ប្រធានសហភាពពលកម្មជាតិកម្ពុជា ស្នើក្រសួងមហាផ្ទៃចាត់វិធានការយ៉ាងម៉ឺងម៉ាត់ចំពោះអង្គការសង់ត្រាល
បន្ទាប់ពីក្រសួងមហាផ្ទៃ បានទទួលលិខិតសហជីពស្នើសុំឱ្យឯកឧត្តមរដ្ឋមន្ត្រីអន្តរាគមន៍ពិនិត្យពីសកម្មភាព និងការគាំទ្រហិរញ្ញវត្ថុផ្សេងៗទៅលើមជ្ឈមណ្ឌល សម្ព័ន្ធភាពការងារ និងសិទ្ធិមនុស្ស ហៅកាត់«សង់ត្រាល់» មកដល់ពេលនេះ ក្រសួងមហាផ្ទៃ កំពុងពិនិត្យមើលផ្នែកច្បាប់ លក្ខន្តិកៈ របស់អង្គការសមាគម និងសំណើសំណូមពរទាំងឡាយដែលតំណាងកម្មករ-និយោជិតជាង១៣ម៉ឺននាក់ដែលបានដាក់មកក្រសួង។
ទន្ទឹមក្រសួងកំពុងតែពិនិត្យនោះ ប្រធានសហភាពពលកម្មជាតិកម្ពុជា ក៏ស្នើសុំយ៉ាងទទូចទៅក្រសួងមហាផ្ទៃ ដើម្បីចាត់វិធានការយ៉ាងម៉ឺងម៉ាត់ចំពោះអង្គការសង់ត្រាល ដែលបានអនុវត្តផ្ទុយពីលក្ខន្តិកៈរបស់ខ្លួន ដែលតម្កល់នៅក្រសួងមហាផ្ទៃ ហើយថ្មីៗនេះ។ អង្គការសង់ត្រាល ក៏បានធ្វើសកម្មភាពជាតិជ្រៀតជ្រែកទៅដល់កិច្ចការសហជីព ក៏ដូចជាការចេញរបាយការណ៍បំភ្លៃការពិត ទៅលើការអនុវត្តសិទ្ធិសេរីភាពសហជីពនៅកម្ពុជាផងដែរ។
ថ្លែងប្រាប់ Fast News តាមសារអេឡិចត្រូនិច លោកសំ សឿន ប្រធានសហភាពពលកម្មជាតិកម្ពុជា បានអោយដឹងថា« ខ្ញុំយល់ឃើញថាអង្គការសងត្រាល់ មិនមានវិជ្ជាជីវៈគ្រប់គ្រាន់ជាអ្នកស្រាវជ្រា វទៅលើស្ថានភាពដែលមាននៅកម្ពុជានោះទេ។ ហើយសងត្រាល់ក៏មិនមែនជាអ្នកបច្ចេកទេសឬ ក៏វិទ្យាសាស្ត្រធ្វើការស្រាវទៅលើបញ្ហាសិទ្ធិកម្មករនៅកម្ពុជាផងដែរ»។
លោកបន្ថែមថា អង្គការសង់ត្រាល់ ពុំមានវិជ្ជាជីវៈក្នុងការសិក្សាស្រាវជ្រាវទៅលើវិស័យការងារ ហើយបានចេញរបាយការណ៍ធ្វើឲ្យមានការភាន់ច្រឡំ ទៅលើការអនុវត្តសិទ្ធិសេរីភាពរបស់សហជីពនៅកម្ពុជា ហើយក្នុងរបាយការណ៍នោះ គឺគាត់បានផ្ដោតទៅលើការអនុវត្តការស្រាវជ្រាវរបស់អង្គការពលកម្មអន្តរជាតិខាងការងារ «ILO» ថាមានភាពលំអៀងមិនសុក្រឹត។
ជាមួយគ្នានេះដែរ លោកបានចោទជាសំណួរ ទៅអង្គការសង់ត្រាល់ ថា «អង្គការសងត្រាល់មានបទពិសោធន៍ប៉ុន្មានឆ្នាំហើយក្នុងការធ្វើការស្រាវជ្រាវ ឬក៏ធ្វើការសិក្សាទៅលើវិស័យការងារទាំងនៅក្នុងប្រទេសកម្ពុជា ក៏ដូចជានៅបណ្ដាប្រទេសផ្សេងៗដូច ILO ហើយឬនៅ? ហើយបុគ្គលិករបស់អង្គការសង់ត្រាល់មានប៉ុន្មាននាក់ ដែលមានវិជ្ជាជីវៈឬក៏មានសញ្ញាបត្រ័ទទូលស្គាល់ទៅលើវិជ្ជាជីវៈនៃការស្រាវជ្រាវដល់សុក្រឹត ដ៏មានតម្លារភាពចំពោះវិស័យការងារ ដូចអង្គការILO ដែលឬទេ»?
លើសពីនេះទៅទៀត ប្រធានសហភាពពលកម្មជាតិកម្ពុជា រូបនេះក៏ប្រតិកម្ម បកទៅនឹងរបាយការណ៍របស់សង់ត្រាល់ ថាជា របាយការណ៍អង្កេតរបស់សង់ត្រាល់គ្មានវិជ្ជាជីវៈត្រឹមត្រូវទេ។ ព្រោះមិនតំណាងអោយសហជីពភាគច្រើននៅក្នុងប្រទេសកម្ពុជា(១) និងទី២ ការសិក្សានេះមិនមានសុក្រិតភាពត្រឹមត្រូវទេ ព្រោះនៅពេលដែលរបាយការណ៍របស់អង្គការILO បានលើកឡើងពីវឌ្ឍនៈភាព សេរីភាពសហជីព និងលក្ខខណ្ឌការងាររបស់កម្មករ ព្រមទាំង របបសន្ដិសុខសង្គមមានភាពល្អប្រសើរហើយ បែរជាសង់ត្រាល់ឃើញតែចំណុចអវិជ្ជមាន និងខ្មៅងងឹតទៅវិញ។
សូមបញ្ជាក់ផងដែរថា ថ្នាក់ដឹកនាំសហព័ន្ធសហជីព សមាគម តំណាងឱ្យសមាជិកសមាជិកា ដែលបំពេញការងារ ក្នុងវិស័យកាត់ដេរ និងសេដ្ឋកិច្ចក្រៅប្រព័ន្ធ ចំនួន ១៣ ម៉ឺននាក់ រួមមាន សហព័ន្ធសហជីពរក្សាសិទ្ធកម្មករកម្ពុជា និងសហភាពសិទ្ធិកម្មករកម្ពុជា បានយកញត្តិទៅដាក់នៅក្រសួងមហាផ្ទៃជាបន្តបន្ទាប់ គឺនៅថ្ងៃទី ១៤ ខែមិថុនា និងថ្ងៃទី ២១ ខែមិថុនា នេះ ដើម្បីស្នើសុំឲ្យមានការត្រួតពិនិត្យការអនុវត្តសកម្មភាព និងការប្រើប្រាស់កញ្ចប់ថវិការបស់«សង់ត្រាល់» ដែលធ្វើសកម្មភាពផ្ទុយពីច្បាប់ស្ដីពីសមាគម និងអង្គការមិនមែនរដ្ឋាភិបាល និងលក្ខន្តិកៈរបស់ខ្លួន៕
