សាលាក្រុងភ្នំពេញ រៀបចំកន្លែងស្នាក់នៅរបស់ក្រុមកីឡាករចំណុះទូករួចរាល់ ខណៈកងកម្លាំងជាង១៦ពាន់នាក់ ត្រៀមការពារសន្តិសុខ
ខណៈព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកនឹងចូលមកដល់នៅថ្ងៃស្អែក រដ្ឋបាលរាជធានីភ្នំពេញ បានរៀបចំកន្លែងស្នាក់នៅរបស់ក្រុមកីឡាករចំណុះទូករួចរាល់ហើយ ដោយបែងចែកជា២ ទីតាំង គឺ នៅម្ដុំអតីតឃ្លាំងសូគីមិច ខណ្ឌឫស្សីកែវ និង ទីតាំងនៅ OCIC ខណ្ឌជ្រោយចង្វារ។
គិតត្រឹមថ្ងៃទី១៣ ខែវិច្ឆិកា ឆ្នាំ ២០២៤ នេះ រដ្ឋបាលរាជធានីភ្នំពេញ បានរៀបចំកន្លែងស្នាក់នៅសម្រាប់កីឡាករចំណុះទូករួចរាល់ហើយ ក្នុងនោះមានការរៀបចំប្រព័ន្ធទឹកភ្លើង បង្គន់អនាម័យ និងការដាក់ពង្រាយធុងសំរាមជាដើម។
ដោយឡែកដើម្បីរក្សាសុខសុវត្ថិភាពជូនប្រជាពលរដ្ឋ អគ្គស្នងការដ្ឋាននគរបាលជាតិ នឹងដាក់ពង្រាយកងកម្លាំងចម្រុះសរុបជាង១ម៉ឺន៦ពាន់នាក់ ដើម្បីការពារសន្តិសុខ សុវត្តិភាព និងសណ្តាប់ធ្នាប់ ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។
សូមជម្រាបថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នឹងប្រារព្ធឡើងរយៈពេល ៣ ថ្ងៃ ចាប់ពីថ្ងៃទី ១៤ ១៥ ១៦ ខែវិច្ឆិកា ឆ្នាំ ២០២៤។ ព្រឹត្តិការណ៍ដ៏ធំនេះ នឹងមានទូកងចូលរួមប្រកួតប្រជែងចំនួន ៣៤៦ ទូក លើសពីឆ្នាំកន្លងទៅ៩ ទូក មានកីឡាករចំណុះទូកជាង ២ ម៉ឺននាក់ និងប្រទីបចំនួន ៣៥ ប្រទីប ខណៈឆ្នាំ ២០២៣ មានចំនួនត្រឹមតែ ២៩ ប្រទីបប៉ុណ្ណោះ៕
