សង្វៀន ផោវើរេម គុនខ្មែរ នឹងបំពេញចិត្តអ្នកគាំទ្រប្រដាល់ទូទាំងប្រទេស ខណៈថោននឹងស្វែងរកគូល្អៗមកប្រកួត
ក្នុងឱកាសបើកសង្វៀនថ្មី ផោវើរេមគុនខ្មែរ នាយកគ្រប់គ្រងការផ្សាយរបស់ស្ថានីយ៍ទូរទស្សន៍ថោន ចាត់ទុក កម្មវិធី ផោវើរេម គុនខ្មែរ នឹងបំពេញចិត្តអ្នកគាំទ្រប្រដាល់ទូទាំងប្រទេស ខណៈស្ថានីយ៍ទូរទស្សន៍ថោននឹងខិតខំស្វែងរកគូល្អៗមកប្រកួតបំពេញតាមការចង់បានរបស់មហាជន។
ថ្លែងនៅក្នុងសន្និសិទកាសែត ស្តីពីការប្រកួត ផោវើរេម គុនខ្មែរ លោកហាក់ សុខហេង នាយកគ្រប់គ្រងការផ្សាយស្ថានីយ៍ទូរទស្សន៍ថោន បានអោយដឹងថា ការប្រកួតរៀងរាល់ថ្ងៃពុធ ដូច្នេះរៀងរាល់ថ្ងៃពុធគឺអ្នកគាំទ្រលែងអផ្សុកហើយ បានទស្សនាការប្រកួតប្រដាល់។ លោកសង្ឃឹមថា អ្នកគាំទ្រគុនខ្មែរទូទាំងប្រទេស នឹងធ្វើការបន្តគាំទ្រ និងជឿទុកចិត្តលើស្ថានីយមួយនេះ ហើយឥឡូវនេះមានកម្មវិធីថ្មីដែលមានភេសជ្ជៈប៉ូវកម្លាំង Powaram មកលូកដៃចូលគុនខ្មែរបន្ថែមទៀតដូច្នេះនឹងធ្វើមានកម្មវិធីកាន់តែច្រើនបន្ថែមទៀត។
ដោយឡែកលោកមាស វុត្ថា នាយកផ្នែកពាណិជ្ជកម្ម Powaram សន្យាថានឹងបំពេញតាមការចង់បានរបស់បងប្អូនអ្នកគាំទ្រគុនខ្មែរ ប្រសិនបើអ្នកគាំទ្រចង់មើលគូណាហើយគូនេះមានការគាំទ្រខ្លាំងជាងគេក្រុមហ៊ុនមិនខ្លាចក្នុងការបំពេញតាមការចង់បានរបស់អ្នកគាំទ្រគុនខ្មែរឡើយ។
លោកថា ភេសជ្ជៈប៉ូវកម្លាំងរបស់យើងរចនាឡើងដើម្បីផ្តល់នូវថាមពលដល់អត្តពលិក និងមនុស្សគ្រប់គ្នាដែលត្រូវការអ្វីដែលល្អបំផុតសម្រាប់ខ្លួនឯង។ តាមរយៈការឧបត្ថម្ភក្នុងព្រឹត្តិការណ៍ប្រដាល់ដ៏មហោឡារិកនេះ ក្នុងគោលបំណងដើម្បីបង្ហាញពីថាមពលនៃផលិតផលរបស់យើងនិងការពង្រឹងសមត្ថភាពផងដែរ។
លោកបន្តថា យើងជឿជាក់ថាភាពជាដៃគូរនេះមិនត្រឹមតែផ្តល់នូវអារម្មណ៍រំភើបចំពោះ [ផោវើរេម គុនខ្មែរ] ប៉ុណ្ណោះទេប៉ុន្តែថែមទាំងណែនាំនូវភេសជ្ជៈប៉ូវកម្លាំងរបស់យើងទៅកាន់អ្នកដែលចូលចិត្តកីឡា និងអតិថិជនគោលដៅទៀតផង។ យើងនឹងបង្កើតនូវបទពិសោធន៍ដែលបំភ្លេចមិនបាន ក្នុងការប្រារព្ធការប្រកួតដ៏ជក់ចិត្តនិងអានុភាពឆ្ពោះទៅភាពជោគជ័យ។ ភេសជ្ជៈប៉ូវកម្លាំងផោវើរេម ក៏បានឈ្នះនូវមេដាយមាសកម្រិតពិភពលោក ក៏ផ្សារភ្ជាប់ជ័យលាភីនេះទៅកីឡាករគ្រប់ៗរូបដោយសង្ឃឹមយ៉ាងមុតមាំថា នាឳកាសណាមួយនាការប្រកួតពេលខាងមុខ បងប្អូនកីឡាករនឹងទទួលបានជ័យលាភីមេដាយមាសដូចភេសជ្ជៈប៉ូវកម្លាំងផោវើរេមដែរ។
ដោយឡែកលោក ខូវ ឆាយ ប្រធានសហព័ន្ធប្រដាល់គុនខ្មែរ បានអោយដឹងថា ការបន្ថែមនៃសង្វៀននេះគឺបង្ហាញឲ្យឃើញកាន់តែច្បាស់ពីភាពរីកចម្រើនរបស់វិស័យគុនខ្មែរទៅកាន់អន្តរជាតិ។ វិស័យប្រដាល់គុនខ្មែរ គឺជាសិល្បៈក្បាច់មួយដែលជាអត្តសញ្ញាណខ្មែរ ពាក្យថាគុនខ្មែរគឺបង្កើតឡើងដោយជនជាតិខ្មែរ។ ក្បាច់គុននេះគឺមរតកមួយដ៏អស្ចារ្យ ដែលគ្រប់គ្នាត្រូវតែជួយគ្នាថែរក្សា ហើយការចូលមកកាន់គុនខ្មែររបស់ភេសជ្ជៈថ្មីនេះគឺជាការរួមចំណែកមួយដ៏សំខាន់ក្នុងការចូលរួមជួយថែរក្សាក្បាច់គុនខ្មែរមួយនេះ។
សូមបញ្ជាក់ថា កម្មវិធីផោវើរេមគុនខ្មែរ នឹងចាប់ផ្ដើមម៉ោង៧យប់ចាប់ពីថ្ងៃពុធស្អែកនេះតទៅនៅស្ថានីយទូរទស្សន៍ថោន។
គូប្រកួតនៅសប្ដាហ៍ទី១នេះមាន៖
– រស្មី គុនខ្មែរ 🇰🇭 Vs 🇱🇦 KHUNDET NAKAGYM
– ឡុង ពិសិដ្ឋ 🇰🇭 Vs 🇱🇦 ANANT CHAI
– អេ អាំម៉ារីនភូថង 🇰🇭 Vs 🇵🇭 JONEL BORBON
– ឃីម ឌីម៉ា 🇰🇭 Vs 🇨🇳 DENG FANGZHEN
– ធឿន ធារ៉ា 🇰🇭 Vs 🇨🇳 ZENG DONGHUI
