លោកសុខ លូ ព្រមានកសាងសំណុំរឿងទៅតុលាការ ចំពោះជនណាដែលរំលោភកាន់កាប់ដីតំបន់៣
(កំពង់ធំ)៖ ថ្លែងក្នុងឱកាសកិច្ចប្រជុំប្រចាំខែគណៈបញ្ជាការឯកភាពរដ្ឋបាលខេត្ត នាព្រឹកថ្ងៃទី០៣ ខែមិថុនា ឆ្នាំ២០១៩នេះ លោក សុខ លូ អភិបាលខេត្តកំពង់ធំ និងជាប្រធាន គណៈបញ្ជាការឯកភាពរដ្ឋបាលខេត្ត បានបញ្ជាក់ជាថ្មីថា បញ្ហាដីតំបន់វាលក្រោម(ដីតំបន់៣) ស្នើគណៈបញ្ជាការឯកភាព ក្រុង ស្រុកដែលពាក់ព័ន្ធ ត្រូវបន្តខិតខំយកចិត្តទុកដាក់រួមគ្នាដោះស្រាយ មិនអនុញ្ញាតឲ្យបុគ្គលណាម្នាក់រំលោភបំពានកាន់កាប់ដោយខុសច្បាប់នោះទេ។
លោក សុខ លូ ថា ក្រុមការងារពាក់ព័ន្ធត្រូវចុះកំណត់យាមការជាក់ស្ដែង ប្រសិនករណីរកឃើញបុគ្គលណាម្នាក់រំលោភបំពាន ត្រូវកសាងសំណុំរឿងដាក់ជូនតុលាការ។
នៅក្នុងកិច្ចប្រជុំនេះ លោក សុខ លូ បានលើកឡើងពីបញ្ហាប្រឈមនានាដែលចាំបាច់តម្រូវឲ្យ អាជ្ញាធរមានសមត្ថកិច្ចអស់គ្រប់លំដាប់ថ្នាក់រួមគ្នាទប់ស្កាត់ និងចាត់វិធានការដោះស្រាយសមស្របឲ្យបានទាន់ពេលវេលា។ «យើងត្រូវខិតខំរួមគ្នាយកព័ត៌មានពិតទៅបន្សាបព័ត៌មានមិនពិត ដោយមិនត្រូវទុកឱ្យបញ្ហារីករាលដាល ដែលអាចធ្វើឲ្យជនឆ្លៀតឱកាសមួយចំនួនប្រើប្រាស់បញ្ហាទាំងអស់នេះធ្វើឱ្យស្ថានភាពវិកវរ សង្គមជាតិច្របូកច្របល់ គ្មានសណ្ដាប់ធ្នាប់»៕
អត្ថបទ៖ សុខ លាភ
