ប្រហុកខ្មែរកែច្នៃកាន់តែទំនើបមួយថ្ងៃបាន ១ តោន កំពុងពង្រឹងលទ្ធភាពនាំចេញទៅកាន់ទីផ្សាអន្តរជាតិ
ប្រហុកគឺជាមុខម្ហូបដ៏សំខាន់ ដែលគេនិយមប្រើប្រាស់ក្នុងការចម្អិនជាម្ហូបខ្មែរ ដោយសារប្រហុកមានរសជាតិមិនអាចខ្វះបាន និងមានសារសំខាន់សម្រាប់វប្បធម៌ខ្មែរ ខណៈក្រុមហ៊ុនមួយកំពុងយ៉ាងយកចិត្តទុកដាក់រក្សាកិត្តិនាមម្ហូបខ្មែរ តាមរយៈការកែច្នៃជាផលិតផលថ្មី និងដែលកំពុងសាកល្បងបញ្ចេញលក់លើទីផ្សារក្នុងស្រុកមុនឈានទៅចាប់ទីផ្សារនៅក្រៅប្រទេស។
តាមរយៈការបម្លែងប្រហុកឲ្យទៅជាម្សៅ មិនត្រឹមតែរក្សាអាហារឆ្ងាញ់បែបប្រពៃណីប៉ុណ្ណោះទេ ថែមទាំងធ្វើឲ្យកាន់តែមានភាពងាយស្រួលក្នុងការប្រើប្រាស់ ទុកដាក់ អនាម័យខ្ពស់ និងអាចប្រើប្រាស់បានទាំងម្ហូបខ្មែរ និងម្ហូបបរទេសមួយចំនួនទៀតផង។
លោក ហៃ លីអ៊ាង ប្រធានអគ្គនាយកក្រុមហ៊ុនខនហ្វីរេលបានឲ្យដឹងថា ប្រហុកជាអត្តសញ្ញាណតាំងពីជីដូនជីតាមក ប៉ុន្តែជាអកុសលដោយសារស្រុកទេសមានសង្គ្រាម ទើបមិនមានការអភិវឌ្ឍកែច្នៃប្រហុកខ្មែរឲ្យសមស្រប សម្រាប់ទាញយកប្រយោជន៍មកប្រើប្រាស់ឲ្យបានទូលំទូលាយ។ គម្រោងកែច្នៃប្រហុកជាម្សៅ មានគោលបំណងលើកកម្ពស់ប្រហុកប្រពៃណីខ្មែរ ដោយប្រែក្លាយជាទម្រង់ផលិតផលថ្មី ដែលងាយស្រួលទុកដាក់និងប្រកបដោយគុណភាពខ្ពស់។
លោក ហៃ លីអ៊ាង បានបញ្ជាក់ថា ប្រហុកដែលកែច្នៃថ្មីអាចប្រើប្រាស់ជាគ្រឿងផ្សំបន្ថែមយ៉ាងល្អបំផុត សម្រាប់មុខម្ហូបអឺរ៉ុប ដូចជាភីហ្សា ស្ពាហ្គឺទី ហ៊ែមបឺហ្គ័រ ឈីសជាដើម។ លោកថា «ប្រហុកកែច្នៃនេះមានការទទួលគាំទ្រខ្លាំង។ ខ្ញុំបាននាំឲ្យចុងភៅបារាំងសាកល្បង។ មេចុងភៅបារាំងសរសើរនិងទទួលស្គាល់ពីរសជាតិសម្រាប់បន្ថែមលើម្ហូបអាហារ។ ប្រហុករបស់យើងធំក្លិនខ្លាំង ហើយប្រទេសខ្លះមិនអនុញ្ញាតឲ្យនាំចូលទេ។ ប៉ុន្តែប្រហុកកែច្នៃនេះមានរសជាតិឆ្ងាញ់ អាចទុកបានយូរ ក្រៅពីអាចប្រើក្នុងសម្ល អាចជាគ្រឿងផ្សំបន្ថែមក្នុងអាហារបស្ចឹមប្រទេសអត់មានធំក្លិនឆ្អាបនោះទេ«។
បើតាមលោក ហៃ លីអ៊ាង រោងចក្រថ្មីរបស់ក្រុមហ៊ុនអាចផលិតកែច្នៃប្រហុកមួយថ្ងៃបានជាងមួយតោនចេញពីប្រហុកធម្មជាតិ។ យ៉ាងណាមិញ ប្រហុកដែលកែច្នៃនេះមិនទាន់នាំចេញទៅក្រៅទេ ទើបតែសាកល្បងលក់ក្នុងទីផ្សារក្នុងស្រុកសិន។ គោលដៅរបស់សហគ្រាសគឺ នាំចេញទៅទីផ្សារអន្តរជាតិ។
លោកថា គុណភាពប្រហុកកែច្នៃពីសហគ្រាសមានកម្រិតស្តង់ដាដែលអាចប្រើប្រាស់គ្រប់ម្ហូបអាហារជាគ្រឿងផ្សំក្នុងម្ហូបគ្រប់ប្រភេទ រហូតអាចប្រើប្រាស់ជាមួយអាហារបស្ចិមប្រទេសបាន។ លោក ហៃ លីអ៊ាង ប្រហុកជាម៉ាកទំនិញសម្គាល់ភូមិសាស្ត្រ នឹងទទួលបានកម្មសិទ្ធិនាពេលឆាប់ៗខាងមុខនេះ។ ម្សៅប្រហុកដែលកែច្នៃពីសហគ្រាសខនហ្វីរេលមាន ៥ រសជាតិផ្សេងគ្នា មានរសជាតិមធ្យម រសជាតិស្រាល រសជាតិដិត រសជាតិរំដេង និងរសជាតិស្លឹកក្រូចសើច។
ប្រធានទីប្រឹក្សាបច្ចេកទេសរបស់អង្គការ UNIDO លោក សេតធី ស៊ីថារ៉ាម៉ា ថមបាធូ បានឲ្យដឹងថា មិនទាន់មានផលិតផលជលផលណាមួយពីប្រទេសកម្ពុជាត្រូវបាននាំចេញជាផ្លូវការទៅប្រទេសនៅសហភាពអឺរ៉ុបនៅឡើយទេ។ ការនាំចេញផលិតផលជលផលទៅអឺរ៉ុបត្រូវគោរពស្តង់ដាខ្ពស់ជាពិសេសពាក់ព័ន្ធអនាម័យ និងសុវត្ថិភាពគុណភាព។
លោក បានអះអាងថា អង្គការ UNIDO តាមរយៈគម្រោង Capfish Capure កំពុងគាំទ្រសហគ្រាសជលផលក្នុងស្រុកទាំងបច្ចេកទេសនិងហិរញ្ញវត្ថុ ដើម្បីកសាងសមត្ថភាពលើការពង្រឹងស្តង់ដាផលិតផល ក្នុងគោលបំណងរួមចំណែកលើការសម្រេចនូវចក្ខុវិស័យរយៈពេលវែងរបស់រាជរដ្ឋាភិបាលកម្ពុជាក្នុងការអភិវឌ្ឍសង្គមនិងសេដ្ឋកិច្ច សន្តិសុខស្បៀង និងកាត់បន្ថយភាពក្រីក្រ។
ដោយទទួលបានការឧបត្ថម្ភថវិកាពីសហគមន៍អឺរ៉ុប គម្រោងអភិវឌ្ឍន៍ជលផលក្រោយប្រមូលផលជាផ្នែកមួយនៃកម្មវិធី CAPFish-Capture ផ្តោតលើការពង្រឹងសមត្ថភាព ស្ថាប័ននៃអាជ្ញាធរមានសមត្ថ កិច្ចក្នុងការបង្កើតប្រព័ន្ធ ត្រួតពិនិត្យគុណភាព សុវត្ថិភាពផលិតផលជលផល ជួយគាំទ្រដល់វិស័យឯកជនក្នុងការអភិវឌ្ឍ ការកែច្នៃផលជលផល តាមរយៈការកសាងសមត្ថភាពជំនាញ ការអនុវត្តប្រព័ន្ធសុវត្ថិភាពចំណីអាហារ ការគាំទ្រថវិកា វិនិយោគ និងការបង្កើតយន្តការគាំទ្រដល់ធុរកិច្ច ដើម្បីសម្រេចបានអនុលោមភាពសុវត្ថិភាពម្ហូបអាហារ និងសម្រួលឱ្យមានការនាំចូលដោយផ្ទាល់និងជាផ្លូវការផលិតផលជលផលកម្ពុជាចូលទៅកាន់ទីផ្សារតំបន់និងអន្តរជាតិ ផ្តោតជាពិសេសទីផ្សារសហភាពអឺរ៉ុប៕
