ដំរីមួយក្បាលចុះទៅផឹកទឹកអូរបានជាប់ផុងក្នុងភក់ចេញមិនរួចនិងរងរបួសបាក់ជើងខាងឆ្វេងធ្ងន់ធ្ងរ

ដំរីមួយក្បាលចុះទៅផឹកទឹកអូរ ក្នុងដែនជម្រកសត្វព្រៃភ្នំព្រិច ស្ថិតនៅស្រុកកោះញែក ខេត្តមណ្ឌលគិរី បានជាប់ផុងក្នុងភក់ចេញមិនរួច តែត្រូវបានមន្ដ្រីជំនាញបរិស្ថាន និងអាជ្ញាធរមូលដ្ឋានប្រទះឃើញជួយសង្គ្រោះចេញមកវិញ។

លោក អភិបាលខេត្តមណ្ឌលគិរី បានឲ្យដឹងនៅព្រឹកថ្ងៃទី០៣ ខែឧសភា ឆ្នាំ២០២៤នេះថា ក្រោយប្រទះឃើញដំរីជាប់ក្នុងផុងក្នុងភក់ទឹកអូរគ្រាក់ មន្ដ្រីជំនាញបរិស្ថាន ឧទ្យានុរក្ស, អង្គការ WWF, ក្រុមហ៊ុនរ៉ូយ៉ាល់គ្រុប និងអាជ្ញាធរស្រុក បានសហការគ្នាអូសដំរីរងគ្រោះចេញពីភក់។

លោកអភិបាលខេត្តបានអះអាងថា បន្ទាប់ពីអូសចេញពីភក់ដែលជាប់ផុងនោះ មន្ដ្រីជំនាញមើលឃើញថា ដំរីខាងលើនេះរងរបួសបាក់ជើងខាងឆ្វេងធ្ងន់ធ្ងរ ហើយនៅពេលនេះកំពុងតែសង្គ្រោះព្យាបាល។ មន្ដ្រីជំនាញដាក់ការសង្ស័យថា ដំរីមួយក្បាលនេះទំនងជាដំរីដែលបាត់ចេញពីតំបន់កែវសីម៉ាកាលពីប៉ុន្មានថ្ងៃមុននេះ៕