យុវសិស្សជនជាតិដើមភាគតិចចំនួន២៥នាក់ ទទួលអាហារូបករណ៍ ដើម្បីសិក្សានៅកម្រិតមធ្យមសិក្សា និងឧត្តមសិក្សា តាមរយៈគម្រោងរេដបូកកែវសីមា
មណ្ឌលគិរី៖ គម្រោងរេដបូកកែវសីមា ដែលអនុវត្តដោយអង្គការសមាគមអភិរក្សសត្វព្រៃ (WCS) ក្រោមកិច្ចសហការជាមួយក្រសួងបរិស្ថានបានផ្តល់អាហារូបករណ៍ ដល់សិស្សក្រីក្រជនជាតិដើមភាគតិចចំនួន២៥នាក់ ដើម្បីបន្តសិក្សា នៅថ្នាក់វិទ្យាល័យ និងសាកលវិទ្យាល័យ។
មូលនិធិបានមកពីលក់ឥណទានកាបូនព្រៃឈើនៅដែនជម្រកសត្វព្រៃកែវសីមា ត្រូវបានប្រើប្រាស់នៅក្នុងការផ្គត់ផ្គង់ការសិក្សារបស់ពួកគេ។ ក្នុងចំណោមសិស្សទាំងនោះរួមមាន សិស្សអាហារូបករណ៍ថ្នាក់សាកលវិទ្យាល័យនៅរាជធានីភ្នំពេញចំនួន ៥នាក់ និងសិស្សអាហារូបករណ៍ថ្នាក់វិទ្យាល័យចំនួន ២០នាក់កំពុងសិក្សានៅវិទ្យាល័យ ហ៊ុន សែន កែវសីមា។
ថ្លែងប្រាប់ក្រុមអ្នកសារព័ត៌មានក្នុងដំណើរទស្សនកិច្ចទៅគម្រោងរេដបូកកែវសីមា កាលពីពេលថ្មីៗ លោក នេត វិបុល នាយករងអង្គការ WCS បានថ្លែងថា អង្គការ CCI ជាដៃគូដែលទទួលថវិកាពីគម្រោងបានចុះទៅផ្សព្វផ្សាយដល់សហគមន៍ស្ថិតក្នុងគម្រោងរេដបូកកែវសីមាពីការផ្តល់អាហារូបករណ៍និងជំនាញវិជ្ជាជីវៈនេះ។
លោកបញ្ជាក់ថា៖ «អង្គការដៃគូយើងចុះទៅប្រកាសពីលក្ខខន្តិកៈ ពីលក្ខណៈសម្បត្តិផ្សេងៗបិតនៅតាមសាលាឃុំ ចុះជ្រើសរើស យើងពិនិត្យមើលថាសិស្សហ្នឹងពិតជាជនជាតិដើមភាគតិចនៅមូលដ្ឋានហ្នឹងពិតមែន ហើយគាត់ពិតជាក្រីក្រមិនមានលទ្ធភាពរៀនទេ»។
លោក វិបុល បន្តថា និស្សិតដែលសិក្សានៅភ្នំពេញបានចាប់ផ្តើមចុះធ្វើកម្មសិក្សាជាមួយនឹងអង្គការដៃគូ ស្ថាប័នមួយចំនួន និងនៅគម្រោងរេដបូកកែវសីមានេះផ្ទាល់តែម្តងក្នុងផ្នែកចុះបញ្ជីដីធ្លីសហគមន៍។
លោកបន្ថែមថា «ប្រសិនបើគាត់មិនមានការងារ ចង់មិនចង់គឺគាត់ត្រូវតែរកចំណូលតាមរយៈការចូលទៅក្នុងតំបន់ការពារធម្មជាតិ ដើម្បីប្រមូលអនុផលព្រៃឈើ និងពេលខ្លះគាត់ធ្វើសកម្មភាពមួយចំនួនដូចជាបរបាញ់សត្វ ឬកាប់ឈើ តែពេលគាត់មានការងារវិជ្ជាជីវៈច្បាស់លាស់គាត់រកចំណូលជាសកម្មភាពស្របច្បាប់ហើយចូលរួមចំណែកក្នុងការពារធនធានធម្មជាតិក្នុងតំបន់រេដបូកកែវសីមា»។
កញ្ញា សំអែល សុភាព អ្នកគ្រប់គ្រងសិស្សអាហារូបករណ៍ (KSWS) នៃវិទ្យាល័យ ហ៊ុន សែន កែវសីមា បានឱ្យដឹងថា ការផ្តល់អាហារូបករណ៍នេះ គឺជាលើកទី១ និងបានចាប់ផ្តើមកាលពីឆ្នាំ ២០២៣ កន្លងមក។ សម្រាប់ថ្នាក់វិទ្យាល័យ សិស្សទទួលបានអាហារូបករណ៍រហូតដល់ចប់ថ្នាក់ទី១២។ ក្នុងនោះមាន ការថែរក្សាសុខភាព កន្លែងស្នាក់នៅសម្ភារសិក្សា អាហារបរិភោគ សំលៀកបំពាក់និងថ្លៃធ្វើដំណើរជាដើម។
កញ្ញាថា «គម្រោងជួយសិស្សមានជីវភាពខ្វះខាតខ្លាំងនៅតំបន់ដាច់ស្រយាល ក្មេងកំព្រា ឳពុកម្តាយចាស់ជរាដែលមិនអាចផ្គត់ផ្គង់ការសិក្សាកូនបាន។ បើយើងមិនបានជួយទេ គាត់អាចបោះបង់ការសិក្សា»។
នាថ សូរីយ៉ា ជាជនជាតិដើមភាគតិច មកពីភូមិស្រែប្រាស់ រៀននៅថ្នាក់ទី១០B នៃវិទ្យាល័យ ហ៊ុន សែន កែវសីមា
បានអោយដឹងថា អាហារូបករណ៍ពិតជាមានសារៈសំខាន់ណាស់សម្រាប់ខ្លួនប្អូនស្រីផ្ទាល់ដែលជាជនជាតិដើមភាគតិច ព្រោះអាហារូបករណ៍បានផ្ដល់នូវឱកាសសម្រាប់សិក្សាដល់អ្នកដែលមិនមានលទ្ធភាពសិក្សាគាត់អាចមកបន្តសិក្សាបាន។
យុវសិស្ស នាថ សូរីយ៉ា បានបញ្ជាក់ថា នៅពេលប្អូនស្រី រៀនចប់ថ្នាក់ទី១២ ប្អូនស្រីមានគម្រោងថានឹងស្នើសុំការសិក្សាបន្តទៅដល់មហាវិទ្យាល័យបន្តទៀត។
អ្នកនាំពាក្យក្រសួងបរិស្ថានលោក ខ្វៃ អាទិត្យា លើកឡើងថា គម្រោងនេះពិតជាមានសារៈសំខាន់ ជាពិសេសជំរុញឱ្យកូនចៅជនជាតិដើមភាគតិច ដែលមានវប្បធម៌រស់នៅពឹងផ្អែកលើធម្មជាតិ មានជម្រើសថ្មីក្នុងការកាត់ផ្តាច់ជាបណ្តើៗក្នុងការពឹងអាស្រ័យលើធនធានធម្មជាតិ។
លោកមានប្រសាសន៍ថា៖ «កន្លងមក គាត់រស់នៅក្នុងតំបន់ការពារធម្មជាតិគ្មានអីជាងការពឹងពាក់លើអនុផលព្រៃឈើ ឬក៏ទាញយកប្រយោជន៏ពីព្រៃឈើនោះទេ។ អញ្ជឹងដោយមានការគាំទ្រពីក្រសួងបរិស្ថាន គម្រោងត្រូវបានអនុវត្តនិងជួយដល់ពលរដ្ឋកុំឱ្យពឹងផ្អែកលើការចូលព្រៃ»។
លោកបន្ថែមថា ក្រសួងបរិស្ថាន ដោយមានការចូលរួមពីដៃគូតែងតែលើកទឹកចិត្តឱ្យមានការផ្តល់ការសិក្សា ក៏ដូចជាការបណ្តុះបណ្តាលជំនាញវិជ្ជាជីវៈដល់ជនជាតិដើមភាគតិច ដើម្បីឱ្យពួកគាត់មានចំណេះដឹង អាចរកចំណូលចិញ្ចឹមជីវភាពគ្រួសារបាន។
សូមបញ្ជាក់ផងដែរថា គម្រោងរេដបូកកែវសីមា បានចាប់ផ្តើម កាលពីឆ្នាំ២០១០ និងកំពុងតែអនុវត្តលើផ្ទៃដីព្រៃទំហំ ១៦៦ ៩៨៣ហិកតា ក្នុងចំណោមផ្ទៃដីជាង ៣០០ ០០០ហិកតានៃដែនជម្រកសត្វព្រៃកែវសីមា៕
