បារាំង អស់ឱកាសឡើងវគ្គផ្តាច់ព្រ័ត្រ Euro ២០២៤ ក្រោយចាញ់អេស្ប៉ាញ ២ទល់១
បន្ទាប់ពីបានយកឈ្នះ បារាំង ដោយលទ្ធផល ២-១ ក្នុងវគ្គពាក់កណ្តាលផ្តាច់ព្រ័ត្រ យប់ថ្ងៃទី១០ ខែកក្កដា ក្រុមបាល់ទាត់ជម្រើសជាតិ អេស្ប៉ាញ បានឡើងដល់វគ្គផ្តាច់ព្រ័ត្រ ពានរង្វាន់ទ្វីបអឺរ៉ុប (Euro) ឆ្នាំ២០២៤។
ការប្រកួតវគ្គពាក់កណ្តាលផ្តាច់ព្រ័ត្របានតែ៨នាទីប៉ុណ្ណោះ Randal Kolo Muani ជួយឲ្យបារាំង បើកការនាំមុខ ០-១ មុន ប៉ុន្តែរំលងបានតែជាង១០នាទីប៉ុណ្ណោះ យុវជនកំពុងលេចធ្លោ Lamine Yamal បានជួយឲ្យ អេស្ប៉ាញ តាមស្មើ ១-១ នៅនាទី២១ ហើយនេះជាគ្រាប់បាល់ដំបូងរបស់យុវជនវ័យ១៦ឆ្នាំក្នុងព្រឹត្តិការណ៍ Euro ឆ្នាំនេះ។ រូបគេជាកីឡាករវ័យក្មេងបំផុតដែលរកបានគ្រាប់បាល់់ក្នុងព្រឹត្តិការណ៍ឆ្នាំនេះឈានវគ្គផ្តាច់ព្រ័ត្រ។
រំលងបានតែ៤នាទីបន្ទាប់ Dani Olmo រកបាន១គ្រាប់ជួយឲ្យ អេស្ប៉ាញ នាំមុខ ២-១ វិញម្តង។ លទ្ធផលនេះរក្សារហូតចប់ការប្រកួត។
វគ្គសន្សំពិន្ទុក្នុងពូល អេស្ប៉ាញ បានយកឈ្នះ ក្រូអាត ៣-០, ឈ្នះ អ៉ីតាលី ១-០, និង ឈ្នះ អាល់បានី ១-០។ នៅវគ្គ១៦ក្រុមចុងក្រោយ អេស្ប៉ាញ បានលត់ ហ្សកហ្ស៊ី ដោយលទ្ធផល ៤-១។ វគ្គ៨ក្រុមចុងក្រោយ អេស្ប៉ាញ បានទម្លាក់ម្ចាស់ផ្ទះ អាល្លឺម៉ង់ ដោយលទ្ធផល ២-១ និងវគ្គពាក់កណ្តាលផ្តាច់ព្រ័ត្រទម្លាក់ បារាំង ដោយលទ្ធផល ២-១។
តាមរយៈជ័យជម្នះនេះ អេស្ប៉ាញ បានឡើងវគ្គផ្តាច់ព្រ័ត្រ ជាលើកទី៥ក្នុងប្រវត្តិសាស្ត្រពានរង្វាន Euro របស់ខ្លួន។ ពួកគេបានឡើងវគ្គ៤លើកកន្លងមកគឺឆ្នាំ១៩៦៤ ២០០៨ និង ២០១២ ដែលជាឆ្នាំពួកគេបានឈ្នះជើងឯក និងឆ្នាំ១៩៨៤ ពួកគេបានត្រឹមជើងឯករង៕
