កក្រើកអស់តែម្តងសង្វៀនយ័ន្ត៨ទិសរបស់ WURKZ លើកនេះ! ជំនួបរវាងនាគរាជទាំង ៤ និងគូរពិសេសៗរបស់គុនខ្មែរ នឹងប្រព្រឹត្តឡើងនៅក្រុងតាខ្មៅថ្ងៃទី៣១
ភ្នំពេញ៖ មហាព្រឹត្តិការណ៍ WURKZ សេនាគុនខ្មែរយ័ន្ត ៨ទិស ជំនួបស្តេចនាគទាំង៤ របស់ស្ថានីយទូរទស្សន៍ TOWN FULL HDTV ប្រមូលផ្តុំដោយកីឡាករល្បីៗរបស់កម្ពុជាដូចជាកីឡាករគុនខ្មែរជួរមុខ និងគុនចម្រុះ កីឡាករ ចាន់ រតនា អេ អាំម៉ារិនភូថង ឈុត សេរី វ៉ាន់ថង និងកំពូលកីឡាករគុនខ្មែរ ធឿន ធារ៉ា។
លោក Tommy Kim ទីប្រឹក្សាទូរទស្សន៍ TOWN បានឲ្យដឹងថា WURKZ សេនាគុនខ្មែរយ័ន្ត៨ទិសមានប្រកួតដណ្តើមខ្សែក្រវាត់ចំនួន ៤ កាន់តែធ្វើកកើកសង្វៀនយ័ន្ត៨ទិសរបស់ស្ថានីយទូរទស្សន៍ TOWN FULL HDTV ។ ការប្រកួតម៉ារ៉ាតុង ដណ្តើមខ្សែក្រវាត់អន្តរជាតិ IPCC មានកីឡាករគុនខ្មែរជួរមុខ និងគុនចម្រុះដូចជា ចាន់ រតនា សេ្តចនាគសមុទ្រខាងត្បូងកីឡាករ Batermene Namjilmaa ស្តេចនាគភ្នំទឹកកកខាងជើង កីឡាករ Ke Jingjun សេ្តចនាគសមុទ្រខាងកើត និងកីឡាករALex ជំនួសកីឡាករ Ae Mwe ស្តេចនាគសមុទ្រខាងលិច។
លោកថា មិនថាកីឡាករ ចាន់ រតនា នោះទេគឺកីឡាករណាក៏មានឱកាសឡើងបង្ហាញសមត្ថភាព ប្រកួតដណ្ដើមខ្សែក្រវាត់នៅទីនោះដែរ ពោលឲ្យតែមានសមត្ថភាពខ្លាំង។ ព្រោះសង្វៀន TOWN គឺថ្នាក់ដឹកនាំដាក់គោលដៅពិសេសឆ្នាំ២០២៤ នេះត្រូវលើកស្ទួយកីឡាករគុនខ្មែរឲ្យរឹតតែមានឱកាសឡើងប្រកួតកម្មវិធីធំៗឲ្យបានច្រើន។
លោកបន្ថែមថា ក្រៅពីការប្រកួតម៉ារាតុង ការប្រកួតដណ្តើមខ្សែក្រវាត់អន្តរជាតិ IPCC កំពូលកីឡាករគុនខ្មែរ ធឿន ធារ៉ា ដាក់ខ្សែក្រវាត់អោយកីឡាកររុស្សីដណ្តើម, រាហ៊ូមាស ឈុត សេរីវណ្ណថង ប្រកួតដណ្តើមខ្សែក្រវាត់អន្តរជាតិ IPCC ជាមួយកីឡាករចិន ខណៈកីឡាករ អេ អាំម៉ារីនភូថង ក៏ត្រូវប្រជែងខ្សែក្រវាត់អន្តរជាតិ IPCC ជាមួយ កីឡាករ ប្រដាល់រុស្ស៊ី។
លោក ខូវ ឆាយ ប្រធានសហពន្ធ័ប្រដាល់គុនខ្មែរ បានអោយដឹងថា ក្នុងនាមសហព័ន្ធកីឡាគុនខ្មែរថ្មី និងរូបលោកផ្ទាល់សូមកោតសរសើរដល់ស្ថានីយទូរទស្សន៍ TOWN FULL HDTV តែងតែរៀបចំការប្រកួតខ្នាតយក្សដើម្បីជួយលើកស្ទួយវិស័យកីឡាប្រដាល់គុនខ្មែរ ឲ្យល្បីល្បាញលើកឆាកអន្តរជាតិ តាមរយៈប្រកួតនេះ។
បញ្ជាក់ដែរថា កម្មវិធី WURKZ សេនាគុនខ្មែរយ័ន្ត ៨ទិស របស់សង្វៀន TOWN យប់នេះគឺលេងឈុតធំតែម្ដង ដោយដាក់ឲ្យដណ្ដើម និងម៉ារ៉ាតុងខ្សែក្រវាត់ IPCC រហូតដល់ ៤គ្រឿង។ ដែលមហាព្រឹត្តិការណ៍ជំនួបស្តេចនាគទាំង ៤ លើសង្វៀនយ័ន្ត៨ទិសរបស់ស្ថានីយទូរទស្សន៍ TOWN FULL HDTV ប្រព្រឹតិ្តទៅនៅទីក្រុងតាខ្មៅ ខេត្តកណ្តាលនៅថ្ងៃទី៣១ ខែមីនា ឆ្នាំ២០២៤ ការប្រកួតចាប់ពីម៉ោង ៧យប់តទៅ និងផ្សាយផ្ទាល់លើទូរទស្សន៍ TOWN៕
