តិរច្ឆានមែន ចាប់ខ្លួនកូនបង្កើត និងបក្សពួក ក្រោយធ្វើសកម្មភាពកាប់ឪពុកបង្កើតដើម្បីលួចយកម៉ូតូ
កម្លាំងនគរបាលស្រុកសំរោងទង ធ្វើការឃាត់ខ្លួនជនសង្ស័យចំនួនពីរនាក់ ក្នុងនោះមានម្នាក់ជាកូនបង្កើតរបស់ជនរងគ្រោះ បន្ទាប់ពីចូលលួចម៉ូតូ និងកាប់ទៅលើឪពុកខ្លួនបណ្ដាលឲ្យរងរបួសតាមផែនការដែលរៀចំទុក ខណៈម្នាក់ទៀតយកម៉ូតូគេចខ្លួនបាត់។
ករណីកូនបង្កើតរៀបចំផែនការលួចម៉ូតូឪពុក រហូតឈានដល់កាប់លើឪពុកខ្លួនរងរបួសនេះ បានកើតឡើងកាលពីវេលាម៉ោង១និង១៥នាទីយប់រំលងអធ្រាត្រ ឈានចូលថៃ្ងទី២៦ ខែតុលា ឆ្នាំ២០២៤ នៅភូមិស្រែកក់ ឃុំរលាំងចក ស្រុកសំរោងទង ខេត្ដកំពង់ស្ពឺ។
តាមរបាយការណ៍សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនរួមមាន៖ ទី១ ឈ្មោះ តោ ភក្រ្តា ភេទប្រុស អាយុ២២ឆ្នាំ (កូនបង្កើតជនរងគ្រោះ) និងទី២ ឈ្មោះ ផល ឆើត ហៅ ប៉ៃ ភេទប្រុស អាយុ១៨ឆ្នាំ រស់នៅភូមិស្រែកក់ ឃុំរលាំងចក ស្រុកសំរោងទង និងម្នាក់ទៀតឈ្មោះ ស៊ិន សាម៉េត ហៅ ហួ ភេទប្រុស អាយុ២១ឆ្នាំ(គេចខ្លួន)។ ចំណែកជនរងគ្រោះមានឈ្មោះ ញៀន តុល ភេទប្រុស អាយុ៤៥ឆ្នាំ រងរបួសក្បាលផ្នែកខាងលើចិញ្ចើម ដោយសារកូនបង្កើតខ្លួនឯងកាប់ដោយកាំបិត ពេលបក្ខពួកខ្លួនចូលមកគាស់ទ្វារលួចម៉ូតូ។
ម៉ូតូដែលត្រូវជនសង្ស័យយកទៅបាត់នោះម៉ាក ហុងដា សេ១២៥ ពណ៌ខ្មៅ សេរីឆ្នាំ២០០៨ ឡើងតែម ២០១៥ ពាក់ផ្លាកលេខ កំពង់ស្ពឺ1C.6908 ។
នៅចំពោះមុខសមត្ថកិច្ចជនសង្ស័យឈ្មោះ តោ ភក្រ្តា ដែលជាកូនបង្កើតរបស់ជនរងគ្រោះបានសារភាពថា ខ្លួននិងបក្ខពួក២នាក់ទៀតបានចូលមកលួចយកម៉ូតូរបស់ឪពុកពិតប្រាកដមែន ខណៈដែលបក្ខកំពុងធ្វើសកម្មភាពចូលលួច ឪពុករបស់ខ្លួនក៏បានភ្ញាក់ដឹងខ្លួន និងបានមកចាប់ទាញម៉ូតូ ពេលនោះដើម្បីកុំអោយខូចផែនការ ខ្លួនបានទាញកាំបិតកាចែតកាប់វាយប្រហារទៅលើលោកឪពុកតែម្ដង រួចបក្ខពួកបានយកម៉ូតូចេញផុតពីទីកន្លែងកើតហេតុគេចបាត់។
បច្ចុប្បន្នសមត្ថកិច្ចបានបន្ដនីតិវិធីសហការស្រាវជ្រាវដើម្បីឃាត់អ្នកពាក់ព័ន្ធ និងបានកសាងសំណុំរឿងបញ្ជូនបន្ដទៅការិយាល័យខេត្ត៕
