មេប៉ុស្តិ៍ប៉ូលិសឃុំរាមម្នាក់ និងបក្ខពួកត្រូវសមត្ថកិច្ច ចាប់ខ្លួន ពាក់ព័ន្ធករណីឃាតកម្ម
ព្រះសីហនុ៖ មេប៉ុស្តិ៍ប៉ូលិសឃុំរាមម្នាក់ និងបក្ខពួកត្រូវសមត្ថកិច្ច ចាប់ខ្លួន ពាក់ព័ន្ធនឹងករណីឃាតកម្មសម្លាប់បុរសម្នាក់ ហើយសាកសពត្រូវបាន គេយកទៅបោះចោលនៅក្បាលស្ពានទឹកសាប ក្នុងគោលបំណងបំបិទដាន។
ប្រភពព័ត៌មានដែលមុនឈានដល់ការចាប់ខ្លួនមនុស្សច្រើននាក់នេះ ដើមហេតុថា ចេញពីជម្លោះរវាងជនរងគ្រោះ និងម្ចាស់ផ្ទះលក់ទិញ ឈើមួយកន្លែងនៅទឹកសាប ម្ចាស់ផ្ទះមិនស្គាល់ឈ្មោះដោយគ្រាន់តែដឹងថា អ្នកស្រុកហៅម៉ែអាគៀតៗ ដោយប្រើហិង្សាទៅវិញទៅមក រហូតដល់ជនរងគ្រោះស្លាប់។
រឿងហេតុនេះ កើតឡើងកាលពីយប់ថ្ងៃទី៣០ ខែឧសភា ឆ្នាំ២០១៩ លុះព្រឹកឡើងថ្ងៃទី៣១ ខែឧសភា ឆ្នាំ២០១៩ ទើបគេប្រទះឃើញសាកសព ហើយសមត្ថកិច្ចចាប់ផ្តើមស្រាវជ្រាវរហូតដល់មានការចាប់ខ្លួនមនុស្សមួយចំនួន។
ប្រភពពីប្រជាពលរដ្ឋក្នុងភូមិទឹកសាបឃុំរាម បានបង្ហើបថា មុនពេលកើតហេតុជនរងគ្រោះជាមនុស្សចាំដីឲ្យថ្នាក់ដឹកនាំនៅផ្តុំនោះ តែជនរងគ្រោះស្រវ៉ឹងស្រា នៅវេលាម៉ោងប្រហែល៩យប់ ជនរងគ្រោះមករុញច្រានទ្វារផ្ទះម៉ែអាគៀតហ្នឹង ដោយមានបន្ទរសំឡេងស្រែកជេរបញ្ចោផងដែរ ភ្លាមនោះកូនប្រុសពៅរបស់ម៉ែអាគៀត មិនស្គាល់ឈ្មោះក៏លីកាំបិតផ្គាក់ចេញមកកាប់ទៅលើជនរងគ្រោះដាច់ស្មាម្ខាងធ្លាក់តែម្តង។
បន្ទាប់ឃើញហេតុការណ៍បែបនេះ ម៉ែអាគៀតម្ចាស់ផ្ទះបានទូរស័ព្ទទៅលោកមេប៉ុស្តិ៍ឃុំរាម ឈ្មោះ គង់ សាម៉ៃ ឲ្យមកជួយយកជនរងគ្រោះទៅណា ក៏ទៅចុះធ្វើម៉េចឲ្យផុតពីផ្ទះគាត់ ដោយសន្យាឲ្យឈ្នួល១០,០០០ដុល្លារ(មួយម៉ឺនដុលា្លរ) គ្រាន់តែឮដូច្នេះលោកមេប៉ុស្តិ៍ចាត់ការដោយប្រើកងប្រជាការពារម្នាក់ទៀត ដឹកយកទៅផ្លុងចោល និងបញ្ចប់ជីវិតជនរងគ្រោះតែម្តង។
ពាក់ពន្ធ័ករណីនេះ Fast News មិនអាចទាក់ទងលោកជួន ណារិន្ទ ស្នងការនគរបាលខេត្តព្រះសីហនុ ដើម្បីឆ្លើយបំភ្លឺបានទេនៅព្រឹកថ្ងៃទី៥ ខែមិថុនា នេះ ។
ដោយឡែកប្រភពពីសមត្ថកិច្ចដែលសុំមិនបញ្ចេញឈ្មោះប្រាប់ថា បញ្ហានេះសមត្ថកិច្ចកំពុងស្រាវជ្រាវបន្ថែម ដើម្បីបញ្ជាក់ពីរឿងរ៉ាវពិត និងថា ក្នុងករណីរកឃើញពិរុទ្ធភាពពិតប្រាកដ អ្នកពាក់ព័ន្ធ ច្បាប់នឹងផ្តន្ទាទោសមិនលើកលែងឡើយ ប៉ុន្តែពេលនេះ មនុស្ស៥នាក់ហើយបានឃាត់ខ្លួន ក្នុងនោះមានមេប៉ុស្តិ៍នគរបាលេដ្ឋបាលឃុំរាមម្នាក់ ប្រជាការពាររួម និងម្ចាស់ផ្ទះបង្កហេតុផងដែរ៕
អត្ថបទ៖ សុខ លាភ
