អ្នកនាំពាក្យក្រសួងបរិស្ថានលើកទឹកចិត្តពលរដ្ឋចូលរួមរក្សាអនាម័យ និង កាត់បន្ថយការប្រើប្រាស់ថង់ប្លាស្ទិកនៅរដូវបុណ្យកាន់បិណ្ឌ និងភ្ជុំបិណ្ឌ

ភ្នំពេញ៖ ខណៈដែលប្រជាជនកម្ពុជាកំពុងតែប្រារព្ធពិធីកាន់បិណ្ឌ និងពិធីភ្ជុំបិណ្ឌ ក្រសួងបរិស្ថានបានលើកទឹកចិត្តឱ្យពលរដ្ឋ និងពុទ្ធបរិស័ទចូលរួមរក្សាអនាម័យនៅតាមគេហដ្ឋាន ភូមិឋាន ទីធ្លាសាធារណៈ ទីវត្តអារាម ដោយរួមគ្នាកាត់បន្ថយការប្រើប្រាស់ថង់ប្លាស្ទិក ដើម្បីរួមគ្នាថែរក្សាបរិស្ថានស្អាតនៅកម្ពុជា។

ថ្លែងនៅថ្ងៃទី១៨ ខែកញ្ញា ឆ្នាំ ២០២៤នេះ លោក ខ្វៃ អាទិត្យា អ្នកនាំពាក្យក្រសួងបរិស្ថាន ឱ្យដឹងថា ដើម្បីភាពស្រស់ស្អាត បរិស្ថានល្អ និងពិសេសនោះការចូលរួមថែរក្សាអនាម័យល្អទាំងតាមលំនៅឋាន ទីវត្តអារាម និងទីសាធារណៈនោះ ពលរដ្ឋត្រូវរួមគ្នាថែរក្សាអនាម័យបរិស្ថាន ប្រមូលទុកដាក់សំរាមឱ្យបានត្រឹមត្រូវ ដោយមិនត្រូវចោលសំរាម និងថង់ប្លាស្ទិកពាសវាលកាល   ដែលនាំឱ្យ ប៉ះពាល់ដល់បរិស្ថានទេ នៅបង្កឱ្យប៉ះពាល់ដល់សុខភាពមនុស្ស សត្វ ថែមទៀត។

លោក ខ្វៃ អាទិត្យា បានអោយដឹងថា” ការចូលរួមអនុវត្តអនាម័យ និងកាត់បន្ថយការប្រើប្រាស់ថង់ប្លាស្ទិករបស់ប្រជាពលរដ្ឋនៅតាមទីសាធារណៈ និងទីវត្តអារាម នឹងធ្វើឱ្យវត្តអារាម មានសោភ័ណភាព ស្រស់ស្អាត មិនមានសំរាមប្លាស្ទិកត្រូវបានបោះចោលពាសវាលពាសកាលជាដើម”។

មន្រ្តីអ្នកនាំពាក្យរូបនេះបានបញ្ជាក់បន្ថែមថា កាលណាប្រជាពលរដ្ឋចូលរួមទាំងអស់ ពីការកាត់បន្ថយប្រើប្រាស់ថង់ប្លាស្ទិក នឹងធ្វើភូមិឋានយើងស្អាត វត្តអារាមយើងស្អាត មិនមានការបំពុលដោយថង់ប្លាស្ទិកនោះនឹងធ្វើឱ្យកម្ពុជាយើងស្អាត។

អ្នកនាំពាក្យរូបនេះបន្ថែម ថា សំណល់សំរាមនិងប្លាស្ទិកមិនមែន ជាបញ្ហារបស់កម្ពុជាទេ គឺជាបញ្ហាសកល។ សំណល់ទាំងនេះ បានបំពុលទៅដល់ មិនត្រឹមតែមនុស្សយើងទេ ប៉ុន្តែបំពុលទាំងធនធានធម្មជាតិ និងជីវចម្រុះនៅលើគោក និងក្នុងទឹក។ចំនួនសំរាមនៅលើសកលលោកបានកើនឡើងជាបន្តបន្តាប់ដែលបង្កប៉ះពាល់ដល់សុខភាពសាធារណៈជាចម្បង។ កន្លងមកនេះក្រសួងបរិស្ថាន បានបើកយុទ្ធនាការថ្ងៃនេះ មិនប្រើថង់ប្លាស្ទិកទេ ដោយក្នុងនេះមានពលរដ្ឋ ចូលរួមប្តេជ្ញាចិត្តមិនប្រើប្រាស់ថង់ប្លាស្ទិក ជាង៩លាន៥សែននាក់ និងជំហានទី២ បានដាក់ចេញយុទ្ធនាការ ”កម្ពុជាស្អាតខ្មែរធ្វើបាន”ដោយក្នុងនេះមានមនុស្សជិត៣លាននាក់បានចូលរួម។

ក្នុងពិធីបុណ្យកាន់បិណ្ឌ និងពិធីបុណ្យភ្ជុំបិណ្ឌនេះដែរ មន្រ្តីអ្នកនាំពាក្យក្រសួងបរិស្ថាន លោក ខ្វៃ អាទិត្យា បានលើកឡើង ដោយបញ្ជាក់ថា”ពលរដ្ឋដែលអញ្ជើញទៅវត្តអារាមនានា ឬអញ្ជើញទៅផ្សារ អាចប្រើប្រាស់កន្រ្តកបរិស្ថាន ឬសម្ភារដែលអាចប្រើប្រាស់បានច្រើនដង ដើម្បីចូលរួមកាត់បន្ថយប្លាស្ទិក ចូលរួមលើកសោភ័ណភាពប្រទេសកម្ពុជាឱ្យបានគ្រប់ទីកន្លែងក្នុងពិធីបុណ្យភ្ជុំបិណ្ឌនេះ។

ឆ្លៀតក្នុងឱកាសនោះដែរ លោក ខ្វៃ អាទិត្យា ក៏បានជូនពរដល់បងប្អូនប្រជាពលរដ្ឋខ្មែរគ្រប់ទិសទីដែលធ្វើដំណើរនៅក្នុងឱកាសពិធីបុណ្យដាក់បិណ្ឌ និងភ្ជុំបិណ្ឌ សូមឱ្យមានសុខសុវត្ថិភាព គ្រប់ៗគ្នា៕