ប៉ាល់ ឆរស្មី កំពុងចាប់អាជីពជាអ្នកសារព័ត៌មានកីឡា ដោយកំពុងផ្តោតលើជំនាញថតរូប
កីឡា៖ បន្ទាប់ពីបានចូលក្របខណ្ឌរដ្ឋនៅក្នុងអង្គភាពកីឡារបស់ក្រសួងមហាផ្ទៃ កីឡាការិនីវ៉ូវីណាមជម្រើសជាតិកម្ពុជា ប៉ាល់ ឆរស្មី កំពុងចាប់អាជីពជាអ្នកសារព័ត៌មានកីឡាដោយកំពុងផ្តោតលើជំនាញថតរូប។
កីឡាការិនី ប៉ាល់ ឆរស្មី អត្តពលិកឆ្នើមប្រចាំព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ បានអោយដឹងថា មុនពេលចាប់អាជីពកីឡា រូបនាងស្រឡាញ់ការងារសារព័ត៌មានជាពិសេសផ្នែករូបតាំងពីតូច ប៉ុន្តែមិនមានឱកាស ដោយសារជាប់ដៃនឹងអាជីពកីឡា។ ទោះជាយ៉ាងណា បន្ទាប់ពីចូលក្របខណ្ឌរដ្ឋ ស្ថិតនៅក្រុមប្រឹក្សាកីឡារបស់ក្រសួងមហាផ្ទៃការិយាល័យព័ត៌មាន ដូច្នេះក៏ជ្រើសរើសយកផ្នែកថតរូបស្របតាមក្តីស្រឡាញ់របស់ខ្លួន។
ប៉ាល់ ឆរស្មី បានរៀបរាប់ថា «ឥឡូវនេះ ខ្ញុំចេញទៅយកព័ត៌មានជាមួយក្រុមការងារ ស្របពេលក្រសួងមហាផ្ទៃមានការប្រកួតបាល់ទាត់ពានរង្វាន់របស់ក្រសួង។ ជាដំបូងខ្ញុំចាប់យកផ្នែកថតរូប ដោយមានបងៗជួយបង្ហាត់បង្រៀនផ្នែកថត បន្ទាប់ពីយល់ដឹងពីរបៀបថតរូបបានច្រើន រូបនាងនឹងរៀនពីរបៀបសរសេរអត្ថបទថែមទៀត»។
កីឡាការិនីរូននេះបន្តថា សម្រាប់ការចាប់ផ្តើមការងារផ្នែកថតរូបនេះមិនមែនមានអ្វីពិបាកខ្លាំងសម្រាប់រូបនាងឡើយ ពីព្រោះជាការងារដែលខ្លួនស្រឡាញ់តាំងពីតូច។ អ្វីដែលប្លែកគឺអារម្មណ៍ធ្លាប់តែត្រូវបានគេសម្ភាស និងថត ប៉ុន្តែពេលនេះមានអារម្មណ៍ប្លែកមួយទៀតដែលតាមថត និងសម្ភាសគេវិញ។ «ខ្ញុំអត់មានភ័យខ្លាចអីទេ តែអារម្មណ៍ប្លែក ព្រោះខ្ញុំធ្លាប់តែដើរចេញមក គេសម្ភាសយើង តែឥឡូវនេះ ខ្ញុំតាមថត តាមសម្ភាសគេវិញ មានអារម្មណ៍ពិសេសប្លែក»។
ទោះបីជាយ៉ាងណា មិនថាក្លាយជាអ្នកសារព័ត៌មាន ឬជាអ្នកកីឡាទេ កីឡាការិនីរូបនេះនៅតែបន្តឆន្ទៈដើម្បីរួមចំណែកអភិវឌ្ឍកីឡានៅក្នុងប្រទេសកម្ពុជាដដែល។ ប៉ាល់ ឆរស្មី ថា ៖«ត្រៀមប្រមូលផ្តុំជាថ្មីខាងមុខ ខ្ញុំនៅតែជាកីឡាការិនីដដែល ដោយសារឆ្នាំនេះមានផែនការកាត់បន្ថយកីឡាករ កីឡាការិនី គ្រូបង្វឹក ហើយខាងសហព័ន្ធក៏អត់មានលើកបេក្ខភាពគ្រូបង្វឹកដែរ»។
ប៉ាល់ ឆរស្មី បានឈ្នះមេដាយមាស៤គ្រឿង ប្រាក់១គ្រឿង និងសំរិទ្ធ១គ្រឿង ក្នុងកីឡាស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ និងក្លាយជាអត្តពលិកឆ្នើមប្រចាំព្រឹត្តិការណ៍។ ក្រៅពីកីឡាស៊ីហ្គេម ឆ្នាំ២០២៣ រូបនាងបានឈ្នះមេដាយមាស ប្រាក់ និងសំរិទ្ធ ពីកីឡាស៊ីហ្គេម ជើងឯកអាស៊ី និងជើងឯកពិភពលោកជាច្រើនទៀតក្នុងរយៈពេលប៉ុន្មានឆ្នាំកន្លងទៅនេះ៕
