អាជ្ញាធរសង្កាត់សាមគ្គី ខេត្តស្ទឹងត្រែង លើកទឹកចិត្តឱ្យកសិករនៅ រួមគ្នាដាំបន្លែឱ្យបានច្រើនមុខ ដើម្បីទប់ទល់ជាមួយបន្លែនាំចូលពីប្រទេសជិតខាង
អាជ្ញាធរសង្កាត់សាមគ្គី ក្រុងស្ទឹងត្រែង ខេត្តស្ទឹងត្រែង បានលើកទឹកចិត្តឱ្យកសិករនៅភូមិខាំផាន់ ចំណុចខេ រួមគ្នាដាំបន្លែឱ្យបានច្រើនមុខបន្ថែមទៀត ដើម្បីធ្វើឱ្យភូមិមួយនេះមានបន្លែនាំចេញទៅលក់នៅលើទីផ្សារ ដើម្បីទប់ទល់ជាមួយបន្លែនាំចូលពីប្រទេសជិតខាង ។
មេភូមិខាំផាន់លោក អន ជួន បានបញ្ជាក់ថា ក្រោយពីមានការទទួលស្គាល់ពីគណៈកម្មការស្តា និងអភិវឌ្ឍន៍វិស័យកសិកម្មមក កសិករនៅភូមិខាំផាន់នេះបានចែករំលែកបទពិសោធន៍ឱ្យគ្នាទៅវិញទៅមក ដើម្បីធ្វើអោយការដាំបន្លែបង្កាបានកាន់តែច្រើន បន្ទាប់ពីទទួលជោគជ័យលើការដាំពោតវិលជុំ។
លោកថា នេះជាកត្តាចម្បងក្នុងការដោះស្រាយជីវភាពរស់នៅ ដោយមិនពឹងផ្អែកទៅលើការដើរស៊ីឈ្នួលលក់កម្លាំងពលកម្ម ឬខ្ចីបុលប្រាក់ពីធនាគារនាំឱ្យមានផលវិបាករកប្រាក់សងគេ ។
ចំណែកលោកស្រីស៊ុយ ចាន់ ឌឿន កសិករដាំដំណាំបន្លែម្រះ បានអោយដឹងថា កសិករនៅចំណុចខេនេះដាំបន្លែបានស្ទើគ្រប់មុខហើយ ព្រោះមានទីផ្សារបញ្ជាទិញងាយស្រួលជាងឆ្នាំកន្លងមក ផលិតបាននាំទៅលក់នៅទីផ្សារឆ្ងាយចំណាយថវិកាដឹកជញ្ជូនច្រើន។ ដំណាំម្រះស្រួលដាំជាងដំណាំបន្លែផ្សេងៗ ព្រោះពុំសូវមានសត្វល្អិតស៊ីដូចជាស្ពៃឬត្រសក់នោះទេ តែត្រូវការថែទាំដូចគ្នា ទើបឆាប់បានផ្លែលក់។
លោកស្រី បន្ថែមថា តម្លៃម្រះថ្លៃ២០០០ទៅ២២០០រៀល ឬយ៉ាងថោកបំផុតតម្លៃ១៥០០រៀល ក្នុងមួយគីឡូក្រាម និយាយទៅឱ្យតែយើងដាំបានច្រើនទៅ មួយគីឡូក្រាម តម្លៃ១៥០០ទៅ២០០០រៀលអត់ដែលចុះដល់៧០០ឬ៨០០រៀលទេ។ បន្លែនាំចេញពីតំបន់នេះ ភាគច្រើន អ្នកបញ្ជាទិញនាំចេញទៅខេត្តរតនគីរី -ក្រចេះ និងខេត្តព្រះវិហារ៕
អត្ថបទ៖ សុខ លាភ
