គុនខ្មែរជួរមុខចំនួន៦រូប នឹងត្រូវតតាំងជាមួយគុនបរទេស នៅព្រឹត្តិការណ៍Ganzberg Kun Khmer Super Fight នាទីក្រុងប៉កដូ
ដូចការគ្រោងទុកសល់តែ១ថ្ងៃទៀតព្រឹត្តិការណ៍ដែល Ganzberg បានសហការជាមួយ ស្ថាប័ន KSF (Kun Khmer Super Fight) នាំយកកីឡាករគុនខ្មែរជួរមុខលំដាប់ដំពូលៗ ចំនួន៦រូប ចេញទៅប្រកួតលក្ខណៈគុនខ្មែរ និងដណ្ដើមខ្សែក្រវាត់កម្រិតពិភពលោក តតាំងជាមួយកីឡាករមកពីប្រទេសផ្សេងៗគ្នា លើទឹកទីក្រុងប៉កដូ ប្រទេសបារាំង។
ព្រឹត្តិការណ៍នេះធ្វើឡើងនាថ្ងៃទី២ ខែមិថុនា ឆ្នាំ២០២៤ មានការប្រកួត លក្ខណៈម៉ារ៉ាតុនប្រភេទទម្ងន់ Lightweight ៦១គីឡូក្រាម ដណ្ដើមខ្សែក្រវាត់ KSF និងរកអ្នកខ្លាំង ក្លាយជាម្ចាស់រថយន្ត Pickup ខ្លាញ់គោពី Ganzberg ក្នុងនោះដែលត្រៀមលក្ខណៈប្រកួតម៉ារ៉ាតុន រួមមាន ជើងខ្លាំងគុនខ្មែរលំដាប់ទម្ងន់៦០គីឡូក្រាម រាហ៊ូមាស ឈុត សេរីវ៉ាន់ថង, នាគមាសជាយដែន ឃីម បូរ៉ា ដោយពួកគេ ត្រូវចាប់ឆ្នោត តទល់ជាមួយ ម្ចាស់ខ្សែក្រវាត់ WBC Omar Drissi (អូម៉ា ត្រេសស៊ី) និងម្ចាស់ខ្សែក្រវាត់២ស្ថាប័ន ថៃកាត់បារាំង Mike Dederian។
ក្រៅពីការប្រកួតម៉ារ់ាតុនក៏មានការប្រកួតមិត្តភាព ម្ចាស់មេដាយប្រាក់ស៊ីហ្គេមមុខស្រស់ ទួន ស្រីភីន ត្រូវតតាំង អ្នក លេងគុនខ្មែរប្រចាំប្រទេសបារាំង Alexandra Chatenet, ឯ នាគចម្បាំងគុនខ្មែរ លន បញ្ញា ប៉ះ Omar Bathily (អូម៉ា បាតធីលី)។ ដោយឡែក អ្នកលេងគុនខ្មែរ សៀង ហៃ ប្រកួតដណ្ដើមខ្សែក្រវាត់គុនខ្មែរ លើកដំបូងទល់ជាមួយស្ទាងជំទង Ouassim Mazouz (វ៉ាស៊ីម ម៉ាហ្សូស) និង ខ្លារខិនខ្មៅ ឈឿង ល្វៃ ប៉ះជាមួយម្ចាស់ស្រុកកែងពិឃាដ Omar Samb (អូម៉ា សាំ)។
ក្រោយចប់ព្រឹត្តិការណ៍ទី១ Ganzberg និង Kun Khmer Super Fight បន្តដឹកនាំកីឡាករគុនខ្មែរចូលរួមប្រកួត ក្នុងកម្មវិធីប្រដាលើដ៏ធំមួយទៀតរបស់បារាំង BELLE EQUIPE នៅចំកណ្ដាលទីក្រុងបារីស នាថ្ងៃទី២៧ ខែមិថុនា ឆ្នាំ២០២៤ រួមមាន គ្រូក្មេងកំពូលស្នៀត សៀងហៃ, នាគចម្បាំងគុនខ្មែរ លន បញ្ញា, លេងអាវុធ ឡៅ ចិត្រា និង ម្ចាស់មេដាយមាសទម្ងន់ធ្ងន់ ស៊ីហ្គេម ២០២៣ ព្រំ សំណាង ត្រៀមតតាំងជាមួយជើងខ្លាំង ម្ចាស់ផ្ទះ បារាំង និងកីឡាករមកពី អេស្ប៉ាញ និង អង់គ្លេស ជាដើម។
សូមបញ្ជាក់ថា ព្រឹត្តិការណ៍ជាប្រវត្តិសាស្ត្រគុនខ្មែរ ទាំងពីរខាងលើ នឹងធ្វើការផ្សាយផ្ទាល់ពីទីក្រុងប៉ុកដូ និងទីក្រុងបារីស ប្រទេសបារាំង លើកញ្ចក់ទូរទស្សន៍BTV, Facebook Page BTV, Facebook Page Ganzberg និង Facebook Page KSF Kun Khmer Super Fight រូមទាំងសហការជាច្រើនទៀត៕
