ហេតុអ្វីបាន គ្មានឈ្មោះ ឈិន ឈឿន ក្នុងបញ្ជីត្រៀមប៉ះ និង ប៉ាគីស្ថាន ថ្ងៃស្អែកនេះ ព្រោះតែ…..!!
ភ្នំពេញ ៖ អវត្តមានម្ចាស់អាវលេខ១១ ចាន់ វឌ្ឍនាកា កំពុងក្លាយជាប្រធានបទក្តៅលើបណ្តាញសង្គម ខណៈកុមារមាសកម្ពុជារូបនេះគ្មានអ្នកនឹកនាដាក់ឈ្មោះឲ្យលេងទល់ ប៉ាគីស្ថាន ថ្ងៃស្អែកឡើយ ស្របពេលដែលអ្នកលេងល្បឿនលើទីលាន ឈិន ឈឿន ក៏គ្មានវត្តមាន និងត្រូវបានកោះហៅសម្រាប់ត្រៀមខ្លួនសម្រាប់ ការប្រកួត FIFA World Cup Qatar 2022 & Asian Cup 2023 Qualifiers វគ្គជម្រុះ Preliminary Joint Qualification Round 1 ដូចគ្នា រហូតត្រូវអ្នកគាំទ្រលាន់មាត់ភ្លាត់សំណួរសួររកមូលហេតុផងដែរ។
រំពេចពីបាត់ឈ្មោះព្រោះមិនដឹងមូលហេតុបែបនេះនៅថ្ងៃនេះ ម្ចាស់អាវលេខ១៧ ក៏បានឆ្លើយតបដោយក្តីស្រលាញ់ច្បាស់ៗមិនអន់ចិត្តបន្តិចផងថា «អរគុណបងប្អូនទាំងអស់គ្នា សុំសម្រាកមួយរយៈពេលខ្លី ដោយសារឈឺជង្គង់»។ ជាមួយគ្នានឹងការជូនពរឲ្យឆាប់បានស្បើយពីរបួសរហូតបាត់មុខពីជម្រើសជាតិនេះ ឈិន ឈឿន ក៏បានធ្វើការសន្យាចំពោះអ្នកគាំទ្រដោយយកហ្វេសប៊ុកជាសាក្សីថា «ខ្ញុំនឹងប្រឹងប្រែងអោយអស់ពីលទ្ធភាពដើម្បី អ្នកទាំងអស់គ្នាដែលបានគាំទ្រខ្ញុំ»។
