ប្រធានសហភាពពលកម្មជាតិកម្ពុជា បានប្រកាសគាំទ្រយ៉ាងពេញទំហឹង ចំពោះការដកខ្លួនចេញពីគម្រោង CLV
ភ្នំពេញ៖ ប្រធានសហភាពពលកម្មជាតិកម្ពុជា បានប្រកាសគាំទ្រយ៉ាងពេញទំហឹង ចំពោះការសម្រេចចិត្តដ៏ឈ្លាសវៃ របស់សម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចធិបតី ហ៊ុន ម៉ាណែត នាយករដ្ឋមន្ត្រី ដែលបានដកខ្លួនចេញពីគម្រោង អភិវឌ្ឍតំបន់ត្រីកោណ កម្ពុជា-ឡាវ-វៀតណាម (CLV) ។
លោក សំ សឿន ប្រធានសហភាពពលកម្មជាតិកម្ពុជា បានលើកឡើងថា កន្លងទៅនេះក្រុមជ្រុលនិយម បានចាប់យកចំណុចនេះ ធ្វើជាអាវុធនយោបាយ ដើម្បីមួលបង្កាច់ និងវាយប្រហារចំពោះរាជរដ្ឋាភិបាល ដោយការភូតកុហកឥតឈប់ឈរ ធ្វើឱ្យប្រជាជនមួយចំនួនមានការភាន់ច្រឡំ។
លោកបានអោយដឹងថា «ក្នុងនាមខ្ញុំជាមេដឹកនាំសហជីព សូមគាំទ្រទាំងស្រុងនូវការសម្រេចចិត្តដ៏ត្រឹមត្រូវនេះ ព្រោះការសម្រេចចិត្តរបស់ថ្នាក់ដឹកនាំ ពិតជាបានពិចារណាយ៉ាងច្បាស់លាស់ និងប្រកាន់ជំហរសាមគ្គីភាព បូរណភាពទឹកដីរបស់យើង»។
ជាមួយគ្នានេះដែរកាលពីថ្ងៃទី២៣ ខែកញ្ញា លោក សំ សឿន ព្រមទាំងក្រុមការងារ សហភាពពលកម្មជាតិកម្ពុជា NLC និងក្រុមការងារសប្បុរសធម៌ តំណាងដោយ លោក សៀ គីមឆាយ បានយកសម្ភារៈសិក្សាចែកជូនដល់សិស្សានុសិស្សចំនួន៤០០នាក់ នៅសាលាបឋមសិក្សា ដាក់ដាំ ស្ថិតនៅឃុំដាក់ដាំ ស្រុកអ៊ូររាំង ខេត្តមណ្ឌលគិរី។
សម្ភារៈសិក្សា អាវក្មេងសិស្សទី១ និងទី២ ចំនួន ២០០អាវ, សម្ភារៈសិក្សាសម្រាប់សិស្សសរុបចំនួន ៤០០ឈុត មានដូចជា៖ កាតាប ប៊ិក២ដេីម ខ្មៅដៃ២ដេីម ជ័រលុប និងបន្ទាត់ កន្សែងពោះគោ ១, ថវិការចំនួន ៥០០០រៀល ដល់សិស្សចំនួន៤០០នាក់ =២០០០០០០៛, លោកគ្រូ អ្នកគ្រូ ចំនួន ១១នាក់ ទទួលសាក់កាដូរមួយ កន្សែងពោះគោ និងថវិការ ៥០០០០រៀល/នាក់, ជូនកុំព្យូទ័រ និងម៉ាស៊ីនព្រីនធ័រ ១ឈុត ក្រដាស់ ដល់សាលាសម្រាប់ប្រេីប្រាស់, ថវិការចំនួន ១លានរៀល ព្រមទាំងកងកម្លាំងមូលដ្ឋានដែលបានចូលរួមចំនួន ៧រូប ក្នុងមួយរូប សាក់កាដូរមួយ កន្សែង និងថវិការចំនួន ៥០០០០រៀល។
សម្តេចតេជោ ហ៊ុន សែន ក្នុងនាមប្រធានគណបក្សប្រជាជនកម្ពុជា និងសម្តេចធិបតីនាយករដ្ឋមន្ត្រី ព្រមទាំងថ្នាក់ដឹកនាំផ្សេងៗទៀត នៅយប់ថ្ងៃទី២០ ខែកញ្ញា ឆ្នាំ២០២៤ នេះ បានប្រកាសពីការសម្រេចរបស់កម្ពុជា ក្នុងការបញ្ចប់ការចូលរួម ក្នុងតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV-DTA) ចាប់ពីថ្ងៃ២០ ខែកញ្ញា ឆ្នាំ២០២៤នេះតទៅ។ការបញ្ចប់នេះសម្តេចតេជោ ហ៊ុន សែន បានសង្កត់ធ្ងន់ថា ដើម្បី «ដកអាវុធចេញពីដៃពួកជ្រុលនិយម» កុំឲ្យមានលទ្ធភាពញុះញង់បោកប្រាស់ប្រជាជនកម្ពុជាតទៅទៀត៕
