ក្នុងរយៈពេល១ឆ្នាំនៃអាណត្តិថ្មី៖ កម្មករនិយោជិតពេញចិត្តនឹងគោលនយោបាយរបស់រដ្ឋាភិបាលដែលដំឡើងប្រាក់ឈ្នួលអប្បបរមា និងផ្តល់អត្ថប្រយោជន៍ដ៏សម្បូរបែប

អ្នកស្រី ឆម សុភា ជាកម្មការិនីនៅរោងចក្រ សេងយ៉ុង បានអោយដឹងថា ការទទួលបានប្រាក់ឈ្នួលច្រើនជាងមុន អាចជួយសម្រាល បន្ទុកក្នុងការចំណាយប្រចាំថ្ងៃ ក្នុងគ្រួសារ លុយផ្តល់ឱ្យកូនសិក្សា និងផ្គត់ផ្គង់ឪពុកម្តាយដែលមានវ័យចាស់។ កម្មការិនីរូបនេះ បានបង្ហាញការសប្បាយចិត្តក្នុងការធ្វើការងារបន្ថែមម៉ោង ដើម្បីទទួលបានប្រាក់កម្រៃកាន់តែច្រើន។

អ្នកស្រីថា «សប្បាយបងអើយសប្បាយ បើសិនជាយើងអត់ការងារធ្វើប្រាក់កម្រៃវាមានតិច ដល់ពេលចឹងយើងមិនអាចផ្គត់ផ្គង់ទៅរួចទេ តែបើសិនយើងមានការងា យើងអាចថែមម៉ោង វាបានប្រាក់កម្រៃសមរម្យដែរ អ៊ីចឹងយើងអាចទប់ទល់ការចំណាយឈ្នះ»។

ក្រៅពីបានតម្លើងប្រាក់ខែជូនកម្មករនិយោជិត រាជរដ្ឋាភិបាលក៏បានផ្តល់ភាពកក់ក្តៅបន្ថែមទៀត តាមរយៈការផ្តល់ជូនអត្ថប្រយោជន៍ពីបេឡាជាតិរបបសន្តិសុខសង្គម (ប.ស.ស) ដែលសំខាន់បំផុតគឺ ការឧបត្ថម្ភស្ត្រីមានផ្ទៃពោះ ពេលសម្រាលកូន និងការឧបត្ថម្ភក្រោយពេលសម្រាល។ អ្នកស្រីថា «ពេលយើងមានផ្ទៃពោះ យើងទៅពីនិត្យផ្ទៃពោះហ្នឹងក៏គេឱ្យប្រាក់ឧបត្ថម្ភយើងដែរ ដល់ពេលយើងសម្រាល សេវាសម្រាលក៏គេចេញឱ្យយើង ថ្នាំពេទ្យគេចេញឱ្យយើង ហើយយើងបានប្រាក់ឧបត្ថម្ភពីរាជរដ្ឋាភិបាលទៀត ពេលយើងចេញពីពេទ្យ យើងរត់ឯកសារអីហើយ គឺយើងបាន៨០ម៉ឺន និងលុយ៧៥%ទៀត ហើយពេលយើងសម្រាលហើយពេលកូនយើងទៅពេទ្យចាក់ថ្នាំបង្កាផ្សេងៗ គឺបានទៀតម្តង៨ម៉ឺនទៀត»។

អ្នកស្រីថា «សប្បាយចិត្តណាស់បង ព្រោះបើសិនជាយើងអត់បានលុយរាជរដ្ឋាភិបាលផ្តល់ឱ្យ យើងក៏ចំណាយច្រើនណាស់ ដល់ពេលមានលុយរាជរដ្ឋាភិបាលឱ្យយើងទៅហើយ យើងបានចំណូលមកវិញទៀត យើងអត់ចំណាយ ហើយយើងបានចំណូលមកវិញ»។

ដោយឡែកអ្នកស្រី ផន ស្រីនិច កម្មការិនីម្នាក់ទៀតធ្វើការនៅរោងចក្រ សេងយ៉ុង បានអោយដឹងនិយាយថា បច្ចុប្បន្នមិនមានការពិបាកក្នុងការស្វែងរកការងារធ្វើនោះ ហើយនៅកន្លែងធ្វើការក៏បានអនុវត្តលក្ខខណ្ឌការងារល្អប្រើសើរជាងមុនធ្វើឱ្យអ្នកស្រីមានភាពកក់ក្តៅក្នុងការបំពេញការងារ។ មិនតែប៉ុណ្ណោះរាជរដ្ឋាភិបាល បានយកចិត្តទុកដាក់មិនឱ្យថ្លៃផ្ទះជួលឡើងស្រេចតែចិត្ត ព្រមទាំងមានការតបណ្តាញទឹកភ្លើងរដ្ឋជូនកម្មករផង ធ្វើឱ្យការចំណាយកាន់តែតិចជាងមុន។

អ្នកស្រីបន្ត « កាលមុនមានការខ្វះខាតច្រើន ណាមួយគិតដល់ថ្លៃផ្ទះជួលច្រើន ទឹកភ្លើង ហូបចុក ហើយចំណាយចំណូលគ្រួសារមួយខែៗ មិនដឹងសល់ប៉ុន្មានអីប៉ុន្មានគិតច្រើន វាចំណាយច្រើនជាងឥឡូវ តែឥឡូវចំណាយរាងតិច ថ្លៃផ្ទះជួលក៏អត់សូវថ្លៃ ថ្លៃទឹកថ្លៃភ្លើងអីក៏រាងចុះ ម្លោះហើយ យើងចំណាយតិច ចំណូលរាងបានច្រើនដែរ»។

ចំណែកកម្មការិនី ចាន់ ណន ធ្វើការនៅរោងចក្រ សេងយ៉ុង ដែរនោះបានអោយដឹងដែរថា ប្រាក់ឧបត្ថម្ភផ្សេងៗដូចជា ថ្លៃម្ហូបអាហារ ថ្លៃធ្វើដំណើរ និងប្រាក់ធ្វើការងារទៀងទាត់ នៅតែបន្តទទួលបាន និងថែមទាំងមានភាពងាយស្រួលចំពោះលក្ខខណ្ឌការងារ ដែលមិនមានភាពស្មុគស្មាញ និងផ្តល់សិទ្ធិសេរីភាពពេញលេញ។អ្នកស្រីថា « លុយអត្ថប្រយោជន៍ច្រើនដែរ លុយបាយ លុយធ្វើដំណើរ ហើយលុយបាយ ថែមម៉ោង។ បើយើងធ្វើការត្រឹមតែ ៨ម៉ោងទៅយើងបាន ១០៥០រៀល ហើយមានលុយដំណើរ លុយស្នាក់នៅ ហើយនិងលុយ៥%»។

ជាមួយគ្នានេះដែរ កម្មការិនី សេង ចរិយា អាយុ ធ្វើការនៅរោងចក្រ សេងយ៉ុង បាននិយាយថា ក្នុងការបំពេញការងារប្រចាំថ្ងៃមានភាពងាយស្រួ ល មិនមានការដាក់សម្ពាធ បៀតបៀនណាមួយឡើយ។ អ្នកស្រី សេង ចរិយា«លក្ខខណ្ឌការងារ ល្អ អត់មានគាបសង្កត់យើងទេ សិទ្ធិសេរីភាពងាយស្រួល នៅក្នុងរោងចក្រនេះអត់មានការរឹតបន្តឹងសិទ្ធិសេរីភាពទេ»។

អ្នកស្រី ឆេង ស្រីពេជ្រ ធ្វើការក្នុងរោងចក្រ សេងយ៉ុង បានអោយដឹងថា អ្នកស្រី បានទទួលបានអត្ថប្រយោជន៍ពី ប.ស.ស ទាំងការថែទាំងសុខភាព មានប្រាក់សោធននិវត្តន៍ដូចមន្ត្រីរាជការ ពេលមានគ្រោះថ្នាក់ការងារ គឺរដ្ឋជាអ្នកទទួលខុសត្រូវ ពោលគឺបើមានពិការភាព រដ្ឋជាអ្នកចិញ្ចឹម បើស្លាប់រដ្ឋជាអ្នកសង។ អ្នកស្រី ពេជ្របន្តថា៖ «អត់សូវអស់លុយចំណាយលើថ្លៃពេទ្យទេ ព្រោះយើងប្រើប.ស.ស បានប្រើ ប.ស.ស ទៅវាអត់សូវអស់លុយ អ៊ីចឹងប្រាក់ខែ សល់បន្តិចដែរ។ អត់សូវខ្វល់ដោយសារមាន ប.ស.ស ជួយ ព្រោះយើងអត់សូវចំណាយលើកូន ឬក៏ពេទ្យទេ»៕