ក្មេងៗមើលអេក្រង់ទូរសព្ទលើស ២ម៉ោង ប្រយ័ត្នមានបញ្ហាធំ
តាមការសិក្សាថ្មីមួយបានអោយដឹងថា ក្មេងតូចៗ ចំណាយពេលរាប់ម៉ោងសម្លឹងមើលអេក្រង់ទូរសព្ទ កុំព្យូទ័រ ថេប្លេត និងទូរទស្សន៍រាល់ថ្ងៃ នឹងអាចមានអាកប្បកិរិយាមិនល្អនៅពេលពួកគេមានអាយុ៥ឆ្នាំ។
តាមការសិក្សាលើក្មេងៗជាង ២ ពាន់គ្រួសារ ដោយរកឃើញថា ពួកគេមានអាកប្បកិរិយាមិនសមរម្យ ពិសេសក្មេងៗដែលវក់នឹងទូរស័ព្ទ។ អ្នកវិទ្យាសាស្រ្តបានហៅករណីនេះ ជាបញ្ហាខ្សោយស្មារតីយកចិត្តទុកដាក់ ឬ (ADHD) ពិសេសក្មេងៗ ចំណាយពេលលើស ២ម៉ោង ជាមួយអេក្រង់ទូរសព្ទ គឺមានបញ្ហាធ្វេសប្រហែស មិនយកចិត្តទុកដាក់ របស់ប៉ាម៉ាក់។
លោកវេជ្ជបណ្ឌិត Piush Mandhane បានអោយដឹងថា“ពួកយើងរកឃើញថា ការចំណាយពេលលើអេក្រង់ ពិតជាមានឥទ្ធិពលអវិជ្ជមានគួរឲ្យកត់សម្គាល់ ជាពិសេសនេះពេលពួកគេឈានដល់អាយុ ៥ឆ្នាំ’។ នេះបើតាមសម្តីជាអ្នកចូលរួមការស្រាវជ្រាវខាងលើ។ ការស្រាវជ្រាវ ក៏បានរកឃើញដែរថា ក្មេងៗចំណាយពេលច្រើនជាមួយអេក្រង់ទូរសព្ទ នឹងប៉ះពាល់ដល់ដំណេក ដែលដូចទៅនឹងការស្រាវជ្រាវមុនៗ ធ្លាប់បង្ហាញថា ក្មេងៗមើលទូរសព្ទច្រើន រំខានដល់ការគេងរបស់ពួកគេ ថែមទាំងប៉ះពាល់ដល់ការវិវត្តខួរក្បាល និងធ្វើឲ្យខូចភ្នែកទៀតផង។
ផ្អែកលើការស្រាវជ្រាវរកឃើញថា ក្មេងៗអាយុពី ៨-១១ ឆ្នាំមានបញ្ហាខ្សោយខួរក្បាល បើប្រៀបទៅនឹងក្មេងៗអាយុស្របាលគ្នា ដែលមិនបានចំណាយពេលច្រើនជាមួយអាក្រង់អេឡិចត្រូនិកទាំងនោះ។ ចំណែកកំណើនបញ្ហាភ្នែកចំពោះក្មេងៗ កើនឡើងគួរឲ្យកត់សម្គាល់ ជាពិសេសចាប់តាំងពីការប្រើប្រាស់ Smart Phone នៅឆ្នាំ ២០០៧ ខណៈបញ្ហានេះ ក៏ព្រោះទីតាំង និងចម្ងាយពួកគេមើលកៀកនឹងភ្នែក ដែលជាធម្មតាការសម្លឹងមើលអេក្រង់ទូរសព្ទ ត្រូវបានណែនាំឲ្យមើលចម្ងាយពី ៤៥-៥០ សង់ទីម៉ែត្រ។
តាមការសិក្សាទាំងនោះ ក្រុមអ្នកវិទ្យាសាស្រ្តនៅតែបន្តណែនាំដល់ម៉ាក់ប៉ាទាំងអស់ មានវិធានការកាត់បន្ថយម៉ោងមើលទូរសព្ទរបស់កូនៗ ដោយកំណត់ត្រឹមតែ៣០នាទី ប៉ុណ្ណោះក្នុង១ថ្ងៃ។ បន្ថែមពីនេះ គប្បីនាំក្មេងៗ ទៅកំសាន្តនឹងសកម្មភាពផ្សេងៗដែលមានប្រយោជន៍សម្រាប់សុខភាពជំនួសវិញ៕
