ហ៊ុល គឹមហ៊ុយ ថា ខុសគ្នាស្រលះរវាងការលេងឲ្យបឹងកេត និងលេងនៅបាទី
បាល់ទាត់៖ បន្ទាប់ពីជួយក្រុមបឹងកេតទទួលបាន ៣ពិន្ទុពេញ តាមរយៈការយកឈ្នះក្រុមម្ចាស់ផ្ទះភ្នំពេញក្រោន ៣–២ ក្នុងជំនួបបើកឆាកលីគកំពូលកម្ពុជាសប្ដាហ៍ទី១ អ្នកចាំទីវ័យក្មេង ហ៊ុល គឹមហ៊ុយ បានបង្ហាញនូវអារម្មណ៍តានតឹងជាខ្លាំង បើប្រៀបធៀបកាលពីរូបគេលេងឲ្យក្រុមយុវជនសាលាបាល់ទាត់ជាតិបាទី។
គឹមហ៊ុយ បានបញ្ជាក់ថា វាមានភាពខុសគ្នាស្រលះ ពេលខ្លួនមានឱកាសលេងលីគកំពូលកម្ពុជាជាមួយក្លឹបបឹងកេត ដែលមានការប្រកួតប្រជែងខ្ពស់ទាំងកាយសម្បទា កម្លាំង និងបច្ចេកទេស ផ្ទុយកាលពីលេងនៅសាបាល់ទាត់ជាតិបាទី គឺលេងត្រៀមពានសម្ដេចតេជោ ហ៊ុន សែន, ពានយុវជនផ្សេងៗ និងប្រកួតមិត្តភាពជាដើម។ អ្នកចាំទីកំពុងឡើងកូដក្រោយជួយក្រុម U22 កម្ពុជាទទួលបានចំណាត់ថ្នាក់លេខ៤ នៃពាន AFF U22 Championship 2019 កាលពីពេលថ្មីៗរូបនេះបន្ដថា តាមរយៈការប្រកួតប្រជែងខ្លាំងនេះ នឹងជំរុញរូបគេបង្កើនការហ្វឹកហាត់កាន់តែខ្លាំង ដើម្បីទទួលបានជោគជ័យក្នុងអាជីព និងជួយក្លឹបសម្រេចគោលដៅក្នុងការប្រកួតពានរង្វាន់ផ្សេងៗ ពិសេសគឺ គឹមហ៊ុយ ប្ដេជ្ញានឹងធ្វើឲ្យបានល្អជាងរៀមច្បងតែម្ដង។
គួរបញ្ជាក់ថា បច្ចុប្បន្ន ហ៊ុល គឹមហ៊ុយ កំពុងបង្ហាញភាពលេចធ្លោរ តាមរយៈការចាំទីដ៏ល្អក្នុងការប្រកួតពានរង្វាន់AFF U22 Championship 2019 ដែលកម្ពុជាធ្វើជាម្ចាស់ផ្ទះកាលពីខែមុន ហើយរូបគេក៏ត្រូវបានគ្រូជម្រើសជាតិលោក Felix ផ្ដល់ទំនុកចិត្តជាប់ជម្រើសជាតិ U23 កម្ពុជាជាថ្មីដើម្បីត្រៀមការប្រកួតជម្រុះពូល H នៃពានរង្វាន់AFC U23 Championship 2020 នាចុងសប្ដាហ៍នេះផងដែរ៕
ប្រភព៖ BTV
