ស.ស.ស.ក ស្វាគមន៍ការសម្រេចរបស់ក្រសួងព័ត៌មាន ដែលឲ្យវិទ្យុ VOA បើកការិយាល័យជាផ្លូវការ នៅកម្ពុជា
ភ្នំពេញ៖ ក្រោយពេលដែលក្រសួងព័ត៌មាន សម្រេចអោយវិទ្យុសំឡេងសហរដ្ឋអាមេរិក (VOA) នឹងមានការិយាល័យតំណាងស្របច្បាប់មួយ នៅក្នុងប្រទេសកម្ពុជា សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) ស្វាគមន៍សេចក្តីសម្រេចរបស់ក្រសួងព័ត៌មាន ដែលអនុញ្ញាតឲ្យវិទ្យុ VOA បើកការិយាល័យជាផ្លូវការនៅក្នុងប្រទេសកម្ពុជា។ ជាមួយគ្នានេះ ស.ស.ស.ក ក៏អំពាវនាវដល់អង្គភាពព័ត៌មានអនុវត្តសិទ្ធិ សេរីភាព របស់ខ្លួនឲ្យបានត្រឹមត្រូវតាមក្រមសីលធម៌ ក្នុងការផ្តល់ព័ត៌មានពិត មិនប្រើខ្លឹមសារញុះញុង និងបំភ្លៃ ដើម្បីរួមចំណែកកសាងសង្គមស៊ីវិល័យ នៅកម្ពុជា។
ប្រភពច្បាស់ការណ៍បានឲ្យដឹងថា ស្ថានទូតសហរដ្ឋអាមេរិកប្រចាំនៅកម្ពុជា បានខិតខំធ្វើការងារនេះ ដើម្បីស្នើសុំឲ្យក្រសួងព័ត៌មានយល់ព្រមតាមផ្លូវច្បាប់ ទទួលស្គាល់ការិយាល័យ VOA នៅក្រុងភ្នំពេញ ដែលបានបើកធ្វើការជាយូរមកហើយ។
បើទោះបីជា ក្រសួងព័ត៌មានអនុញ្ញាតឲ្យវិទ្យុ VOA មានការិយាល័យផ្លូវការនៅប្រទេសកម្ពុជា ក៏ប៉ុន្តែ គេគ្មានសង្ឃឹមថា ក្រសួងព័ត៌មាននឹងអនុញ្ញាតដូចគ្នាដល់វិទ្យុ RFA នោះទេ ដោយគេយល់ថា វិទ្យុ RFA គ្មានសីលធម៌ជាអ្នកសារព័ត៌មាន។ គេមិនទាន់ដឹងថា វិទ្យុ RFA នឹងស្នើសុំបើកការិយាល័យឡើងវិញនៅកម្ពុជាដែរ ឬយ៉ាងណា បន្ទាប់ពីវិទ្យុនេះ បានបិទការិយាល័យហើយរត់ចេញពីកម្ពុជា ដោយសារជំពាក់ពន្ធមិនព្រមបង់សង។
សូមរម្លឹកថា ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន កាលពីថ្ងៃទី០៥ ខែមិថុនា ឆ្នាំ២០១៩បានចេញប្រកាស សម្រេចអនុញ្ញាតឲ្យវិទ្យុសំឡេងសហរដ្ឋអាមេរិក VOA បើកការិយាល័យជាផ្លូវការនៅក្នុងប្រទេសកម្ពុជា៕
