ប្រជាពលរដ្ឋមួយគ្រូសារស្រុកឯកភ្នំ ប្ដេជ្ញាដាំដុះដំណាំគ្រប់ជីវៈសម្រុះ ខណៈអ្នកនាំពាក្យបរិស្ថាន ចាត់ទុកប្រព័ន្ធជីវៈចម្រុះ និងធម្មជាតិមានសារៈសំខាន់

ប្រជាពលរដ្ឋមួយគ្រូសារនៅឃុំរហាសួង ស្រុកឯកភ្នំ ខេត្ដបាត់ដំបង ប្ដេជ្ញាដាំដុះដំណាំគ្រប់ជីវៈសម្រុះ តាមបែបអេកូឡូសុី ពិសេសដាំដើមឈើដើម្បីលើកកម្ពស់ជីវៈចម្រុះក្នុងធម្មជាតិក្នុងដី និងផ្ដល់អត្ថប្រយោជន៍ដល់សុខុមាលភាពមនុស្សសត្វកាន់តែល្អប្រសើរ អ្នកនាំពាក្យក្រសួងបរិស្ថាន ចាត់ទុកប្រព័ន្ធជីវៈចម្រុះ និងធម្មជាតិមានសារៈសំខាន់ សម្រាប់ជីវិតនៅលើផែនដី។

ពាក់ពន្ធ័នេះអ្នកនាំពាក្យក្រសួងបរិស្ថាន លោកខ្វៃ អាទិត្យា បានអោយដឹងថា សកម្មភាពកសិកម្មអេកូឡូស៊ីមានសារៈសំខាន់កាន់តែខ្លាំងណាស់ នាពេលបច្ចុប្បន្ននេះ ដើម្បីកែតំរូវស្ថានភាពនេះនិងធ្វើអោយមានតុល្យភាពអេកូឡូស៊ីធម្មជាតិ។ ម្យ៉ាងវិញទៀត ការធ្វើកសិកម្មអេកូឡូសុី ដាំដំណាំចម្រុះ តាមបែបធម្មជាតិ នៅជុំវិញផ្ទះ ឬមូលដ្ឋាន ក៏ជួយអភិរក្សដីឱ្យមានជីជាតិ ជារៀងរហូតផងដែរ ហើយជួយពង្រឹងទំនាក់ទំនងគ្នាទៅវិញទៅមកនៃប្រព័ន្ធស្បៀងអាហារ និងការថែរក្សាធនធានធម្មជាតិនិងបរិស្ថាន។

លោកថា« យើងដឹងថាការការពារនិងអភិរក្សធនធានធម្មជាតិផ្តល់នូវអត្ថប្រយោជន៍យ៉ាងសំខាន់ ដោយមិនគិតថ្លៃ ដូចជាអាហារ ដែលមានជីវជាតិ ខ្យល់បរិសុទ្ធ និងទឹកស្អាត ដើម្បីជួយដល់សុខភាព ព្យាបាលជំងឺ និងការពារគ្រោះមហន្តរាយធម្មជាតិជាដើម។ យុទ្ធសាស្រ្តចក្រាវិស័យបរិស្ថាន បានបញ្ជាក់ថាយើងត្រូវការភាពស្អាត ភាពបៃតង និងចីរភាព ដោយត្រូវការគ្រប់គ្រងធនធានធម្មជាតិ និងអភិរក្សជីវៈចម្រុះឱ្យបានល្អ ប្រសិនបើយើងចង់សម្រេចបានគោលដៅអភិវឌ្ឍន៍ប្រកបដោយចីរភាព និងកសាងពិភពលោកកាន់តែរីកចម្រើន»៕