WCS ប្រកាសពីភាពជោគជ័យកូនត្រយងយក្សពីរក្បាល ដែលហើរចេញពីសម្បុកដោយជោគជ័យពីដែនជម្រកសត្វព្រៃកែវសីមា

កូនត្រយងយក្សពីរក្បាល បានហើរចេញពីសម្បុកដោយជោគជ័យពីតំបន់ការពារសម្បុកសត្វស្លាប ក្នុងដែនជម្រកសត្វព្រៃកែវសីមា។ នេះបើយោងតាមទំព័រហ្វេសបុករបស់អង្គការ WCS។

WCS រាយការណ៍ថា នៅរដូវបង្កកំណើតក្នុងឆ្នាំ២០២៤នេះ ដោយមានការចូលរួមពីប្រជាសហគមន៍មូលដ្ឋានក្នុងការការពារសម្បុកសត្វស្លាប សត្វត្រយងយក្សចំនួនបួនក្បាលត្រូវបានរកឃើញនៅទីតាំងការពារសម្បុកសត្វស្លាបនៅក្នុងដែនជម្រកសត្វព្រៃកែវសីមា ក្នុងនោះមានសត្វត្រយងយក្សពេញវ័យចំនួន ២ក្បាល និងកូនត្រយងយក្សចំនួន ២ក្បាល។

ជារៀងរាល់ឆ្នាំ ចាប់ពីខែឧសភា ដល់ខែកញ្ញា យើងតែងតែឃើញវត្តមានសត្វត្រយងយក្សមកធ្វើសម្បុក និងបង្កកំណើតនៅទីតាំងការពារសម្បុកសត្វស្លាប ដែលមានសហគមន៍ប្រចាំការយាមសម្បុកសត្វទាំងនោះរហូតដល់ពេលពួកគេធំលូតលាស់ និងហើរចេញពីសម្បុក។ ជាក់ស្តែង កូនត្រយងយក្សដែលទើបនឹងកើតចំនួន ២ក្បាល បានហើរចេញពីសម្បុកដោយជោគជ័យនាដើមខែកញ្ញា ឆ្នាំ២០២៤នេះ។

សមិទ្ធិផលនេះបញ្ជាក់ពីជោគជ័យដ៏គួរអោយកត់សម្គាល់របស់សហគមន៍មូលដ្ឋាន លើកិច្ចការងារអភិរក្សសត្វព្រៃ និងធនធានធម្មជាតិក្នុងតំបន់ ដោយមានការគាំទ្រពីអង្គការសមាគមអភិរក្សសត្វព្រៃប្រចាំកម្ពុជា WCS Cambodia តាមរយៈគម្រោងរេដបូក កែវសីមា I Keo Seima REDD+ និងគម្រោង USAID Morodok Baitang-មរតកបៃតង លើកម្មវិធីការពារសម្បុកសត្វស្លាបដែលយើងបានអនុវត្តចាប់ពីឆ្នាំ២០១៩ មកម៉្លេស។

ការចូលរួមរបស់សហគមន៍បានបង្ហាញពីការប្តេជ្ញាចិត្តរបស់ពួកគេលើការការពារសត្វព្រៃ និងការគ្រប់គ្រងធនធានធម្មជាតិ ដែលជាផ្នែកមួយដ៏សំខាន់សម្រាប់ការរស់នៅ និងជាអត្ថសញ្ញាណរបស់បងប្អូនជនជាតិដើមភាគតិច ដែលមានប្រពៃណី វប្បធម៌ផ្សាភ្ជាប់ជាមួយនឹងធម្មជាតិ។

នេះជាឆ្នាំទីប្រាំមួយហើយដែលសហគមន៍បានចូលរួមជាមួយគម្រោងក្នុងការងារការពារសម្បុកសត្វស្លាប ហើយយើងនឹងបន្តផ្សព្វផ្សាយកម្មវិធីការពារសម្បុកសត្វស្លាបនេះអោយបានទូលំទូលាយ ជាមួយនឹងការជំរុញសហគមន៍ និងអជ្ញាធរមូលដ្ឋានក្នុងការចូលរួមចំណែកលើការងារអភិរក្សសត្វព្រៃជាមួយពួកយើង។

សូមអ្នកទាំងអស់គ្នាចូលរួមការពារធនធានធម្មជាតិដ៏មានតំលៃរបស់យើង ដោយចៀសវាងការកាប់បំផ្លាញព្រៃឈើ ការរានដីព្រៃខុសច្បាប់ ការបរបាញ់សត្វព្រៃ និងដាក់អន្ទាក់ជាដើម ល។ ការសហការរួមគ្នា មានសារៈសំខាន់ណាស់សម្រាប់ការអភិរក្សសត្វព្រៃ និងបវិស្ថានធម្មជាតិរបស់យើង៕