លើវិស័យសំណង់ដែលកាន់តែរីកដុះដាលឡើងពីមួយឆ្នាំទៅមួយឆ្នាំនោះ ទើបលោកសម្រេចចិត្តឈប់ធ្វើការឱ្យគេហើយប្រឹងប្រមែប្រមូលដើមទុនបានចំនួនប្រហែល៥ពាន់ដុល្លារ សម្រាប់បើកដំណើរការក្រុមហ៊ុនជាលើកដំបូង។ មានភាពខ្វះខាតយ៉ាងខ្លាំង សូម្បីតែរថយន្តដឹកទំនិញឱ្យអតិថិជនក៏គ្មានដែរ តែដោយសារការខំព្យាយាម និងខំប្រឹងអស់ពីកម្លាំងពលកម្មកម្លាំងប្រាជ្ញា និងពេលវេលា ទើបធ្វើឱ្យក្រុមហ៊ុនរីកលូតលាស់លឿនរហ័ស មកទល់បច្ចុប្បន្នបង្កើតបាន ៣១សាខា ទាំងនៅក្នុងរាជធានីភ្នំពេញនិងតាមខេត្ត។
អ្វីដែលធ្វើឱ្យក្រុមហ៊ុនរីកចម្រើនឡើងនោះ គឺក្រុមហ៊ុនផ្អែកទៅលើកត្តាសំខាន់ធំៗចំនួន៣ ទី១.គឺអ្នកផ្គត់ផ្គង់ ត្រូវមានភាពស្មោះត្រង់ជាមួយគ្នា។ ទី២.កត្តាបុគ្គលិក សម្រាប់បុគ្គលិកគឺយើងមិនត្រឹមស្រឡាញ់តែមាត់ទេ គឺយើងត្រូវផ្តល់អត្ថប្រយោជន៍ និងលក្ខខណ្ឌល្អៗ ផ្តល់ក្តីសង្ឃឹមដល់ពួកគេសម្រាប់ថ្ងៃអនាគតផង និងទី៣.កត្តាអតិថិជន គឺនៅពេលដែលយើងមានផលិតផលគុណភាពល្អ តម្លៃល្អ ហើយមានបុគ្គលិកធ្វើការបម្រើសេវាកម្មបានល្អហើយនោះ នឹងមានការគាំទ្រពីអតិថិជនមិនខាន។ បន្ទាប់ពីក្រុមហ៊ុនដំណើរការហើយ អ្វីដែលយើងត្រូវប្រយ័ត្នឱ្យបានខ្លាំងបំផុតនោះគឺ ប្រាក់ចំណូលដែលរកបាន គឺយើងត្រូវធ្វើការចាយវាយដោយប្រយ័ត្នបំផុត បើសិនជាចាយខុសខ្ទង់ណាមួយ អាចនឹងធ្វើឱ្យក្រុមហ៊ុនខាតបង់ ពេលនោះភាពបរាជ័យកាន់តែខឹតជិតមករកហើយ។
បន្ទាប់ពីទទួលបានជោគជ័យ និងដោយសារមានការគាំទ្រខ្លាំងនេះហើយ ដែលធ្វើឱ្យក្រុមហ៊ុនរបស់លោកមានអតិថិជនកាន់តែច្រើនឡើងៗពីមួយថ្ងៃទៅមួយថ្ងៃ រហូតមានការទទួលស្គាល់ជាលក្ខណៈអន្តរជាតិ ក្នុងនោះក្រុមហ៊ុនរបស់លោកទទួលបានប័ណ្ណសរសើរពីក្រុមហ៊ុនក្នុងស្រុក និងក្រុមហ៊ុនធំៗពីបរទេសថា ជាកំពូលអ្នកចែកចាយដ៏វៃឆ្លាត ហើយបន្តទទួលបានប័ណ្ណសរសើរទាំងក្នុង និងក្រៅប្រទេសជាច្រើនថែមទៀត។
សម្រាប់ទស្សនវិស័យទៅថ្ងៃអនាគត ក្រុមហ៊ុនផ្គត់ផ្គង់សំណង់ក្នុងស្រុកមួយនេះ បានរៀបចំខ្លួនរួចជាស្រេចក្នុងការប្រកួតប្រជែងទីផ្សារជាមួយក្រុមហ៊ុនមកពីក្រៅប្រទេសទាំងឡាយ ហើយរំពឹងថានឹងពង្រីកសាខាឱ្យបាន៥០នាចុងឆ្នាំ២០១៩នៅក្នុងប្រទេសកម្ពុជា ក្នុងការផ្គត់ផ្គង់សម្ភារសំណង់គ្រប់ប្រភេទទៅដល់អតិថិជន រួមទាំងសេវាកម្ម និងគុណភាព ឱ្យបានកាន់តែប្រសើរឡើងថែមទៀតផង៕
អត្ថបទ៖ សុខ លាភ
