អ្នកនាំពាក្យក្រសួងការងារ ៖ ការបំផុសបំផុសអោយកម្មករធ្វើបាតុកម្មតវ៉ា បិទផ្លូវ ដើម្បីរកដំណោះស្រាយ ជាអំពើខុសច្បាប់ និងជាបទល្មើស
ភ្នំពេញ៖ មន្ត្រីជាន់ខ្ពស់របស់ក្រសួងការងារ បានអោយដឹងថា ការបំផុសបំផុសអោយកម្មករចេញធ្វើបាតុកម្មតវ៉ា ឬបិទផ្លូវ ដើម្បីរកដំណោះស្រាយ ជាអំពើខុសច្បាប់ និងជាបទល្មើសដែលមានចែងក្នុងក្រមព្រហ្មទណ្ឌនៃព្រះរាជាណាចក្រកម្ពុជា។
លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានសរសេរនៅលើទំព័រហ្វេសបុករបស់លោកនៅព្រឹកថ្ងៃទី៣០ ខែមិនា នេះថា កន្លងមកនេះ យើងសង្កេតឃើញថា មានចលនារុញកម្មករនិយោជិតឱ្យធ្វើការតវ៉ាតាមរូបភាពបាតុកម្មដោយជនមួយចំនួនតូចតាមរូបភាពកៀរគរកម្មករនិយោជិតដោយបំផុសទ្រឹស្តីដូចជា ៖ ចេញធ្វើបាតុកម្មតវ៉ា ទើបមានដំណោះស្រាយ, ទាល់តែបិទផ្លូវ ទើបមានដំណោះស្រាយ, អត្ថប្រយោជន៍បងប្អូនកម្មករទទួលបានច្រើនណាស់ បងប្អូនត្រូវងើបតវ៉ាបិទផ្លូវទាមទារ ទើបទទួលបាន ។ល។ ការបំផុសបំផុស និងជំរុញទាំងអស់នេះ ជាអំពើខុសច្បាប់ និងជាបទល្មើសដែលមានចែងក្នុងក្រមព្រហ្មទណ្ឌនៃព្រះរាជាណាចក្រកម្ពុជា។
លោកបន្ថែមថា ការប្រមូលផ្តុំ និងបញ្ចេញមតិ ជាសិទ្ធិ និងសេរីភាពដែលធានាការពារដោយរដ្ឋធម្មនុញ្ញ ប៉ុន្តែមិនមែនមានន័យថា បងប្អូនកម្មករនិយោជិតប្រើប្រាស់ដោយគ្មានព្រហ្មដែនកំណត់នោះទេ។ មាត្រា ៣១ នៃរដ្ឋធម្មនុញបានចែងថា «…… ការប្រើប្រាស់សិទ្ធិសេរីភាពរបស់បុគ្គលម្នាក់ៗមិនត្រូវរំលោភច្បាប់ និងប៉ះពាល់ដល់សិទ្ធិ សេរីភាព កិត្តិយស សេចក្តីថ្លៃថ្នូររបស់អ្នកដ៏ទៃឡើយ»។ តាមរយៈនេះ បុគ្គលម្នាក់ៗ ត្រូវមានទំនួលខុសត្រូវ ចំពោះសកម្មភាព និងការបញ្ចេញមតិរបស់ខ្លួន។
លោកបន្តថា ដើម្បីប្រើប្រាស់សិទ្ធិសេរីភាពត្រឹមត្រូវ បងប្អូនត្រូវគិតជាមុនថា តើអ្វីដែលបងប្អូននឹងធ្វើ ឬបញ្ចេញមតិ តើខុសច្បាប់ឬទេ? ប៉ះពាល់ដល់សិទ្ធិសេរីភាព កិត្តិយស សេចក្តីថ្លៃថ្នូររបស់អ្នកដ៏ទៃឬទេ? បើយល់ថា វាខុស នោះកុំធ្វើ នោះបងប្អូនជាពលរដ្ឋដែលគោរពច្បាប់៕
