ក្រសួងបរិស្ថានរៀបចំសិក្ខាសាលាតម្រង់ទិស ការសរសេរព័ត៌មានពីការប្រែប្រួលអាកាសធាតុដល់ក្រុមអ្នកសារព័ត៌មាន
ភ្នំពេញ៖ ដើម្បីពង្រឹង និងអភិវឌ្ឍន៍សមត្ថភាពដល់អ្នកជំនាញសារព័ត៌មាន និងវិស័យឯកជន និងផ្តល់វេទិកាពិភាក្សារវាងវិស័យឯកជន និងស្ថាប័នពាក់ព័ន្ធឱ្យមានការយល់ដឹងនិងផ្សព្វផ្សាយពីការប្រែប្រួលអាកាសធាតុ ក្រសួងបរិស្ថានបានរៀបចំសិក្ខាសាលារយៈពេល ៣ ថ្ងៃ ដើម្បីតម្រង់ទិសនិងបញ្រ្ជាបការយល់ដឹងស៊ីជ្រៅលើទម្រង់ការសរសេរព័ត៌មានពាក់ព័ន្ធការប្រែប្រួលអាកាសធាតុ។
ថ្លែងក្នុងពិធីបើកសិក្ខាសាលា ស្តីពីការអភិវឌ្ឍន៍សមត្ថភាពរបស់អ្នកសារព័ត៌មានពីការប្រែប្រួលអាកាសធាតុនាថ្ងៃទី២៥ កញ្ញា លោក ជួប ប៉ារីស៍ រដ្ឋលេខាធិការក្រសួងបរិស្ថាន បានថ្លែងថា កន្លងមកយន្តការផ្សព្វផ្សាយដល់សាធារណជនឲ្យបានជ្រាបស្តីពីការប្រែប្រួលអាកាសធាតុនៅមានកម្រិត។ លោកថា វេទិកាពិភាក្សាតុមូលរវាងវិស័យឯក និងអ្នកសារពត៌មាន ស្តីពីការប្រែប្រួលអាកាសធាតុមានសារសំខាន់ណាស់ ដើម្បីសម្របសម្រួលកិច្ចសន្ទនា កិច្ចពិភាក្សាតុមូលបានប្រមូលធាតុចូលពីវិស័យឯកជន ដើម្បីរៀបចំជាគោលនយោបាយ និងផែនការយុទ្ធសាស្ត្រផ្សេងៗរបស់រាជរដ្ឋាភិបាលកម្ពុជា។
លោកថា សិក្ខាសាលារយៈពេល ៣ ថ្ងៃនេះ អ្នកជំនាញសារព័ត៌មាន និងវិស័យឯកជននឹងទទួលបាននូវចំណេះដឹង និងជំនាញប្រាស្រ័យទាក់ទងប្រកបដោយវិជ្ជាជីវៈប្រកបដោយប្រសិទ្ធភាពនូវការផ្សព្វផ្សាយព័ត៌មាន ដែលពាក់ពន្ធ័ទៅនឹងការប្រែប្រួលអាកាសធាតុ និងរាប់បញ្ចូលបរិយាប័ន្នសង្គម និងសមភាពយេនឌ័រ (GESI) របៀបតែងអត្ថបទ និងរបៀបរាយការណ៍អំពីផលប៉ះពាល់នៃការប្រែប្រួលអាកាសធាតុ ក្នុងទម្រង់ប្រព័ន្ធផ្សព្វផ្សាយពត៌មាន។ ជាពិសេសការផ្សព្វផ្សាយរបាយការណ៍អំពីការប្រែប្រួលអាកាសធាតុ ក្នុងប្រព័ន្ធផ្សព្វផ្សាយពត៌មានសាធារណៈ និងការយល់ដឹងអំពីភាពងាយរងគ្រោះតាមវិស័យអាទិភាពដូចជា កសិកម្ម វិស័យធនធានទឹក និងហេដ្ឋារចនាសម្ព័ន្ធជាដើម។
លោក ខ្វៃ អាទិត្យា អ្នកនាំពាក្យក្រសួងបរិស្ថាន បានចែករំលែកពីរបៀបរាយការណ៍និងសរសេរអត្ថបទអំពីប្រែប្រួលអាកាសធាតុក្នុងទម្រង់ប្រព័ន្ធផ្សព្វផ្សាយព័ត៌មាន។ លោកថា” ការសរសេរព័ត៌មានអំពីការប្រែប្រួលអាកាសធាតុត្រូវមានធាតុផ្សំសំខាន់ៗដូចជា ការចេះស្វែងរកពាក្យគន្លឹះ ការចេះស្រាវជ្រាវស្វែងរកប្រភពដែលអាចទុកចិត្តបាន ការរៀបចំផែនការអត្ថបទចំណុចសំខាន់ៗ ការរៀបចំសេចក្តីព្រាង រួមទាំងការធ្វើការកែតម្រូវចាំបាច់ណាមួយ”។
ដោយឡែក លោក ស្លេះ អាល់ហ្វីន អនុរដ្ឋលេខាធិការក្រសួងព័ត៌មាន បានមើលឃើញពីកង្វះខាតអ្នកសារព័ត៌មានជំនាញបរិស្ថាន។ លោកថា «បើសិនអ្នកព័ត៌មានខ្វះការយល់ដឹងពីបរិស្ថាន តើអាចសរសេរអត្ថបទទៅពលរដ្ឋ ឬសាធារណៈយល់ដោយរបៀបណាទៅ? ការសរសេរព័ត៌មានផ្នែកបរិស្ថាន ទាមទារការស្វែងយល់ពាក្យបច្ចេកវិទ្យា រួមទាំងផ្នែកវិទ្យាសាស្ត្រជាមុនសិន៕