ឆ្នាំ២០២៤នេះ ខេត្តចំនួន ៦ផ្សេងទៀតនឹងត្រូវប្រកាសជាខេត្តបញ្ឈប់ការបន្ទោរបង់ពាសវាលពាសកាល
ភ្នំពេញៈ ថ្លែងក្នុងវេទិកាសារព័ត៌មានស្តីពី «អ្វីទៅជាកិច្ចការអភិវឌ្ឍន៍ជនបទ» នាថ្ងៃទី៤ ខែមិថុនា ខេត្តចំនួន ៦ទៀត រដ្ឋមន្រ្តីក្រសួងអភិវឌ្ឍន៍ជនបទ បានអោយដឹងថា ខេត្តចំនួន ៦ទៀតជាខេត្តបញ្ឈប់ការបន្ទោរបង់ពាសវាលពាសកាលត្រឹមឆ្នាំ ២០២៤ នេះ ដែលធ្វើឱ្យចំនួនខេត្តដែលបញ្ឈប់ការបន្ទោរបង់ពាសវាលពាសកាល សរុបកើនដល់ ១៣ ខេត្តលើ២៥ រាជធានី-ខេត្ត។
បើតាមរដ្ឋមន្រ្តីក្រសួងអភិវឌ្ឍន៍ជនបទ លោក ឆាយ ឫទ្ធិសែន បានអោយដឹងថា ក្រសួងអភិវឌ្ឍន៍ជនបទ និងរដ្ឋបាលខេត្តព្រះសីហនុគ្រោងនឹងធ្វើការប្រកាសខេត្តព្រះសីហនុជាខេត្តបញ្ឈប់ការបន្ទោរបង់ពាសវាលពាសកាលនៅថ្ងៃទី១៣ ខែមិថុនា សប្តាហ៍ក្រោយនេះ។ រហូតមកដល់ពេលបច្ចុប្បន្ននេះ ខេត្តចំនួន ៧ហើយ ដែលត្រូវបានប្រកាសជាខេត្តបញ្ចប់ការបន្ទោរបង់ពាសវាលពាសកាល ដែលរួមមាន ខេត្តស្វាយរៀង ព្រៃវែង កណ្តាល រាជធានីភ្នំពេញ កំពង់ស្ពឺ កំពង់ឆ្នាំង និងកែប។ រីឯ ខេត្តដែលគ្រោងប្រកាសបញ្ចប់ការបន្ទោរបង់ពាសវាលពាសកាលនាពេលខាងមុខរួមមាន ខេត្តកំពង់ចាម ត្បូងឃ្មុំ បន្ទាយមានជ័យ សៀមរាប រតនគិរី និងព្រះសីហនុ។
លោកថា «អញ្ជឹងខេត្តបញ្ចប់ការបន្ទោរបង់ពាសវាលពាសកាលនឹងកើនឡើងដល់ ១៣ត្រឹមបំណាច់ឆ្នាំនេះហើយប្រាកដហើយថា ចុងអាណត្តិនេះ គឺគ្រប់ខេត្តទាំងអស់នឹងទទួលបានជាខេត្តបញ្ចប់ការបន្ទោរបង់ពាសវាលពាសកាលតែម្តង»។
លោករដ្ឋមន្រ្តី ឆាយ ឫទ្ធិសែន បានថ្លែងថា ការកែលម្អលក្ខខណ្ឌការរស់នៅរបស់ប្រជាពលរដ្ឋនៅជនបទតាមរយៈការផ្គត់ផ្គង់ទឹកស្អាត និងបង្គន់អនាម័យ គឺជាការងារអទិភាពទី២ របស់ក្រសួងដែលបានកំពុងតែអនុវត្ត។ ក្នុងការងារផ្គត់ផ្គង់ទឹកស្អាត រយៈពេលជាង ៩ខែមកនេះ ក្រសួងបានសាងសង់អណ្តូងស្នប់ជាង ២ពាន់ ស្រះទឹកសហគមន៍បានចំនួន ៣១៦ស្រះ អាងត្រងទឹកភ្លៀងបាន ១០៥អាង ស្ថានីយ៍ផលិតទឹកបរិភោគសហគមន៍ចំនួន២ ហើយប្រព័ន្ធចែកចាយតាមប្រព័ន្ធខ្នាតតូចសហគមន៍បាន ១២៧កន្លែង។ រហូតមកដល់ពេលបច្ចុប្បន្ននេះ អត្រាគ្របដណ្តប់ទឹកស្អាតមាន ៨៣,៣ភាគរយហើយនៅទូទាំងប្រទេស។
លោកបន្ថែមថា៖«ឥឡូវបង្គន់១ ផ្ទះ១បាត់ហើយ។ ផ្ទះខ្លះប្រើបង្គន់រួមគ្នា ផ្ទះខ្លះមានបង្គន់លើសពី១ដែរនៅតំបន់ជនបទ។ ខ្ញុំចុះរយៈពេល ៨ខែនេះ ភ្ញាក់ផ្អើលត្រង់ថា ផ្ទះណាក៏មានបន្ទប់ទឹក មានបង្គន់ប្រើប្រាស់ អញ្ជឹងអត្រាគ្របដណ្តប់តាមការស្រាវជ្រាវ ធ្វើកំណត់ត្រា វាយតម្លៃកន្លងមកគឺបានរហូតទៅដល់ ៨៦,៦ភាគរយ…អញ្ជឹងនៅឆ្នាំ ២០៣០នេះ ជាគោលដៅគឺយើងត្រូវសម្រេចឱ្យបាន ១០០ភាគរយ»។
លោករដ្ឋមន្រ្តីបានលើកឡើងថា កាលណាពលរដ្ឋមានបង្គន់អនាម័យ និងទឹកស្អាតប្រើប្រាស់ នោះវាប្រាកដណាស់ថា ពួកគាត់មិនទៅបត់ជើងបត់ដៃពាសវាលពាសកាលទៀតនោះទេ។ «អញ្ជឹងការដែលយើងបានលុបបំបាត់ការបន្ទោរបង់ពាសវាលពាសកាលនេះ យើងចៀសផុតពីជំងឺឆ្លង យើងថែរក្សាបាននូវសុខភាពល្អ។ លើសពីនោះការទទួលទានទឹកស្អាតធ្វើឱ្យកុមារទទួលបាននូវIQខ្ពស់ទៀតផង។ អញ្ជឹងយើងទទួលបាននូវពលរដ្ឋដែលមានភាពវៃឆ្លាត ដែលជាធនធានមនុស្ស ដើម្បីកសាងប្រទេសជាតិឱ្យមានការរីកចម្រើនបន្ថែមទៀត»។ នេះជាការបញ្ជាក់បន្ថែមរបស់លោករដ្ឋមន្រ្តី៕
