អគ្គិភ័យ បានបំផ្លាញផ្ទះអស់ ០៥ខ្នង អស់ទាំងស្រុង រួមជាមួយសម្ភារៈ មួយចំនួនទៀតនៅក្រោយអតីតម៉ុងឌីយ៉ាល់
រាជធានីភ្នំពេញ ៖វេលាម៉ោងប្រមាណ០៤និង១០នាទីរសៀល ថ្ងៃទី០៦ ខែមីនា ឆ្នាំ២០២៤នេះ លំនៅឋានធ្វើពីឈើ ប្រក់ស័ង្កសី សង់ជាប់ៗគ្នា នៅក្រោយអតីតម៉ុងឌីយ៉ាល់ នៅក្នុងសង្កាត់ផ្សារដើមគរ ខណ្ឌទួលគោក ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្តាលអោយផ្ទះ ចំនួន៥ខ្នង រងការខូចខាតទាំងស្រុង ហើយរថយន្តពន្លត់អគ្គិភ័យ ជាច្រើនគ្រឿង បានទៅអន្តរាគមន៍បាញ់ពន្លត់ ។
តាមសាក្សី បានអោយដឹងថា នៅមុនពេលកើតហេតុ គេឃើញភ្លើងបានឆាបឆេះចេញពីជាប់ទី១ នៃផ្ទះឈើមួយខ្នង ដែលម្ចាស់បិទទ្វារទុកចោល ហើយបានឆេះរាល់ដាល់យ៉ាងរហ័ស ទៅផ្ទះផ្សេងទៀត ដែលនៅជាប់នោះ យ៉ាងសន្ធោសន្ធៅ។ ភ្លាមៗ បង្កអោយមានការភ្ញាក់ផ្អើលដល់ប្រជាពលរដ្ឋនាំគ្នា ជញ្ជូនអីវ៉ាន់ចេញ និងទាក់ទងរថយន្តពន្លត់អគ្គិភ័យ ដើម្បីជួយអន្តរាគមន៍ ។
តាមនគរបាលការិយាល័យ បង្ការពន្លត់អគ្គីភ័យ និងសង្គ្រោះ នៃស្នងការនគរបាលរាជធានីភ្នំពេញ បានអោយដឹងថា នៅក្នុងហេតុការណ៍នេះ រថយន្តពន្លត់អគ្គិភ័យ ប្រមាណជិត២០គ្រឿង បានទៅអន្តរាគមន៍បាញ់ទឹកពន្លត់ ហើយផ្ទះដែលត្រូវភ្លើងឆេះជាប្រភេទផ្ទះ ធ្វើពីឈើលើ ថ្មក្រោម ប្រក់ស័ង្កសី ដែលបានសង់ជាប់ៗគ្នា តាមផ្លូវឌឿងហែម។ អគ្គិភ័យនេះ បានបំផ្លាញផ្ទះអស់ ០៥ខ្នង អស់ទាំងស្រុង រួមជាមួយសម្ភារៈ មួយចំនួនទៀត។
ពាក់ព័ន្ធបង្កឲ្យកើតមានអគ្គិភ័យនេះ សមត្ថកិច្ចជំនាញ ពុំទាន់ដឹងពីមូលហេតុ នៅឡើយទេ ខណៈកំពុងតែស្រាវជ្រាវ ។ទោះបីជាយ៉ាងណា គេមានការសង្ស័យថា បណ្តាលមកពីទុស្សេខ្សែភ្លើង ៕
