ព្រំ សំណាង ឈ្នះជើងខ្លាំងបារាំង Eda Dudgoa ខណៈវ៉ាន់ថង សន្លប់ធំរបស់កីឡាករអេស្បាញ របូតឱកាសដណ្តើមឡានពីក្រុមហ៊ុន Ganzberd

ចេញផ្សាយ ថ្ងៃទី28 ខែមិថុនា ឆ្នាំ2024

បន្ទាប់ពីបានយកឈ្នះជើងខ្លាំងបារាំង Eda Dudgoa ដោយពិន្ទុ កាលពីយប់ថ្ងៃទី២៧ ខែមិថុនា ឆ្នាំ២០២៤ កីឡាករគុនខ្មែរ ព្រុំ សំណាង បានចេញប្រកួតនៅក្រៅប្រទេស៣ដងហើយ ប៉ុន្តែមិនទាន់បរាជ័យម្តងណាឡើយ ខណៈឈុត សេរីវ៉ាន់ថង សន្លប់ធំក្រោមថ្វៃដៃកីឡាករអេស្បាញ នៅជុំទី១ របូតឱកាសដណ្តើមឡានពីក្រុមហ៊ុន Ganzberd។

ការប្រកួតនៅប្រទេសបារាំងនាយប់ថ្ងៃទី២៧ ខែមិថុនា នេះ គូទី១អ្នកលេងគុនខ្មែរសៀង ហៃ បានយកឈ្នះម្ចាស់ផ្ទះបារាំងគ្រង់ខ្សែក្រវាត់ក្នុងប្រភេទគីឡូ៥៤គីឡូក្រាម។ ដោយឡែករាហ៊ូមាស ឈុត សេរីវ៉ាន់ថង សន្លប់ធំត្រឹមទឹកទី១ ក្រោមកណ្តាប់ដៃ និងជង្គង់កីឡាករអេស្បាញ MARIO ALVAREZ។ អាចថានេះជាលើកដំបូងក្នុងអាជីពសម្រាប់ ឈុត សេរីវាន់ថង ដែលសន្លប់ធ្ងន់ ជាមួយបរទេស ដែលបាត់បង់ឱកាសដណ្តើមឡានស៊េរីទំនើបពីក្រុមហ៊ុនGanzberg។

ដោយឡែកអ្នកលេងប្រអប់ឆ្វេងឡៅ ចិត្រា ក៏រងបរាជ័យក្រោយថ្វីដៃម្ចាស់ផ្ទះ ANTHONY DEFRETIN ដោយពិន្ទុ។ ការប្រកួតរវាងអ្នកទាំងពីមានការតឹងតែងហើយចេញអាវុធមួយៗច្បាស់ច្បាស់ ប៉ុន្តែនៅដើមទឹកទី២ ម្ចាស់ផ្ទះ ANTHONY ទាត់កញ្ចឹងករភ្ញៀវអោយដួល ប៉ុន្តែអាជ្ញាកណ្តាលមិនរាប់នោះទេ។ ចំណែកអ្នកប្រដាលលន បញ្ញា នៅតែមិនអាចបំបែកកំណត់ត្រាឈ្នះរបស់អ្នកប្រដាល់កូនកាត់បារាំង ម៉ារ៉ុក Elias Naji។ អ្វីដែលអ្នកតាមដានគុនខ្មែរចាប់អារម្មណ៍នោះអ្នកប្រដាល់កូនកាត់បារាំង ម៉ារ៉ុក Elias Naji គ្មានអាវុធអ្វីគួអោយគត់សម្គល់នោះទេ។

ដោយឡែកមួយគូទៀតអ្នកប្រដាល់គីឡូធ្ងន់ ព្រុំ សំណាង ឆ្លងកាត់បទពិសោធឡើងសង្វៀនរាប់រយដងមិនសូវបានចេញទៅក្រៅប្រទេសសម្រាប់ការប្រកួតលក្ខណៈគុនខ្មែរអាជីព។ បើតាមប្រវត្តិ អ្នកលេងគុនខ្មែរទម្ងន់ធ្ងន់ និងវ័យកាន់តែច្រើនរូបនេះទើបតែចេញទៅប្រកួតនៅក្រៅប្រទេស៣ដងប៉ុណ្ណោះ។ លើកទី១ ព្រុំ សំណាង បានផ្តួលកីឡាករអង់គ្លេស Thomas Carpenter ឲ្យសន្លប់ក្នុងទឹកទី១ ដើម្បីទទួលបានខ្សែក្រវាត់ Thai Fight។ លើកទី២ រូបគេបានផ្តួលកីឡាកររុស្ស៊ី Firdavszhon Naimov ឲ្យសន្លប់ក្នុងទឹកទី១ សង្វៀន Thai Fight។ លើកទី៣ រូបគេបានយកឈ្នះកីឡាករបារាំង Eda Dudgoa ដោយពិន្ទុ នៅថ្ងៃទី២៧ ខែមិថុនា ឆ្នាំ២០២៤ នៅទីក្រុងបារីស ប្រទេសបារាំង។

សម្រាប់អ្នកឈ្នះការប្រកួតនៅទឹកដីទីក្រុងប៉ារីស ប្រទេសបារាំងក្រុមហ៊ុន GANZBERG ដែលជាអ្នកឧបត្ថម្ភធំ បានផ្តល់ថវិការលើកទឹកចិត្តចំនួន២លានរៀលក្នុងម្នាក់។ ដោយឡែករថយន្តPick Up ខ្លាញ់គោ ដែលក្រុមហ៊ុន GANZBERG ដាក់អោយឈុត សេរីវ៉ាន់ថង ក្រុមហ៊ុនសូមរក្សាទុកសិន ដោយក្រុមហ៊ុន GANZBERG នឹងរៀបចំមហាប្រព្រឹត្តិការណ៍ប្រដាល់គុនខ្មែរ នៅប្រទេសកម្ពុជា ផ្ដល់ឱកាសពិសេសដល់កីឡាករ គុនខ្មែរទម្ងន់ ៦០ គីឡូក្រាម ប្រកួតគ្នាដណ្តើមកាដូយក្សពី GANZBERG ឡាន Mazda ខ្លាញ់គោ១គ្រឿង ក្នុងពេលឆាប់ៗខាងមុខ៕