រដ្ឋមន្ត្រីការបរទេសអាមេរិក ព្រមានជាថ្មីម្តងទៀតទៅកាន់សម្ព័ន្ធមិត្តអឺរ៉ុបកុំឲ្យប្រើបណ្តាញ 5G របស់ក្រុមហ៊ុន Huawei
ជាថ្មីម្តងទៀតសហរដ្ឋអាមេរិក អំពាវនាវឲ្យសម្ព័ន្ធមិត្តអឺរ៉ុបមានការប្រុងប្រយ័ត្នអំពីអ្វីដែលខ្លួនថ្លែងថាជាហានិភ័យផ្នែកសន្តិសុខបង្កឡើងដោយក្រុមហ៊ុនទូរស័ព្ទរបស់ចិន Huawei ខណៈដែលប្រទេសនានាកំពុងបង្កើតបណ្តាញ 5G របស់ខ្លួន។
បន្ទាប់ពីជំនួបរវាងរដ្ឋមន្ត្រីការបរទេសអាមេរិកលោក Mike Pompeo នឹងរដ្ឋមន្ត្រីការបរទេសប្រទេសហូឡង់លោក Stef Blok នៅក្នុងទីក្រុងឡាអេ កាលពីថ្ងៃចន្ទ លោក Mike Pompeo បានថ្លែងថា៖ «យើងមានភាពច្បាស់លាស់។ អ្វីដែលយើងស្នើគឺស្នើឲ្យសម្ព័ន្ធមិត្ត ដៃគូ និងមិត្តរបស់យើងទាំងអស់ កុំឲ្យធ្វើអ្វីដែលអាចនឹងបង្កគ្រោះថ្នាក់ទៅលើសន្តិសុខរួម ឬដាក់កំហិតទៅលើសមត្ថភាពរបស់យើងក្នុងការចែករំលែកព័ត៌មានរសើប»។
សេចក្តីថ្លែងការណ៍របស់មន្ត្រីការទូតកំពូលរបស់អាមេរិករូបនេះធ្វើឡើង ខណៈដែលទីភ្នាក់ងារស៊ើបការណ៍សម្ងាត់របស់ហូឡង់បានរាយការណ៍អំពីការស៊ើបអង្កេតទៅលើកម្មវិធីបង្កប់មួយដែលអាចអនុញ្ញាតឲ្យក្រុមហ៊ុន Huawei ចូលយកទិន្នន័យរបស់អ្នកប្រើប្រាស់ដោយគ្មានការអនុញ្ញាត។
កាលពីពេលថ្មីៗ មន្ត្រីសហរដ្ឋអាមេរិកបានរារាំងក្រុមហ៊ុនទូរគមនាគមន៍ Huawei របស់ប្រទេសចិនយ៉ាងមានប្រសិទ្ធភាព មិនឲ្យបង្កើតបណ្ដាញចល័ត 5G នៅក្នុងសហរដ្ឋអាមេរិក និងបានព្រមានប្រទេសផ្សេងទៀតអំពីហានិភ័យសន្តិសុខជាតិដែលក្រុមហ៊ុន Huawei អាចបង្ក។
ប៉ុន្តែសម្រាប់ក្រុមហ៊ុន Huawei វិញ ហាក់ដូចជាមិនបានបង្ហាញសញ្ញាដកថយណាមួយទេ និងបានប្ដេជ្ញាយកឈ្នះអ្នករិះគន់ខ្លួន និងច្រានចោលការចោទប្រកាន់ដែលថាខ្លួនគឺជា ការគំរាមកំហែងសន្តិសុខ៕
អត្ថបទ៖ សុខ លាភ
